គណបក្សប្រជាធិបតេយ្យមូលដ្ឋាន (គ.ប.ម) បានចេញសេចក្តីថ្លែងការណ៍មួយកាលពីថ្ងៃសុក្រ ដោយជំរុញឱ្យរដ្ឋាភិបាលកម្ពុជាពិចារណាឡើងវិញពីការធ្វើវិសោធនកម្មរដ្ឋធម្មនុញ្ញ ខណៈសេចក្តីព្រាងច្បាប់ ស្តីពី វិសោធនកម្មនេះ បានឆ្លងផុតគណៈរដ្ឋមន្ត្រីទៅហើយ។
តាមរយៈសេចក្តីថ្លែងការណ៍ គណបក្សនៅក្រៅរដ្ឋាភិបាលមួយនេះបានចាត់ទុកថា បញ្ហាសញ្ជាតិនេះ [សេចក្ដីព្រាងច្បាប់ធម្មនុញ្ញ ស្តីពី «វិសោធនកម្មរដ្ឋធម្មនុញ្ញ ដើម្បីកំណត់ថ្នាក់ដឹកនាំជាតិត្រូវមានសញ្ជាតិខ្មែរតែមួយគត់»] គឺជាប្រធានបទសំខាន់មួយដែរ ប៉ុន្តែវាមិនមានភាពចាំបាច់រហូតដល់ធ្វើ «វិសោធនកម្មរដ្ឋធនុញ្ញ» ដែលជាច្បាប់កំពូលរបស់ជាតិនៅពេលនេះទាំងបន្ទាន់នោះទេ។ បើតាមគណបក្សប្រជាធិបតេយ្យមូលដ្ឋានយល់ថា បញ្ហាកូវីដ-១៩ បញ្ហាទឹកជំនន់ទឹកភ្លៀង បញ្ហាគ្រឿងញៀន និងបញ្ហាទំនាស់ដីធ្លីជាដើម គឺជាប្រធានបទសំខាន់ ដែលអ្នកដឹកនាំនយោបាយត្រូវរួមគ្នាប្រកួតប្រជែងគ្នាដោះស្រាយ។
គណបក្សប្រជាធិបតេយ្យមូលដ្ឋាន បានអំពាវនាវឱ្យអ្នកដឹកនាំនយោបាយជើងចាស់ទាំងអស់ បញ្ឈប់នូវការបង្កជម្លោះជាលក្ខណៈបុគ្គល ហើយងាកមកយកចិត្តទុកដាក់ឈ្លោះជជែក ដែលផ្តល់ដំណោះស្រាយពីបញ្ហាជីវភាពរស់នៅរបស់ប្រជាពលរដ្ឋ និងផ្តល់គំរូល្អដល់យុវជនជំនាន់ក្រោយវិញ។
ការអំពាវនាវរបស់គណបក្សប្រជាធិបតេយ្យមូលដ្ឋាននេះ បានធ្វើឡើង ខណៈដែលគណៈរដ្ឋមន្រ្តីបានអនុម័តកាលពីថ្ងៃម្សិលមិញ លើសេចក្ដីព្រាងច្បាប់ធម្មនុញ្ញ ស្តីពី «វិសោធនកម្មមាត្រា១៩ថ្មី មាត្រា៨២ មាត្រា១០៦ថ្មី(មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និង មាត្រា៣និងមាត្រា៤ នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ»។ វិសោធនកម្មនេះ បានដាក់បញ្ចូលកថាខណ្ឌដែលចែងថា «ថ្នាក់ដឹកនាំជាតិ ដែលជាប្រធានព្រឹទ្ធសភា ប្រធានរដ្ឋសភា ប្រធានក្រុមប្រឹក្សាធម្មនុញ្ញ និងនាយករដ្ឋមន្ត្រី ត្រូវមានសញ្ជាតិខ្មែរតែមួយគត់»៕