តំណាងអាជីវករលក់ដូរក្នុងផ្សារធំតាកែវប្រមាណជាង១០០០នាក់ រួមគ្នាតវ៉ាមិនឲ្យអាជ្ញាធររុះរើផ្សារ ដោយលើកបដាថា «យើងខ្ញុំជាអាជីវករក្នុងផ្សារធំតាកែវ មិនយល់ព្រមរុះរើធ្វើផ្សារថ្មីដាច់ខាត» និងបានស្នើសុំជួបអភិបាលខេត្តតាកែវ ដើម្បីជួយដោះស្រាយក្នុងបញ្ហានេះ កាលពីល្ងាចថ្ងៃទី៣០ ខែកញ្ញា ឆ្នាំ២០២១។
ការតវ៉ានេះបានធ្វើឡើងកាលពីថ្ងៃទី៣០ ខែកញ្ញា ដោយមានអាជីវករជាង ១០០០នាក់ ទៅតវ៉ានៅមុខសាលាខេត្តតាកែវ។ ជុំវិញបញ្ហានេះ អាជីវករលក់ខោអាវមួយរូបសុំមិនបញ្ចេញឈ្មោះ បានប្រាប់វីអូឌីនៅថ្ងៃទី១ ខែតុលាថា ការពិតរឿងរុះរើផ្សារនេះ បានកើតម្តងរួចហើយ កាលពី១ឆ្នាំមុន។ អាជីវករក្នុងផ្សារគិតថា រឿងនេះបានស្ងប់ស្ងាត់ហើយបើពុំមានការតវ៉ាអ្វីឡើយ។ តែក្រោយមកឃើញមានការចុះវាស់វែងជាថ្មី និងការចេញប្លង់ថ្មី រួមទាំងការកក់ប្រាក់ទិញតូបថ្មី ទើបពួកគាត់ភ្ញាក់ផ្ញើល និង នាំគ្នាទៅតវ៉ានៅមុខសាលាក្រុងដូនកែវ ចំនួន ៣ទៅ៤ដងហើយ តែពុំមានដំណោះស្រាយ។ ក្រោយមកក៏ទៅតវ៉ាទៀតនៅសាលាខេត្តដោយមានការផ្តិតមេដៃរបស់អាជីវករទាំងអស់ជាង១០០០តូប។
ប្រភពដដែលបានរៀបរាប់ពីទង្វើរបស់សមត្ថកិច្ចនៅពេលក្រុមអាជីវករប្រមូលគ្នាទៅតវ៉ានៅមុខសាលាខេត្តដែរថា៖ «ការតវ៉ា គឺជុំគ្នានៅមុខតាកែវយាយកែវនៅសាលាខេត្ត គ្រាន់តែទៅដល់ភ្លាមឃើញមានកងកម្លាំងសមត្ថកិច្ចឈរយាមពេញហ្នឹងឃាំងមិនឲ្យពួកអាជីវករចូលទៅតវ៉ាដល់ក្នុងសាលាខេត្តទេ ឃាត់ទុកត្រឹមសួនច្បារ ក៏មានប៉ូលីសសក្តិ៥ម្នាក់សួរនាំថា តើមកហ្នឹងមកមានការអី អាណាហ៊ានចូល គាត់វ៉ៃបែកក្បាលទាំងអស់»។
ប៉ុន្តែក្រោយពេលឃើញអាជីវករនាំគ្នាមកតវ៉ាច្រើនពេក ប៉ូលីសម្នាក់ហ្នឹងក៏គេចខ្លួនបាត់ទៅ។
ប្រភពដដែលបន្តថា ក្រុមអាជីវករទាំងអស់បានប្តេជ្ញាចិត្តថា នឹងមិនឲ្យរុះរើតូបឡើយ ទោះបីជាមានកន្លែងដោះដូរក៏ដោយ ដោយក្រុមអាជីវករបានស្នើសុំដំណោះស្រាយ គឺកុំឲ្យមានការកែប្រែតូបអ្វីទាំងអស់។
ប្រភពដដែលបន្ថែមថា ប្រសិនបើ១សប្តាហ៍ទៀតមិនមានដំណោះស្រាយជូនពួកគេទេនោះ ពួកគេនឹងឡើងទៅតវ៉ាទៅដល់មុខផ្ទះរបស់លោកនាយករដ្ឋមន្ត្រី ហ៊ុន សែន ដោយសារកាលពីឆ្នាំ២០១៦ លោកនាយករដ្ឋមន្ត្រី បានប្រកាសរួចម្តងហើយថា ផ្សារតាកែវជាផ្សារធំរបស់រដ្ឋដែលគ្មានការអភិវឌ្ឍអ្វីទាំងអស់ គឺតម្រូវឲ្យប្រជាជនជាម្ចាស់តូបលក់តកូនតចៅដោយគ្មានអាណត្តិអ្វីទាំងអស់ ព្រោះមិនមែនជាផ្សារឯកជនសម្រាប់ពួកឈ្នួញអភិវឌ្ឍន៍នោះទេ។
ម្ចាស់អាជីវកម្មលក់ដូនៅផ្សារធំតាកែវ អ្នកស្រី ម៉ៅ សុផល អាយុ៣៦ឆ្នាំ បានលើកឡើងពីក្ដីបារម្ភជាខ្លាំងជុំវិញគម្រោងអភិវឌ្ឍន៍ផ្សារធំតាកែវជាថ្មីនេះ។
អ្នកស្រីលើកឡើងដូច្នេះថា៖ «អាជីវករទាំងអស់ សុទ្ធតែមានបំណុលជាប់ខ្លួនដូចជា ធនាគារ តុងទីន និងជីវភាពរស់នៅប្រចាំថ្ងែ ហើយដល់ពេលគាត់ឲ្យពួកខ្ញុំរុះរើធ្វើថ្មី អ៊ីចឹងពួកខ្ញុំត្រូវទៅលក់នៅខាងក្រៅ គាត់រកទីតាំងឲ្យលក់នៅខាងក្រៅ ចុះកន្លែងពួកខ្ញុំលក់នៅដដែលមែន ប៉ុន្តែចូលមកវិញពួកខ្ញុំត្រូវរងការវេទនាប៉ុន្មានឆ្នាំដែលពួកខ្ញុំលក់សុខៗ សឹងតែមិនរស់ផងហ្នឹង រាល់ថ្ងែវេទនាណាស់ លក់អត់ដាច់ទេតែតូបប៉ុណ្ណឹងលក់អត់ដាច់ផង ចុះទម្រាំតែគាត់រុះរើធ្វើថ្មីរាប់ឆ្នាំហើយពួកខ្ញុំលក់វេទនាប៉ុន្មាន[…]»។
អ្នកស្រីបន្ថែមថា សម្រាប់តូបដែលអ្នកស្រីលក់រាល់ថ្ងៃ ជាផ្សារដែលទិញដាច់ ដែលមានអ្នកចង់វិនិយោគលើផ្សារនេះបន្តដែលធ្វើឲ្យអ្នកស្រីនិងអាជីវករផ្សេងទៀតមិនយល់ព្រម។ អ្នកស្រីស្នើសុំត្រឹមដំណោះស្រាយតែមួយគត់ គឹការរក្សាផ្សារនៅដដែល។
នាយករដ្ឋបាលសាលាខេត្ត លោក មាស អ៊ុយ បានថ្លែងថា សាលាក្រុងដូនកែវចង់អភិវឌ្ឍន៍ផ្សារតាកែវនេះ គឺ ដោយសារតែផ្សារតាកែវពេលនេះចាស់ ពេលមានភ្លៀងខ្លាំងម្តងៗលិចទឹក លក់មិនបានទេ។ ដូច្នេះ ដើម្បីលុបបំបាត់រឿងហ្នឹង ទើបសាលាក្រុងដូនកែវរកអ្នកវិនិយោគថ្មី។
លោកបន្តដូច្នេះថា៖ «ខ្ញុំមិនមានដំណោះស្រាយអ្វីទេ ព្រោះខាងក្រុមហ៊ុនគេបានសុំវិនិយោគចូលក្រសួងសេដ្ឋកិច្ចនិងហិរញ្ញវត្ថុបានហើយ ហើយក្រសួងសេដ្ឋកិច្ចហិរញ្ញវត្ថុក៏ព្រមដែរ។ តាមពិតគេស៊ើបពីមុនមានការឯកភាពកិច្ចព្រមព្រៀងរួចហើយ បានគេហ៊ានសុំវិនិយោគ ក្រោយមកក៏មិនដឹងថា មានអ្វីយ៉ាងម៉េចទៀតទេ ទើបមានការតវ៉ាលើរឿងហ្នឹង»។
លោកស្រី ចាន់ ធីតា ជាអភិបាលក្រុងដូនកែវ បាននិយាយថា រឿងនេះមិនស្ថិតនៅក្នុងដែនសមត្ថកិច្ចរបស់លោកទេ។ វាជារឿងរបស់អ្នកវិនិយោគកណ្តាល និងក្រសួងសេដ្ឋកិច្ចនិងហិរញ្ញវត្ថុ។
លោកស្រីបន្តថា៖ «ខ្ញុំអាចឆ្លើយនូវអ្វីដែលខ្ញុំឆ្លើយបាន បើអ្វីដែលហួសពីសមត្ថកិច្ចរបស់ខ្ញុំ គឺខ្ញុំឆ្លើយអត់បានទេ ខ្ញុំអត់ដឹងខា្លចឆ្លើយទៅខុសពីការពិត»។
ពាក់ព័ន្ធនឹងបញ្ហាតវ៉ាកាលពីថ្ងៃទី៣០ ខែកញ្ញា អភិបាលខេត្តតាកែវលោក អ៊ូច ភា បានលើកឡើងថា សម្រាប់ការតវ៉ានេះ លោកបានកំពុងតែកោះហៅអាជីវករមកសួរនាំដើម្បីរកឲ្យឃើញថា តើពួកគាត់ចង់បានអ្វី?
លោកថា៖ «ឥឡូវយើងទទួលបានឯកសារគាត់ហើយចាំមើលយើងហៅគាត់មកសួរនាំសិន[…] ហៅពួកគាត់ដើម្បីជួបពិភាក្សា ថាតើពួកគាត់ចង់បានអី?»។
លោកបន្ថែមថា៖ «ពេលនេះកំពុងតែទទួលពាក្យដើម្បីរកពេលវេលាហៅគាត់មកជួប[…] ដើម្បីពិភាក្សាជាមួយគាត់[…] គាត់ចង់បានអី»។
គួរជម្រាបជូនថា អាជីវករផ្សារធំខេត្តតាកែវប្រមាណជាង ១០០០នាក់ បានផ្ទុះការតវ៉ាជាបន្តបន្ទាប់ ក្រោយពីទទួលបានព័ត៌មានថា ផ្សារធំខេត្តតាកែវដែលពួកគេកំពុងប្រកបអាជីវកម្មលក់ដូនេះ នឹងអភិវឌ្ឍន៍កសាងថ្មី។ ប៉ុន្តែប្រជាពលរដ្ឋអះអាងថា ពួកគេនឹងមិនឲ្យរុះរើធ្វើតូបថ្មីនោះឡើយ៕
