នាវាផ្ទុកយន្តហោះថ្មីរបស់ចក្រភពអង់គ្លេស HMS Queen Elizabeth បានឈប់សំចតនៅសិង្ហបុរី កាលពីថ្ងៃចន្ទម្សិលមិញ ដែលជាផ្នែកមួយនៃការបញ្ជាក់ពីអំណាចរបស់ខ្លួនសារជាថ្មីនៅទូទាំងពិភពលោក និងបង្កើនវត្តមានយោធារបស់ខ្លួននៅក្នុងតំបន់អាស៊ី ស្របពេលដែលមានការកើនឡើងនៃការប្រកួតប្រជែងក្នុងចំណោមប្រទេសមហាអំណាចនានា។
ទាក់ទិននឹងសកម្មភាពនេះ មេបញ្ជាការនាវាផ្ទុកយន្តហោះ លោក Steve Moorhouse បានប្រាប់ទីភ្នាក់ងារសារព័ត៌មាន Reuters ឱ្យដឹងថា៖ «ដំណើរទស្សនកិច្ចនាវាផ្ទុកយន្តហោះរបស់យើងនាពេលថ្មីៗនេះ បានគូសបញ្ជាក់ពីសារៈសំខាន់នៃឥណ្ឌូប៉ាស៊ីហ្វិក និងគោលបំណងរបស់ចក្រភពអង់គ្លេសក្នុងការបង្កើនវត្តមានឱ្យបានកាន់តែច្រើនបន្ថែមទៀតនៅក្នុងតំបន់»។
សិង្ហបុរី គឺជាប្រទេសមួយក្នុងចំណោមប្រទេសជាង៤០ ដែលនាវាផ្ទុកយន្តហោះនេះមានវត្តមាន តាមរយៈដំណើរទស្សនកិច្ចឬការធ្វើសមយុទ្ធយោធារួមគ្នា។ នេះបើយោងតាមសេចក្ដីថ្លែងការណ៍មួយរបស់រដ្ឋាភិបាលអង់គ្លេស។
ចក្រភពអង់គ្លេសបច្ចុប្បន្ននេះមាននាវាផ្ទុកយន្តហោះចំនួនពីរគ្រឿង បើប្រៀបធៀបទៅនឹងសហរដ្ឋអាមេរិកដែលមានចំនួន១១ ខណៈដែលនាវា Queen Elizabeth របស់ខ្លួន មានតម្លៃ៤ ០០០លានដុល្លារនេះ គឺជានាវាចម្បាំងដ៏ធំបំផុតដែលត្រូវបានសាងសង់ដោយយោធាអង់គ្លេស។
នាវាផ្ទុកយន្តហោះនេះបានធ្វើដំណើរទៅកាន់ប្រទេសជប៉ុនកាលពីខែមុន ដែលជាការបង្ហាញនៃការចាប់ផ្តើមនូវវត្តមានយោធាជាអចិន្ត្រៃយ៍នៅក្នុងតំបន់ ស្របពេលដែលសហរដ្ឋអាមេរិក អង់គ្លេស និងអូស្ត្រាលី បានព្រមព្រៀងលើកិច្ចព្រមព្រៀងការពារជាតិ (AUKUS)។
ក្នុងរយៈពេលប៉ុន្មានឆ្នាំចុងក្រោយនេះ ប្រទេសចិនបានដាក់ពង្រាយនាវាឆ្មាំសមុទ្រនៅទូទាំងសមុទ្រចិនខាងត្បូង និងបានសាងសង់កោះជាមួយនឹងប្រព័ន្ធមីស៊ីល ក្នុងគោលបំណងដើម្បីទាមទារយកការគ្រប់គ្រងទឹកដីដ៏ធំ ខណៈដែលសកម្មភាពនេះត្រូវបានចាត់ទុកដោយអន្តរជាតិថាជារឿងមិនត្រឹមត្រូវ៕
