សាលាដំបូងខេត្តកំពង់ធំ បានកោះហៅមេភូមិ មេឃុំ និងបក្ខពួកផ្សេងទៀត នៅឃុំពពក ស្រុកស្ទោង ឱ្យឆ្លើយបំភ្លឺពាក់ព័ន្ធការឈូសឆាយដីព្រៃរបស់រដ្ឋធ្វើកម្មករសិទ្ធិដោយខុសច្បាប់។
កាលពីថ្ងៃទី២២ ខែកញ្ញា ឆ្នាំ២០២១ តំណាងអយ្យការអមសាលាដំបូងខេត្តកំពង់ធំ លោក សាយ វាសនា បានចេញដីកាកោះហៅលោក កែវ នន ជាមេឃុំពពក និងលោក ឡេង សុខា ជាមេភូមិក្រសាំង ឱ្យឆ្លើយបំភ្លឺនៅថ្ងៃទី១២ ខែតុលា ឆ្នាំ២០២១ ករណីឈូសឆាយដីព្រៃដើម្បីធ្វើកម្មសិទ្ធិ។
ដីកាបញ្ជាក់ថា កាលពីថ្ងៃទី២៩ ខែឧសភា ឆ្នាំ២០២១ មេភូមិនិងមេឃុំទាំងពីរនាក់នេះបានដាក់គ្រឿងចក្រធ្វើសកម្មភាពលើដីព្រៃរបស់រដ្ឋនៅភូមិក្រសាំង ឃុំពពក ស្រុកស្ទោង ខេត្តកំពង់ធំ។
អ្នកនាំពាក្យ និងជាតំណាងអយ្យការអមសាលាដំបូងខេត្តកំពង់ធំ លោក សាយ វាសនា ប្រាប់ វីអូឌី បន្ថែមថា សមត្ថកិច្ចក៏កំពុងស៊ើបអង្កេតរកអ្នកពាក់ព័ន្ធផ្សេងទៀត ដើម្បីឱ្យឆ្លើយបំភ្លឺផងដែរ។
លោកថា៖ «ពួកគាត់បានឈូសឆាយដីព្រៃ មិនជាដីព្រៃលិចទឹកទេ។ ពាក់ព័ន្ធរឿងនេះ ខ្ញុំមិនអាចប្រាប់បងច្រើនទេ ដោយសារសមត្ថកិច្ចកំពុងស៊ើបអង្កេតរកអ្នកពាក់ព័ន្ធផ្សេងទៀត»។
វីអូឌី មិនអាចរកការឆ្លើយពីមេភូមិនិងមេឃុំដែលរងការចោទប្រកាន់បានទេ នៅថ្ងៃអង្គារនេះ។
មន្ត្រីការពារសិទ្ធិប្រចាំខេត្តកំពង់ធំ លោក សុខ រដ្ឋា មានប្រសាសន៍ថា អាជ្ញាធរមូលដ្ឋានជាអ្នកគ្រប់គ្រងក្នុងដែនសមត្ថកិច្ចរបស់ខ្លួន ក្នុងការការពារធនធានធម្មជាតិនិងទ្រព្យសម្បត្តិសាធារណៈរបស់រដ្ឋឱ្យបានគង់វង្សទៅតាមច្បាប់កំណត់ ដោយមិនអាចផ្ទេរឬទិញលក់បានឡើយ។
មន្ត្រីសិទ្ធិរូបនេះបន្តថា ប្រសិនជាមេភូមិនិងមេឃុំបានគប់គិតគ្នាឈូសឆាយដីព្រៃរបស់រដ្ឋធ្វើជាកម្មសិទ្ធិមែននោះ គឺជាទង្វើខុសច្បាប់។
លោកបន្ថែមថា៖ «បើសិនជាករណីហ្នឹងកើតមានមែន អាហ្នឹងគឺអ្នកដែលបានប្រព្រឹត្តហ្នឹងគួរតែត្រូវបានផ្តន្ទាទោសតាមច្បាប់។ ហើយប្រសិនបើមានការជាប់ពាក់ព័ន្ធជាមួយអាជ្ញាធរមានសមត្ថកិច្ចនៅមូលដ្ឋានទៀត បើត្រូវរ៉ូវគ្នាផ្នែកណាមួយដែលនាំឱ្យមានការបាត់បង់ទ្រព្យសាធារណៈរបស់រដ្ឋ អាហ្នឹងអ្នកទាំងអស់គ្នាហ្នឹងត្រូវចូលរួមទទួលខុសត្រូវចំពោះមុខច្បាប់»៕