អតីតរដ្ឋមន្រ្តីការបរទេសរបស់ប្រទេសជប៉ុន ត្រូវបានបោះឆ្នោតជ្រើសរើសជាមេដឹកនាំគណបក្សប្រជាធិបតេយ្យសេរីនិយម (LDP) កាលពីថ្ងៃពុធ ដែលនេះជាជ័យជម្នះមួយធ្វើឱ្យលោកកំពុងតែឈានទៅកាន់តំណែងជានាយករដ្ឋមន្ត្រីបន្ទាប់របស់ជប៉ុន នាពេលខាងមុខនេះ ជំនួសលោក Yoshihide Suga។
ថ្លែងនៅក្នុងសុន្ទរកថាមួយ លោក Fumio Kishida បានធ្វើការប្តេជ្ញាថា លោកដឹកនាំគណបក្សរបស់លោកនៅក្នុងការបោះឆ្នោតសកលមួយ ដែលនឹងធ្វើឡើងនៅក្នុងរយៈពេលប៉ុន្មានសប្តាហ៍ខាងមុខនេះ និងបន្តប្រយុទ្ធប្រឆាំងនឹងជំងឺរាតត្បាតកូវីដ-១៩ ដែលបានធ្វើឱ្យប៉ះពាល់ដល់សេដ្ឋកិច្ចរបស់ប្រទេសជប៉ុន។
លោកថា៖ «ចាប់ពីថ្ងៃនេះតទៅ ខ្ញុំនឹងប្រើប្រាស់ឱ្យអស់ពីកម្លាំងកាយចិត្តរបស់ខ្ញុំទាំងអស់ក្នុងការធ្វើកិច្ចការងារនានា។ សូមសមាជិកគណបក្សទូទាំងប្រទេស និងសមាជិកសភា ចូលរួមធ្វើកិច្ចការងារជាមួយខ្ញុំ»។
ទោះជាយ៉ាងណា លោក Fumio Kishida ទទួលបានការគាំទ្រពីសាធារណជនក្នុងកម្រិតមធ្យមតែប៉ុណ្ណោះ ខណៈជ័យជម្នះរបស់លោកក្នុងការត្រូវបានជ្រើសរើសជាមេដឹកនាំគណបក្ស LDP អាចនឹងបង្កជាបញ្ហាដល់បក្សក្នុងការបោះឆ្នោតនៅពេលខាងមុខ។
គួរបញ្ជាក់ថា លោក Kishida បានឈ្នះអតីតរដ្ឋមន្ត្រីការបរទេស និងការពារជាតិ លោក Taro Kono នៅក្នុងជុំទី២ នៃការបោះឆ្នោតជ្រើសរើសថ្នាក់ដឹកនាំគណបក្សប្រជាធិបតេយ្យសេរីនិយម ខណៈដែលអ្នកដែលទទួលបានជ័យជម្នះនៃការបោះឆ្នោតរបស់គណបក្ស គឺមានន័យថា កំពុងតែឆ្ពោះទៅទទួលបានតំណែងជានាយករដ្ឋមន្ត្រីហើយ។
ជ័យជម្នះរបស់លោក Fumio Kishida នេះទំនងជាមិនបង្កឱ្យមានការផ្លាស់ប្តូរគោលនយោបាយធំដុំណាមួយនោះទេ ខណៈដែលជប៉ុនព្យាយាមទប់ទល់ជាមួយប្រទេសចិន និងធ្វើឱ្យសេដ្ឋកិច្ចដែលរងផលប៉ះពាល់ដោយជំងឺរាតត្បាតងើបឡើងវិញ៕
