រដ្ឋមន្ត្រីក្រសួងសុខាភិបាលបានសម្រេចអនុញ្ញាតឱ្យអ្នកជំងឺកូវីដ-១៩ បំប្លែងខ្លួនថ្មីប្រភេទ ដែលតា (Delta) សម្រាកព្យាបាលនៅផ្ទះ ដោយថា ដើម្បីឆ្លើយតបនឹងការវិវត្តថ្មីនៃសភាពការណ៍ ជំងឺកូវីដ-១៩ និងការរស់នៅក្នុងបរិបទថ្មី។
ក្នុងលិខិតមួយដែលផ្ញើទៅកាន់ប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ថ្នាក់រាជធានី-ខេត្ត កាលពីថ្ងៃទី៥ ខែតុលា ឆ្នាំ២០២១ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានឱ្យដឹងថា ទោះបីក្រសួងសម្រេចឱ្យអ្នកជំងឺកូវីដ-១៩ប្រភេទ ដែលតា សម្រាកព្យាបាលនៅផ្ទះក៏ដោយ ប៉ុន្តែក៏ត្រូវមានការចូលរួមយ៉ាងសកម្មពីអាជ្ញាធរមូលដ្ឋាន និងពង្រឹងវិធានការសុខាភិបាល វិធានការរដ្ឋបាល ឱ្យបានហ្មត់ចត់ផងដែរ។
លើសពីនេះ លោក ម៉ម ប៊ុនហេង ថាអ្នកជំងឺកូវីដ-១៩ប្រភេទ ដែលតា ក៏ត្រូវបានអនុញ្ញាតឱ្យនៅក្នុងមណ្ឌលឬមន្ទីរពេទ្យព្យាបាលជំងឺកូវីដ-១៩ ជាមួយគ្នានឹងអ្នកជំងឺកូវីដ-១៩ប្រភេទ អាល់ហ្វា ដោយពុំចាំបាច់ញែកដាក់ឱ្យនៅដាច់ដោយឡែកពីគ្នាទៀតឡើយ។
លោកថា វិស័យសុខាភិបាលឯកជនស្របច្បាប់ក៏មានសិទ្ធិអាចទទួលអ្នកជំងឺកូវីដ-១៩ប្រភេទ ដែលតា ព្យាបាលបានដែរ។
រដ្ឋមន្ត្រីក្រសួងសុខាភិបាលរូបនេះបន្តថា ចំពោះអ្នកជំងឺកូវីដ-១៩ប្រភេទ ដែលតា ដែលកំពុងសម្រាកព្យាបាលនៅតាមមណ្ឌលឬមន្ទីរពេទ្យព្យាបាលអ្នកជំងឺកូវីដ-១៩ លើសរយៈពេលកំណត់ក្នុងលក្ខខណ្ឌដែលបានចែងនោះ ត្រូវធ្វើតេស្ត PCR ហើយបើទទួលបានលទ្ធផលតេស្តអវិជ្ជមាន នឹងអនុញ្ញាតឱ្យបញ្ចប់ការព្យាបាល។
គិតត្រឹមថ្ងៃទី៥ ខែកញ្ញា ឆ្នាំ២០២១ កម្ពុជារកឃើញវីរុសកូវីដ-១៩ បំប្លែងខ្លួនថ្មីប្រភេទ ដែលតា សរុប២៦៤៧នាក់ហើយ ក្នុងនោះ រាជធានីភ្នំពេញមានចំនួន៩១៤នាក់, ខេត្តបន្ទាយមានជ័យ ៥២៦នាក់, ខេត្តឧត្ដរមានជ័យ ២៤៥នាក់, ខេត្តសៀមរាប ២០៧នាក់, ខេត្តព្រះវិហារ ១០៨នាក់ ខណៈខេត្តផ្សេងចន្លោះពី១០ដល់៦៦នាក់៕