ប្រទេសហ្សកហ្ស៊ី (Georgia) បានរៀបចំការបោះឆ្នោតក្នុងស្រុកកាលពីថ្ងៃសៅរ៍កន្លងទៅ ពោលគឺធ្វើឡើងក្នុងរយៈពេលមួយថ្ងៃបន្ទាប់ពីការចាប់ខ្លួនអតីតប្រធានាធិបតី និងជាអ្នកនយោបាយបក្សប្រឆាំង លោក Mikheil Saakashvili។
ការបោះឆ្នោតនៅក្នុងប្រទេសដែលមានប្រជាជនប្រមាណជា៣,៩លាននាក់នេះ ត្រូវបានធ្វើឡើងស្របពេលដែលខ្លួនមានវិបត្តិនយោបាយអស់រយៈពេលជាច្រើនខែដែលបានផ្ទុះឡើង បន្ទាប់ពីការបោះឆ្នោតសភាកាលពីឆ្នាំមុន ដែលបានបង្កឱ្យគណបក្សប្រឆាំងធ្វើពហិការមិនចូលសភា។
គួរបញ្ជាក់ថា លោក Mikheil Saakashvili ដែលបានចាកចេញពីហ្សកហ្ស៊ីក្នុងឆ្នាំ២០១៣ ហើយត្រូវបានផ្តន្ទាទោសឱ្យជាប់ពន្ធនាគាររយៈពេល៥ឆ្នាំដោយកំបាំងមុខ ត្រូវបានចាប់ខ្លួនកាលពីថ្ងៃសុក្រ បន្ទាប់ពីលោកបានវិលត្រឡប់មកកាន់ប្រទេសវិញ ហើយអំពាវនាវឱ្យអ្នកគាំទ្ររបស់លោកបោះឆ្នោតឱ្យគណបក្សប្រឆាំង។
ទាក់ទិននឹងករណីនេះ ប្រធានាធិបតីហ្សកហ្ស៊ី លោកស្រី Salome Zourabichvili បានថ្លែងឱ្យដឹងបន្ទាប់ពីការចាប់ខ្លួននេះថា លោកស្រីនឹងមិនលើកលែងទោសឱ្យលោក Mikheil Saakashvili ជាដាច់ខាត និងបានចោទប្រកាន់លោកថាមានចេតនាព្យាយាមធ្វើឱ្យប្រទេសមានអស្ថិរភាព។
ទោះជាយ៉ាងណា មេធាវីរបស់លោក Mikheil Saakashvili បានចាត់ទុកការចាប់ខ្លួននេះ កាលពីថ្ងៃសុក្រថាជា «ការឃុំខ្លួនដែលធ្វើឡើងក្រោមហេតុផលនយោបាយ»៕
