ជប៉ុនផ្ដល់ជំនួយឥតសំណងនិងឥណទានសម្បទាន៧២,៧២លានដុល្លារដល់កម្ពុជា ដើម្បីពង្រីកសមត្ថភាពផ្គត់ផ្គង់ទឹកស្អាតនិងគម្រោងជាច្រើនទៀត។
ការផ្ដល់ជំនួយនេះបានធ្វើឡើងនៅថ្ងៃទី១១ ខែតុលា ឆ្នាំ២០២១នេះ ក្នុងពិធីចុះហត្ថលេខាមួយនៅឯក្រសួងការបរទេសកម្ពុជា។
ស្ថានទូតជប៉ុនប្រចាំកម្ពុជា បានចុះផ្សាយលើហ្វេសប៊ុករបស់ខ្លួនថា រដ្ឋាភិបាលជប៉ុនបានបន្តផ្ដល់ជំនួយអភិវឌ្ឍន៍ផ្លូវការ (ODA) ជាឥណទានសម្បទានដែលមានទឹកប្រាក់សរុបចំនួន៦ ៣៣៦លានយ៉េន ឬស្មើប្រមាណ៥៧,៦លានដុល្លារ សម្រាប់គម្រោងពង្រីកសមត្ថភាពផ្គត់ផ្គង់ទឹកស្អាតនៅខេត្តសៀមរាប ដំណាក់កាលទី២ និងហិរញ្ញប្បទានឥតសំណង៥គម្រោងដែលមានទឹកប្រាក់សរុបចំនួន១ ៦០០លានយ៉េន ឬស្មើ១៤,៥លានដុល្លារ សម្រាប់កម្មវិធីអភិវឌ្ឍន៍សេដ្ឋកិច្ចនិងសង្គម។
ស្ថានទូតមួយនេះបញ្ជាក់ថា គម្រោងពង្រីកសមត្ថភាពផ្គត់ផ្គង់ទឹកស្អាតខេត្តសៀមរាប ដំណាក់កាលទី២ នឹងបន្តអភិវឌ្ឍបរិក្ខារបូមទឹកឆៅ និងរោងចក្រប្រព្រឹត្តកម្មទឹកស្អាតដែលមានសមត្ថភាពផលិត៦០ ០០០ម៉ែត្រគូបក្នុងមួយថ្ងៃ និងបណ្ដាញចែកចាយទឹកដែលមានប្រវែងលើស២០០គីឡូម៉ែត្រ នៅខេត្តសៀមរាប បន្ទាប់ពីដំណាក់កាលទី១។
ចំណែកគម្រោងកម្មវិធីអភិវឌ្ឍន៍សេដ្ឋកិច្ចនិងសង្គម ជាប្រភេទសម្ភារនិងបរិក្ខារផ្សេងៗនឹងត្រូវផ្តល់ជូនចំនួន៥វិស័យ ដូចជា ការគាំទ្រដំណើរការកសាងផែនការបោសសម្អាតមីន និងត្រួតពិនិត្យគុណភាពលើផ្ទៃដីបោសសម្អាត (Landmine Action Sector) ដែលមានទឹកប្រាក់ចំនួន២០០លានយ៉េន ឬស្មើប្រមាណ១,៨លានដុល្លារ និងសម្ភារបច្ចេកទេសសម្រាប់មន្ទីរពិសោធន៍ជាតិសំណង់ (Construction Material Sector) មានទឹកប្រាក់ចំនួន២៥០លានយ៉េន ឬស្មើប្រមាណ២,៣លានដុល្លារ។
ស្ថានទូតឱ្យដឹងទៀតថា សម្រាប់សម្ភារបច្ចេកទេសសម្រាប់ស្ថានីយវាស់វែងអចិន្ត្រៃយ៍ និងមជ្ឈមណ្ឌលទិន្នន័យ (Cadastral Survey Sector) មានទឹកប្រាក់ចំនួន២៥០លានយ៉េន ឬស្មើប្រមាណ២,៣លានដុល្លារ និងការបំពាក់សម្ភារនិងបរិក្ខារបច្ចេកទេសសម្រាប់គ្រឹះស្ថានអប់រំបណ្ដុះបណ្ដលបច្ចេកទេសនិងវិជ្ជាជីវៈ (Human Resource Development Sector) មានទឹកប្រាក់ចំនួន៤០០លានយ៉េន ឬស្មើ៣,៦លានដុល្លារ។
ចំណែកការបំពាក់សម្ភារនិងបរិក្ខារ និងគ្រឿងម៉ាស៊ីនក្នុងវិស័យឧស្សាហកម្មគ្រឿងយន្ត អេឡិចត្រូនិច និងមេកានិក នៅសាកលវិទ្យាល័យភូមិន្ទភ្នំពេញ (Manufacturing Sector) មានទឹកប្រាក់ចំនួន៥០០លានយ៉េន ឬស្មើប្រមាណ៤,៥លានដុល្លារ។
ស្ថានទូតជប៉ុនប្រចាំកម្ពុជា រំពឹងថា ការផ្ដល់ជំនួយទាំងនេះនឹងចូលរួមចំណែកដល់ការអភិវឌ្ឍវិស័យនីមួយៗនាពេលអនាគត និងការយោគយល់គ្នាទៅវិញទៅមក ក៏ដូចជាការពង្រឹងទំនាក់ទំនងមិត្តភាពរវាងជប៉ុននិងកម្ពុជាផងដែរ៕