សមត្ថកិច្ចខេត្តក្រចេះ បង្រ្កាបទីតាំងខារ៉ាអូខេមួយកន្លែងនៅក្នុងខេត្តនេះ ដោយបានឃាត់ខ្លួនមនុស្សប្រុសស្រីចំនួន២០នាក់ កាលពីយប់រំលងអធ្រាត្រឈានចូលថ្ងៃទី៣ ខែតុលា ឆ្នាំ២០២១ ខណៈម្ចាស់ហាងបញ្ជូនទៅតុលាការចាត់វិធានការច្បាប់។
ស្នងការរងនគរបាលខេត្តក្រចេះ លោក លន់ សុផាត ប្រាប់ វីអូឌី នៅថ្ងៃទី៤ ខែតុលានេះថា កម្លាំងស្នងការនគរបាលខេត្ត សហការជាមួយកម្លាំងនគរបាលក្រុង កម្លាំងនគរបាលស្រុកចិត្របុរី ក្រោមការសម្របសម្រួលដោយលោក អ៊ង រី ព្រះរាជអាជ្ញារងអមសាលាដំបូងខេត្តក្រចេះ បានចុះបង្ក្រាបទីតាំងខារ៉ាអូខេមួយកន្លែងដែលមានយីហោ «អាហារដ្ឋាន និង ខេធីវី ពេញចិត្ត» ដែលលួចបើកដំណើរការអាជីវកម្ម ល្មើសបម្រាមរដ្ឋាភិបាលក្នុងការទប់ស្កាត់ការរីករាលដាលនៃជំងឺកូវីដ-១៩។
លោកបញ្ជាក់ថា អំឡុងពេលចុះបង្ក្រាបនោះ សមត្ថកិច្ចបានឃាត់ខ្លួនមនុស្សប្រុសស្រី រួមទាំងម្ចាស់ហាង សរុបចំនួន២០នាក់ ស្ថិតនៅភូមិក្រគរ សង្កាត់ក្រគរ ក្រុងក្រចេះ ខេត្តក្រចេះ កាលពីរំលងអធ្រាត្រឈានចូលថ្ងៃទី៣ ខែតុលា ឆ្នាំ២០២១នេះ។
លោក លន់ សុផាត ឱ្យដឹងទៀតថា ក្រោយពីសាកសួរចប់ សមត្ថកិច្ចបានបញ្ជូនម្ចាស់ហាងទៅតុលាការចាត់វិធានការច្បាប់បន្ត ខណៈមនុស្ស១៩នាក់ផ្សេងទៀតរងការផាកពិន័យពាក់ព័ន្ធករណីល្មើសបម្រាមរដ្ឋាភិបាល រួចដោះលែងឱ្យមានសេរីភាពវិញហើយ។
ព្រះរាជអាជ្ញារងអមសាលាដំបូងខេត្តក្រចេះ លោក អ៊ង រី សុំមិនធ្វើការបកស្រាយជុំវិញករណីនេះ ដោយលោកតម្រូវឱ្យអ្នកសារព័ត៌មានទៅជួបផ្ទាល់។
កាលពីចុងខែសីហា ឆ្នាំ២០២១ លោកនាយករដ្ឋមន្ត្រី ហ៊ុន សែន បានបន្តណែនាំដល់បណ្តាគណៈអភិបាលរាជធានី-ខេត្ត ត្រូវបន្តការអនុវត្តនូវការរឹតបន្តឹងវិធានការសុខាភិបាល វិធានការរដ្ឋបាល និងវិធានការច្បាប់ ដោយផ្អែកតាមសភាពការជាក់ស្តែងនៃជំងឺនេះ នៅក្នុងភូមិសាស្ត្ររាជធានី-ខេត្តរបស់ខ្លួន ក្រោមការសម្របសម្រួលរបស់គណៈប្រតិបត្តិគណៈកម្មការអន្តរក្រសួង និងអនុគណៈកម្មការដែលមានការពាក់ព័ន្ធ។
លោកនាយករដ្ឋមន្ត្រី ហ៊ុន សែន ក៏បានបញ្ជាក់ថា ការបន្តពង្រឹងវិធានការនេះ ខណៈដែលកម្ពុជារកឃើញមេរោគកូវីដ-១៩ ប្រភេទ ដែលតា (Delta) ជាបន្តបន្ទាប់ និងនៅស្ទើរគ្រប់ទីកន្លែងនៅទូទាំងប្រទេស ហើយលទ្ធភាពនៃការឆ្លងរាលដាលទ្រង់ទ្រាយធំនៅពេលខាងមុខនៅបន្តជាបញ្ហាប្រឈមចំពោះមុខដែលគួរឱ្យព្រួយបារម្ភសម្រាប់កម្ពុជា៕