អាជ្ញាធរខេត្តកោះកុង ប្រកាសឱ្យប្រជាពលរដ្ឋជាង៨០០គ្រួសារដែលកំពុងមានវិវាទដីធ្លីជាមួយក្រុមហ៊ុន ញូញៀន (Union Development Group ឬ UDG) ទៅចាប់ឆ្នោតយកដីឡូត៍ ខណៈពលរដ្ឋមួយចំនួនទៀតមិនព្រមទទួលយកការដោះស្រាយនេះ។
កាលពីថ្ងៃទី២៨ ខែកញ្ញា ឆ្នាំ២០២១ រដ្ឋបាលខេត្តកោះកុង បានប្រកាសអំពីដំណើរការដោះស្រាយវិវាទដីធ្លីជូនពលរដ្ឋចំនួន៣ប្រភេទ មានប្រមាណ១ ៣៣៣គ្រួសារ ដែលកំពុងរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន ញូញៀន ស្ថិតនៅស្រុកបទុមសាគរ និងស្រុកគិរីសាគរ។ នៅថ្ងៃទី១២ ខែតុលានេះ រដ្ឋបាលខេត្តបានប្រកាសឱ្យប្រជាពលរដ្ឋប្រភេទទី៣ ប្រមាណ៨៣១គ្រួសារ ឱ្យទៅចាប់ឆ្នោតយកដីឡូត៍ ខណៈប្រជាពលរដ្ឋប្រភេទទី១ និងប្រភេទទី២ នឹងជូនដំណឹងពេលក្រោយទៀត។
រដ្ឋបាលខេត្តបញ្ជាក់ថា ប្រជាពលរដ្ឋប្រភេទទី១ ជាប្រជាពលរដ្ឋរស់នៅក្នុងទីតាំងវិនិយោគរបស់ក្រុមហ៊ុន មានចំនួន២៤៧គ្រួសារ ខណៈប្រជាពលរដ្ឋប្រភេទទី២ ជាប្រជាពលរដ្ឋរស់នៅខុសមូលដ្ឋានឬខុសភូមិឃុំ មានចំនួន២៥៥គ្រួសារ និងប្រភេទទី៣ ជាប្រជាពលរដ្ឋស្នើសុំគោលនយោបាយបន្ថែម ចំនួន៨៣១គ្រួសារ។
បើតាមរដ្ឋបាលខេត្តនេះ ប្រជាពលរដ្ឋប្រភេទទី៣ ជាអ្នករស់នៅឃុំកោះស្ដេច និងឃុំភ្ញីមាស ត្រូវទៅចាប់ឆ្នោតនៅថ្ងៃទី១៤ ខែតុលា ឆ្នាំ២០២១ ចាប់ពីម៉ោង៨កន្លះព្រឹក នៅទីតាំងដីឡូត៍ ស្ថិតនៅភូមិទួលពោធិ៍ ឃុំតានូន ស្រុកបទុមសាគរ ខណៈពលរដ្ឋនៅឃុំតានូនចាប់ឆ្នោតនៅថ្ងៃទី១៥ ខែតុលា ចាប់ពីម៉ោង៨កន្លះ និងនៅទីតាំងឃុំតានូនដូចគ្នា។
ករណីអាជ្ញាធរខេត្តកោះកុងបើកដំណើរការដោះស្រាយវិវាទដីធ្លីជូនប្រជាពលរដ្ឋដែលកំពុងរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន ញូញៀន នេះ គឺមានពលរដ្ឋមួយចំនួន ជាពិសេសប្រជាពលរដ្ឋដែលមានវិវាទប្រភេទលេខ១ និងប្រភេទលេខ២ បានបដិសេធមិនទទួលយកការដោះស្រាយនេះទេ ដោយថា ការដោះស្រាយនោះមិនមានតម្លាភាព។
លោក សម ធី រស់នៅឃុំតានូន បានបង្ហាញការខកចិត្តចំពោះអាជ្ញាធរដែលចាត់លោកចូលក្រុមពលរដ្ឋប្រភេទទី៣ ខណៈលោកបានប៉ះពាល់ដីទំហំ៩ហិកតា ប៉ុន្តែអាជ្ញាធរដោះស្រាយដោយផ្ដល់ដីត្រឹមតែ១ហិកតា និងថវិកាជាង៤០០ដុល្លារ។
ពលរដ្ឋរូបនេះបន្តថា លោកមិនអាចទទួលយកការដោះស្រាយនេះបានទេ ហើយថា លោកនឹងជួបចរចាជាមួយក្រុមការងារដោះស្រាយនេះម្តងទៀត ដើម្បីទទួលបានសំណងសមរម្យជាងនេះ។
លោកបន្ថែមថា៖ «ខ្ញុំម៉េចព្រមទទួលយក បើខ្ញុំមានឯកសារគ្រប់គ្រាន់ បើខ្ញុំអត់មានឯកសារដូចពួកគេអ្នកទទួលយកទាំងអស់ហ្នឹង ខ្ញុំព្រមព្រៀងយកហើយ។ អ្នកទទួលយកនោះ គេមិនដែលតវ៉ាទាមទារផង ឱ្យគេ១ហិកតាដែរ។ ដល់ពេលខ្ញុំទាមទាររយៈពេល១៣ឆ្នាំហើយ ឱ្យខ្ញុំ១ហិកតាដែរ។ បើខ្ញុំចេះយក ខ្ញុំយកយូរហើយ ខ្ញុំមើលវាអយុត្តិធម៌សម្រាប់អ្នកដែលបានតវ៉ាណាស់។ នៅថ្ងៃទី១៤ តុលានេះ ខ្ញុំជួបជាមួយលោក ទេព ធន ជជែកគ្នារឿងដីដែលខ្ញុំសល់ហ្នឹង ប្រសិនបើគាត់អត់មានការឆ្លើយតបរបៀបណា ខ្ញុំនឹងមាននីតិវិធីខ្ញុំធ្វើអ្វីបន្តទៀត»។
អ្នកស្រី សាំង ពុយ ជាប្រជាពលរដ្ឋរស់នៅឃុំកោះស្ដេច ស្រុកគិរីសាគរ បានឱ្យដឹងថា គ្រួសារអ្នកស្រីមានដីទំហំ៨ហិកតា ខណៈម្ដាយអ្នកស្រីមានដីទំហំ១២ហិកតា ដែលបានរងផលប៉ះពាល់ដោយគម្រោងក្រុមហ៊ុន ញូញៀន។ អ្នកស្រីថា គ្រួសារអ្នកស្រីជាប្រភេទប្រជាពលរដ្ឋលេខទី២។ អ្នកស្រីបន្តថា ជុំវិញដំណើរការដោះស្រាយផលប៉ះពាល់ដីធ្លីនេះ គឺរហូតមកដល់ពេលនេះ អាជ្ញាធរមិនទាន់បានទាក់ទងអ្នកស្រី ដើម្បីសួរនាំនៅឡើយទេ។
ពលរដ្ឋរូបនេះបន្ថែមថា ដំណោះស្រាយដែលពួកគាត់ចង់បាន គឺសុំផ្ដល់សំណងទៅតាមទំហំដីប៉ះពាល់ជាក់ស្តែង ដោយសារដីរបស់អ្នកស្រីមានបណ្ណកម្មសិទ្ធិស្របច្បាប់។
អ្នកស្រីបន្ថែមថា៖ «ខ្ញុំធ្លាប់បានសំណូមពរច្រើនលើកច្រើនសារហើយ ឱ្យដោះស្រាយតាមទំហំដីជាក់ស្តែង តាមស្ថានភាព តាមភូមិសាស្ត្រ តាមការកាន់កាប់។ ហើយមួយទៀត ការដោះស្រាយនេះអត់មានការជួបប្រជុំឬពិភាក្សាជាមួយប្រជាពលរដ្ឋដែលរងផលប៉ះពាល់ផ្ទាល់ទេ គឺមកដល់គាត់ប្រកាសអ៊ីចឹងតែម្តង អត់មានជួបជុំឬបង្ហាញដីដែលត្រូវដោះដូរហ្នឹងទេ»។
អ្នកស្រី ព្រាប រដ្ឋា នៅឃុំព្រែកខ្សាច់ ដែលមានដីលំនៅឋាននិងចម្ការត្រឹមតែជាង៦០អា និយាយថា អ្នកស្រីមិនព្រមចាកចេញពីភូមិចាស់ដែលកំពុងរស់នៅបច្ចុប្បន្ននេះទេ ដោយសារបារម្ភខ្លាចជួបការលំបាកនិងបាត់បង់មុខរបរ ខណៈប្រជាពលរដ្ឋមួយចំនួនដែលទទួលបានការដោះស្រាយនាពេលកន្លងមក បានជួបការលំបាកដោយបាត់បង់មុខរបរនិងធ្លាក់ចុះនូវជីវភាព ហើយពួកគេបានត្រលប់មកប្រកបរបរកស៊ីនៅភូមិចាស់វិញ។
អ្នកស្រីបន្ថែមថា៖ «ខ្ញុំអត់ព្រម ដោយសារខ្ញុំស្រឡាញ់ទីតាំងរបស់ខ្ញុំ ខ្ញុំចង់រកអ្វីក៏បាន។ មួយទៀត ខ្ញុំឃើញគំរូចាស់របស់អ្នកភូមិនៅឃុំភ្ញីមាស ដែលគាត់ទៅហើយ ហើយគាត់បានត្រលប់មករកស៊ីកន្លែងចាស់វិញ ដែលពីមុនពួកគាត់ក៏គេឱ្យដី២ហិកតានិងលុយខ្លះអ៊ីចឹងដែរ ហើយគេធ្វើទាំងផ្ទះឱ្យនៅទៀត។ ប៉ុន្តែនៅតែមានពលរដ្ឋខ្លះមករកស៊ីកន្លែងចាស់ទៀត ហើយជីវភាពរបស់ពួកគាត់ធ្លាក់ខ្លាំងមែនទែន»។
អភិបាលរង និងជាអ្នកនាំពាក្យរដ្ឋបាលខេត្តកោះកុង លោក សុខ សុទ្ធី មានប្រសាសន៍ថា សម្រាប់ប្រជាពលរដ្ឋប្រភេទទី១និងទី២ អាជ្ញាធរនឹងដោះស្រាយនៅពេលក្រោយបន្តបន្ទាប់ទៀត។
លោកបន្តថា ចំពោះពលរដ្ឋណាមិនពេញចិត្តនិងមិនទទួលយកសំណងនៃការដោះស្រាយនេះ ជារឿងរបស់ពួកគេ ពីព្រោះការដោះស្រាយនេះជាគោលនយោបាយរបស់រដ្ឋាភិបាល។
លោកបន្ថែមថា៖ «វាជាធម្មតាទេ អ្នកថាមិនចង់បាន ចេះតែថាមិនចង់បានទៅ។ តែការដោះស្រាយនេះ ជាគោលនយោបាយរបស់ដ្ឋាភិបាល»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ការដោះស្រាយនេះ អាជ្ញាធរបានកំណត់ទៅលើអាទិភាពចំនួន៣ ដោយអាទិភាពទី១ ទទួលបានដី៣ហិកតាកន្លះ និងលុយជាង៩ ០០០ដុល្លារ, ទី២ ទទួលបាន២ហិកតា និងទី៣ អ្នកដែលទទួលបានសំណងហើយ គឺទទួលបានដី១ហិកតា។
មន្ត្រីសិទ្ធិមនុស្សរូបនេះបន្តថា ការកំណត់លក្ខខណ្ឌឱ្យពលរដ្ឋទទួលបានសំណងដូចៗគ្នាបែបនេះ ខណៈពលរដ្ឋខ្លះមានដីក្នុងទំហំដ៏ច្រើននោះ គឺមិនមានតម្លាភាពឡើយ ហើយថា ពលរដ្ឋភាគច្រើន នឹងមិនទទួលយកការដោះស្រាយបែបនេះឡើយ។ លោកបានស្នើដល់អាជ្ញាធរពាក់ព័ន្ធពិចារណាក្នុងការដោះស្រាយជូនពលរដ្ឋឡើងវិញ ដោយជួបពិភាក្សាជាមួយក្រុមហ៊ុននិងប្រជាពលរដ្ឋ ធ្វើការដោះស្រាយទៅតាមទំហំដីជាក់ស្តែងរបស់ប្រជាពលរដ្ឋនីមួយៗ។
របាយការណ៍និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ រកឃើញថា គម្រោងផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនចិននេះ បានធ្វើឱ្យប្រជាពលរដ្ឋចំនួន១ ១៤៣គ្រួសារ ត្រូវបង្ខំឱ្យបោះបង់ចោលដីធ្លីប្រមាណជាង១ម៉ឺនហិកតា និងផ្ទះ១ ៥០០ខ្នងត្រូវបង្ខំឱ្យរុះរើនិងឈូសឆាយ៕
