អង្គការសង្គមស៊ីវិលស្នើដោះលែងសកម្មជនបរិស្ថាននិងអ្នកការពារសិទិ្ធមនុស្សឱ្យមានសេរីភាពវិញ ខណៈពួកគេកំពុងជាប់ពន្ធនាគារក្នុងស្ថានភាពចង្អៀតណែន។
នៅក្នុងទំព័រហ្វេសប៊ុករបស់អង្គការលីកាដូ បានឱ្យដឹងនៅថ្ងៃអង្គារទី៥ ខែតុលានេះថា ក្នុងឱកាសពិធីបុណ្យភ្ជុំបិណ្ឌ ប្រជាពលរដ្ឋខ្មែរទូទាំងប្រទេស ក៏ដូចជាសង្គមខ្មែរទាំងមូល កំពុងជួបជុំឪពុកម្តាយ បងប្អូន ញាតិមិត្តជិតឆ្ងាយ យ៉ាងសប្បាយរីករាយ ប៉ុន្តែក្រុមយុវជនបរិស្ថាននិងអ្នកការពារសិទ្ធិមនុស្សដែលតែងឈរជួរមុខក្នុងការបង្ហាញជាសាធារណៈអំពីបញ្ហាសំរាម ការបំពុលបរិស្ថានដោយការបង្ហូរទឹកកខ្វក់ចូលទន្លេនិងសមុទ្រ ការកាប់បំផ្លាញព្រៃឈើ បែរជាកំពុងជាប់ក្នុងពន្ធនាគារ ដោយមិនត្រឹមត្រូវនៅក្នុងស្ថានភាពចង្អៀតណែនទៅវិញ។
កាលពីថ្ងៃទី៥ ខែឧសភា ឆ្នាំ២០២១ សាលាដំបូងរាជធានីភ្នំពេញ បានសម្រេចផ្ដន្ទាទោសលោក ថុន រដ្ឋា ដាក់ពន្ធនាគារចំនួន២០ខែ ខណៈកញ្ញា ភួន កែវរស្មី និងកញ្ញា ឡុង គន្ធា ត្រូវបានផ្តន្ទាទោសដាក់ពន្ធនាគារ១៨ខែ និងពិន័យជាប្រាក់៤លានរៀលដូចគ្នា ក្រោមបទចោទប្រកាន់ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ការចោទប្រកាន់និងឃុំខ្លួនសកម្មជនបរិស្ថាន ធ្វើឡើងបន្ទាប់ពីពួកគេធ្វើយុទ្ធនាការដើរថ្មើរជើងពីវត្តភ្នំទៅកាន់ផ្ទះលោកនាយករដ្ឋមន្ត្រី ហ៊ុន សែន ដើម្បីដាក់ញត្តិសុំអន្តរាគមន៍ឱ្យបញ្ឈប់ការលុប«បឹងតាមោក»ទៀត ដោយថា បឹងនោះជាបឹងធម្មជាតិធំជាងគេនិងសល់ចុងក្រោយគេនៅរាជធានីភ្នំពេញ។
គិតត្រឹមខែតុលា ឆ្នាំ២០២១ លោក ថុន រដ្ឋា, កញ្ញា ភួន កែវរស្មី និងកញ្ញា ឡុង គន្ធា បានជាប់ពន្ធនាគារ១ឆ្នាំហើយ។
ក្រោយមក នៅថ្ងៃទី១៦ ខែមិថុនា ឆ្នាំ២០២១ អង្គការសហប្រជាជាតិផ្នែកសិទ្ធិមនុស្សនិងបរិស្ថាន បង្ហាញកង្វល់អំពីការឃុំខ្លួនសកម្មជនបរិស្ថាន និងអំពាវនាវឱ្យរដ្ឋាភិបាលកម្ពុជាគោរពតាមការប្តេជ្ញាចិត្តរបស់ខ្លួនចំពោះសិទ្ធិមនុស្សអន្តរជាតិ ដើម្បីធានាសិទ្ធិសេរីភាពអ្នកការពារសិទ្ធិមនុស្សនិងបរិស្ថាន៕
