ប្រធានាធិបតីហ្វីលីពីន លោក Rodrigo Duterte បានឱ្យដឹងកាលពីថ្ងៃសៅរ៍កន្លងទៅថា លោកបានសម្រេចចូលនិវត្តន៍ពីអាជីពនយោបាយហើយ ជាការប្រកាសដ៏គួរឱ្យភ្ញាក់ផ្អើលមួយដែលថារូបលោកកំពុងតែត្រួសត្រាយផ្លូវឱ្យកូនស្រីរបស់លោកដើម្បីស្នងតំណែងរបស់លោកបន្ត។
លោក Rodrigo Duterte ថ្លែងថា៖ «ថ្ងៃនេះ ខ្ញុំសូមប្រកាសចូលនិវត្តន៍ពីនយោបាយហើយ»។
ការប្រកាសដ៏គួរឱ្យភ្ញាក់ផ្អើលមួយនេះត្រូវបានធ្វើឡើង ខណៈដែលប្រធានាធិបតីហ្វីលីពីនរូបនេះលើកឡើងថា លោកដល់ពេលវេលាដែលត្រូវបញ្ចប់អាជីពនយោបាយរបស់លោកហើយ ស្របពេលដែលវាក៏បានបង្កឱ្យមានជាការប៉ាន់ស្មានថា រូបលោកកំពុងតែបើកផ្លូវឱ្យកូនស្រីរបស់លោក ដើម្បីប្រកួតប្រជែងក្នុងការស្នងតំណែងរបស់លោក។
ការប្រកាសចូលនិវត្តន៍របស់លោកក៏ត្រូវបានធ្វើឡើងអំឡុងពេលដែលអ្នកនយោបាយរបស់លោក គឺសមាជិកព្រឹទ្ធសភា លោក Bong Go ដាក់ពាក្យធ្វើជាបេក្ខភាពសម្រាប់តំណែងអនុប្រធានាធិបតីទៅកាន់គណៈកម្មការរៀបចំការបោះឆ្នោតនៅហ្វីលីពីនផងដែរ។
លោក Rodrigo Duterte ដំបូងឡើយ ត្រូវបានរំពឹងថា នឹងឈរឈ្មោះសម្រាប់តំណែងជាអនុប្រធានាធិបតី ជាផែនការមួយដែលប្រជាជនហ្វីលីពីនភាគច្រើនយល់ឃើញថា ជាការរំលោភលើស្មារតីនៃរដ្ឋធម្មនុញ្ញដែលកំណត់រយៈពេលមួយអាណត្តិសម្រាប់ប្រធានាធិបតី។
ទាក់ទិននឹងករណីនេះ អ្នកវិភាគនយោបាយមួយចំនួនបានលើកឡើងថា វាមានសារៈសំខាន់ណាស់សម្រាប់លោក Rodrigo Duterte ក្នុងការមានអ្នកស្នងតំណែងស្មោះត្រង់មួយរូប ដើម្បីការពាររូបលោកពីសកម្មភាពផ្លូវច្បាប់ដែលលោកអាចនឹងត្រូវប្រឈម ជុំវិញការសម្លាប់មនុស្សរាប់ពាន់នាក់ក្នុងសង្គ្រាមប្រឆាំងគ្រឿងញៀនរបស់លោក គិតចាប់តាំងពីឆ្នាំ២០១៦។
គួរបញ្ជាក់ថា មេដឹកនាំវ័យ៧៦ឆ្នាំរូបនេះនៅតែមានប្រជាប្រិយភាព បើទោះបីជាគូប្រជែងនានារបស់លោកបានចោទរូបលោកថាជាជនផ្តាច់ការ និងមិនអត់ឱនចំពោះការប្រឆាំងក៏ដោយ។
ហ្វីលីពីន នឹងរៀបចំការបោះឆ្នោតនៅខែឧសភាឆ្នាំក្រោយ សម្រាប់ជ្រើសរើសតំណែងប្រធានាធិបតីថ្មី អនុប្រធានាធិបតី ក៏ដូចជាសមាជិកសភា និងមន្រ្តីរដ្ឋាភិបាលក្នុងតំបន់ជាង១៨ ០០០នាក់៕
