វិស្វករផ្នែកនុយក្លេអ៊ែរនៅក្នុងកងទ័ពជើងទឹកអាមេរិកមួយរូបនិងភរិយារបស់ខ្លួន ត្រូវបានចោទប្រកាន់ ពីបទ «លក់ព័ត៌មានសម្ងាត់ទាក់ទងនឹងនាវាមុជទឹក» និងត្រូវបានចាប់ខ្លួនដោយទីភ្នាក់ងារស៊ើបអង្កេតសហព័ន្ធអាមេរិក (FBI)។
យោងតាមក្រសួងយុត្តិធម៌អាមេរិក បានឱ្យដឹងថា លោក Jonathan Toebbe ត្រូវបានរកឃើញថាបានផ្ញើកញ្ចប់មួយដែលមានទិន្នន័យលាក់ការណ៍ឱ្យទៅរដ្ឋាភិបាលបរទេសមួយកាលពីឆ្នាំ២០២០កន្លងទៅ។
ក្រោយមកទៀត លោកបានចាប់ផ្ដើមលក់ព័ត៌មានឱ្យទៅភ្នាក់ងារ FBI លាក់អត្តសញ្ញាណមួយរូបដែលទូទាត់ជារូបិយបណ្ណឌីជីថល Crypto សរុបចំនួន១០ម៉ឺនដុល្លារ។
ឯកសារតុលាការបានបញ្ជាក់ថា ព័ត៌មានសម្ងាត់ស្តីពីការសាងសង់ម៉ាស៊ីនប្រតិកម្មនុយក្លេអ៊ែររបស់នាវាមុជទឹកមួយផ្នែក ត្រូវបានវិស្វករទ័ពជើងទឹកអាមេរិករូបនេះដាក់លាក់នៅក្នុងកាត SD និងបង្កប់នៅក្នុងនំប៉័ងដាក់សាច់ និងមួយផ្នែកទៀតដាក់នៅក្នុងប្រអប់ស្ករកៅស៊ូ រួចយកទៅរដ្ឋវើជីញ៉ាខាងលិច (West Virginia)។
អាជ្ញាធរបានបន្ថែមថា ប្ដីប្រពន្ធទាំងពីរនាក់នេះត្រូវបានចាប់ខ្លួនអំឡុងពេលដែលពួកគេធ្វើសកម្មភាពដាក់កញ្ចប់ព័ត៌មានសម្ងាត់ក្នុងរដ្ឋវើជីញ៉ាខាងលិច ខណៈដែលពួកគេត្រូវបានចោទប្រកាន់ពីការរំលោភបំពានច្បាប់ថាមពលអាតូមិក (Atomic Energy Act)៕
