ក្រសួងទេសចរណ៍បានបង្ហាញរបាយការណ៍ថា ក្នុងរយៈពេលពីរថ្ងៃនៃថ្ងៃឈប់សម្រាកបុណ្យភ្ជុំបិណ្ឌ មានភ្ញៀវទេសចរចេញដើរលេងកម្សាន្តប្រមាណជិតកន្លះលាននាក់ (៤២ម៉ឺននាក់) ក្នុងនោះ ខេត្តកំពតជាគោលដៅទេសចរណ៍សំខាន់ជាងគេ។
យោងតាមការបូកសរុបរបាយការណ៍ដែលក្រសួងទទួលបានពីមន្ទីរទេសចរណ៍រាជធានី-ខេត្ត គិតត្រឹមថ្ងៃទី៦ ខែតុលា ឆ្នាំ២០២១នេះ បានឱ្យដឹងថា នាថ្ងៃឈប់សម្រាកទីពីរនៃពិធីបុណ្យភ្ជុំបិណ្ឌកាលពីថ្ងៃម្សិលមិញ មានភ្ញៀវទេសចរចេញដើរលេងកម្សាន្តសរុប២៧១ ៤២៨នាក់ ក្នុងនោះមានភ្ញៀវជាតិ២៦៩ ៥១៣នាក់ និងភ្ញៀវបរទេសផ្ទៃក្នុង១ ៩១៥នាក់។ ប្រសិនបើសរុបរយៈពេល២ថ្ងៃនៃថ្ងៃសម្រាកបុណ្យភ្ជុំបិណ្ឌនេះ មានភ្ញៀវទេសចរសរុបចំនួន៤២ម៉ឺននាក់ (៤២០ ៤៤១នាក់) បានចេញដើរលេងកម្សាន្ត។
ក្រសួងទេសចរណ៍បានកត់សម្គាល់ថា តួលេខអ្នកដើរលេងកម្សាន្តនៅថ្ងៃឈប់សម្រាកទី២កាលពីម្សិលមិញនេះ មានការកើនឡើងប្រមាណ៨២,១៥% ធៀបនឹងថ្ងៃទី១។ ក្រសួងបន្តកត់សម្គាល់ថា ចរន្តភ្ញៀវទេសចរនាថ្ងៃភ្ជុំបិណ្ឌម្សិលមិញនេះមានសន្ទុះខ្លាំង ដោយគោលដៅទេសចរណ៍ទូទាំងប្រទេសបានទទួលស្វាគមន៍ភ្ញៀវទេសចរផ្ទៃក្នុងយ៉ាងផុសផុល ពិសេសតំបន់ឆ្នេរសមុទ្រ មានខេត្តកំពត កែប និងខេត្តព្រះសីហនុ និងភាគពាយព្យ និងភាគខាងជើង មានដូចជា ខេត្តពោធិ៍សាត់ បាត់ដំបង សៀមរាប រួមជាមួយខេត្តកំពង់ស្ពឺ និងខេត្តកំពង់ចាម ជាដើម (លើកលែងតែខេត្តកំពង់ឆ្នាំងដែលបន្តផ្អាកដំណើរការរមណីយដ្ឋាន)។
ទន្ទឹមនឹងចរន្តភ្ញៀវទេសចរទូទាំងប្រទេសកើនឡើង គោលដៅទេសចរណ៍មួយចំនួនតូចក៏មានការកកកុញភ្ញៀវទេសចរច្រើន ដូចជា រមណីយដ្ឋានអន្លង់ជ្រៃ ក្នុងស្រុកពញាក្រែក ខេត្តត្បូងឃ្មុំ ដែលបានទទួលហួសសមត្ថភាពផ្ទុកអតិបរមា និងខុសពីវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP)។ ករណីនេះ រដ្ឋបាលខេត្តត្បូងឃ្មុំ មន្ទីរទេសចរណ៍ និងរដ្ឋបាលស្រុកពញាក្រែក បានសម្រេចកាលពីល្ងាចម្សិលមិញឱ្យផ្អាករមណីយដ្ឋានអន្លង់ជ្រៃជាបណ្តោះអាសន្នសិន រង់ចាំការរៀបចំគ្រប់គ្រងឱ្យបានល្អប្រសើរឡើងវិញ៕