អង្គការយូនីសេហ្វប្រចាំកម្ពុជា ព្រមានពីផលប៉ះពាល់ជំងឺកូវីដ-១៩ លើសុខភាពផ្លូវចិត្តរបស់កុមារនិងយុវជននៅកម្ពុជាជាច្រើនឆ្នាំតទៅមុខទៀត។
នៅក្នុងរបាយការណ៍ថ្មីមួយរបស់អង្គការយូនីសេហ្វ ចេញផ្សាយនៅថ្ងៃទី៥ ខែតុលា ឆ្នាំ២០២១ បានឱ្យដឹងថា អង្គការយូនីសេហ្វ និងដៃគូនានារបស់ខ្លួន បានសិក្សាវាយតម្លៃពីផលប៉ះពាល់សេដ្ឋកិច្ចសង្គមក្នុងបរិបទនៃការរីករាលដាលជំងឺកូវីដ-១៩ និងតាមដានសុខុមាលភាពរបស់ប្រជាជនកម្ពុជា ក្នុងចំណោមសូចនាករជាច្រើន។
របាយការណ៍ដដែលបន្តថា ការស្ទង់មតិនេះរកឃើញថា ៤៥% នៃក្មេងជំទង់ដែលត្រូវបានស្ទង់មតិ ចាប់ពីអាយុ១៥ឆ្នាំដល់អាយុ១៩ឆ្នាំ បាននិយាយថា ពួកគេព្រួយបារម្ភអំពីសុវត្ថិភាពរបស់ខ្លួនអំឡុងពេលរីករាលដាលនៃជំងឺកូវីដ-១៩ ខណៈក្មេងជំទង់ ១៦% ផ្សេងទៀតបានលើកឡើងដែរថា ពួកគេមានអារម្មណ៍តឹងតែងក្នុងចិត្តឬធ្លាក់ទឹកចិត្តចាប់តាំងពីវិបត្តិកូវីដ-១៩បានចាប់ផ្ដើមឡើង។
លើសពីនេះ ក្រសួងអប់រំ យុវជន និងកីឡា ក្រុមការងារផ្នែកអប់រំ និងយូនីសេហ្វ បានធ្វើការវាយតម្លៃអំពីតម្រូវការអប់រំរួមគ្នាមួយ បន្ទាប់ពីសាលារៀនទាំងអស់ត្រូវបានបិទនៅឆ្នាំ២០២០ ក្នុងនោះ បើតាមការវាយតម្លៃដោយស្ទង់មតិប្រជាជនកម្ពុជា ចំនួន១៥ពាន់នាក់ រួមទាំងសិស្សានុសិស្ស អ្នកថែទាំ បុគ្គលិកអប់រំ និងអាជ្ញាធរមូលដ្ឋាន បានរកឃើញថា ៥៨% នៃសិស្សវិទ្យាល័យបានរាយការណ៍ថា ពួកគេធ្លាប់មានបញ្ហាផ្លូវចិត្តយ៉ាងហោចណាស់មួយលើក។
បើតាមយូនីសេហ្វ ការស្ទង់មតិ ៤៣% នៃអ្នកចូលរួមការស្ទង់មតិទាំងអស់ យល់ឃើញថា ក្មេងប្រុសនឹងមានហានិភ័យខ្ពស់ពីការប្រើអំពើហិង្សា ការរំលោភបំពាន និងការកេងប្រវ័ញ្ច អំឡុងពេលបិទសាលារៀន ខណៈពេលដែល ៣៦% ផ្សេងទៀតជឿជាក់ថា ក្មេងស្រីក៏នឹងមានហានិភ័យខ្ពស់ដូចគ្នាដែរ។
នាយិកាយូនីសេហ្វប្រចាំកម្ពុជា លោកស្រី ហ្វ័រូហ្គ ហ្វយូហ្សាថ បានលើកឡើងក្នុងបាយការណ៍ថា កុមារនៅកម្ពុជា ក៏ដូចជាកុមារទាំងឡាយនៅលើពិភពលោក បានជួបប្រទះបញ្ហាប្រឈមជាច្រើន អំឡុងពេលនៃវិបត្តិជំងឺកូវីដ-១៩ ស្របពេលសាលារៀនត្រូវបានបិទ ការផ្លាស់ប្ដូរយ៉ាងខ្លាំងនៃការប្រាស្រ័យទាក់ទងក្នុងសង្គម និងផលប៉ះពាល់សេដ្ឋកិច្ចសង្គម ដែលកើតឡើងចំពោះគ្រួសារកម្ពុជា បានធ្វើឱ្យប៉ះពាល់យ៉ាងធ្ងន់ធ្ងរដល់សុខភាពផ្លូវចិត្តរបស់កុមារនិងយុវជន។
លោកស្រី ហ្វ័រូហ្គ ហ្វយូហ្សាថ ថ្លែងបន្តថា៖ «របាយការណ៍សកលនេះបង្ហាញពីសភាពធ្ងន់ធ្ងរនិងស៊ីជម្រៅរបស់បញ្ហានេះ និងស្នើសុំការវិនិយោគ និងការចាត់វិធានការឱ្យបានទាន់ពេលវេលាលើបញ្ហាសុខភាពផ្លូវចិត្ត ដែលនេះគឺជាវិធានការជួយសង្គ្រោះជីវិតមនុស្ស និងការសង្គ្រោះអនាគតរបស់ពួកគេ»។
របាយការណ៍យូនីសេហ្វដដែលថា ពេលជំងឺកូវីដ-១៩កំពុងឈានចូលទៅឆ្នាំទី៣នោះ វាមានផលប៉ះពាល់លើសុខភាពនិងសុខុមាលភាពផ្លូវចិត្តរបស់កុមារនិងយុវជននៅតែបន្តកាន់តែធ្ងន់ធ្ងរទៅៗ ក្នុងនោះ កុមារម្នាក់ក្នុងចំណោម៧នាក់ បានរងផលប៉ះពាល់ដោយផ្ទាល់ពីការបិទខ្ទប់ ខណៈដែលកុមារជាង១,៦ពាន់លាននាក់បានបាត់បង់ការអប់រំ។
របាយការណ៍នេះបានចង្អុលបង្ហាញថា ការរំខានចំពោះទម្លាប់ប្រចាំថ្ងៃ ការអប់រំរៀនសូត្រ ការកម្សាន្ត ព្រមទាំងការព្រួយបារម្ភចំពោះប្រាក់ចំណូលនិងសុខភាពគ្រួសារ កំពុងធ្វើឱ្យយុវជនជាច្រើនមានអារម្មណ៍ភ័យខ្លាច ខឹង និងព្រួយបារម្ភអំពីអនាគតរបស់ពួកគេ។
យូនីសេហ្វ បញ្ជាក់ថា បើទោះបីជាមានកត្តាបង្ការមួយចំនួនដែលអាចជួយកាត់បន្ថយហានិភ័យនៃបញ្ហាផ្លូវចិត្ត ដូចជា ការមានអ្នកថែទាំផ្តល់ក្ដីស្រឡាញ់ បរិស្ថានសាលារៀនមានសុវត្ថិភាព និងទំនាក់ទំនងវិជ្ជមានជាមួយមិត្តភក្តិបានក៏ដោយ ប៉ុន្តែរបាយការណ៍នេះក៏បានព្រមានថា ឧបសគ្គផ្សេងៗដូចជា ការមើលងាយរើសអើងអ្នកដទៃ និងការខ្វះខាតថវិកា កំពុងរារាំងកុមារយ៉ាងច្រើនមិនឱ្យមានសុខភាពផ្លូវចិត្តល្អ ឬទទួលបានការគាំទ្រដែលពួកគេត្រូវការ។
របាយការណ៍ស្តីពី «ស្ថានភាពកុមារពិភពលោកឆ្នាំ២០២១» បានស្នើឱ្យរដ្ឋាភិបាលកម្ពុជា ដៃគូនៅក្នុងវិស័យរដ្ឋនិងឯកជនទាំងអស់ ឱ្យចាត់វិធានការនិងបង្ហាញការប្តេជ្ញាចិត្តដោយភ្ជាប់ទំនាក់ទំនងនិងកិច្ចសន្ទនា ដើម្បីគាំទ្រវិធីសាស្រ្តសង្គមទាំងមូល ក្នុងការលើកកម្ពស់ ការពារ និងថែទាំសុខភាពផ្លូវចិត្ត។
អង្គការចិត្តសង្គម អន្តរវប្បធម៌ ហៅកាត់ថា TPO ឱ្យដឹងថា គិតត្រឹម៧ខែដើមឆ្នាំ២០២១ អ្នកទទួលប្រឹក្សាយោបល់ជាមួយអ្នករកសេវាផ្លូវចិត្ត មិនតិចជាង២ ០០០ករណីឡើយ ក្នុងនោះមិនទាន់រាប់បញ្ចូលករណីប្រឹក្សាយោបល់ក្រៅផ្លូវការមួយចំនួនទៀតផង។
អ្នកជំនាញប្រឹក្សាយោបល់ផ្នែកសុខភាពផ្លូវចិត្តរបស់អង្គការចិត្តសង្គម អន្តរវប្បធម៌ ហៅកាត់ថា TPO អ្នកស្រី ស៊ុន សូលីដា ប្រាប់ វីអូឌី កាលពីថ្ងៃទី៣ ខែសីហា ឆ្នាំ២០២១ ថាវិបត្តិផ្លូវចិត្តរបស់ប្រជាជនកម្ពុជាពិតជាមានការកើនឡើងគួរឱ្យកត់សម្គាល់ប្រាកដមែន ដោយយោងតាមចំនួនពលរដ្ឋដែលបានមកស្វែងរកជំនួយប្រឹក្សាយោបល់ផ្នែកផ្លូវចិត្តក្នុងបរិបទកូវីដ-១៩។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៣ ៩២៤នាក់ ក្នុងនោះ អ្នកជំងឺព្យាបាលជាសះស្បើយចំនួន១០៥ ៧៩៣នាក់ អ្នកស្លាប់កើនដល់ចំនួន២ ៤៣១នាក់ និងករណីនាំចូលពីក្រៅប្រទេសចំនួន១៩ ១៤៥នាក់៕
