ម្ដាយកុមារា កាក់ សុវណ្ណច័្ឆយ បង្ហាញការសោកស្ដាយ ដែលចៅក្រមសាលាដំបូងរាជធានីភ្នំពេញ លើកពេលប្រកាសសាលក្រមកូនប្រុសទៅថ្ងៃក្រោយវិញនិងដោយមិនកំណត់ ក្រោមហេតុផលចៅក្រមជាប់រវល់ប្រជុំ។
ម្ដាយកុមារា កាក់ សុវណ្ណច័្ឆយ គឺអ្នកស្រី ព្រំ ចាន់ថា បានចាត់ទុកការប្រកាសលើកពេលរបស់តុលាការក្រុងភ្នំពេញ នៅថ្ងៃនេះថា ធ្វើឱ្យអ្នកស្រីបាក់ទឹកចិត្ត និងចាត់ទុកជាការគំរាមកំហែងបំបាក់ស្មារតីគ្រួសាររបស់អ្នកស្រី ខណៈស្វាមីរបស់អ្នកស្រី គឺលោក កាក់ កុម្ភារ ដែលជាអតីតសកម្មជនបក្សប្រឆាំង ក៏កំពុងជាប់ពន្ធនាគារព្រៃសផងដែរ។
អ្នកស្រីថា៖ «សាលក្រមគេលើកទៀត ខ្ញុំមិនដឹងថាតុលាការមាននីតិវិធីយ៉ាងម៉េចទៀត ខ្ញុំអត់ដឹងទេ! ឥលូវខ្ញុំមានអារម្មណ៍សោកស្ដាយនិងខកចិត្តខ្លាំងណាស់ ដោយសារខ្ញុំគិតថា គេនឹងកាត់តម្រឹម ដោះលែងកូនខ្ញុំនៅថ្ងៃនេះ ប៉ុន្តែឥលូវអវិជ្ជមានទៀតហើយ»។
អ្នកស្រីបន្តថា កូនប្រុសរបស់អ្នកស្រីកំពុងមានជំងឺអូទីហ្សឹម ហើយអំឡុងពេលជាប់ឃុំនៅក្នុងពន្ធនាគារនោះ កូនរបស់អ្នកស្រីភ្លេចភ្លាំងច្រើន ដោយសារដេកមិនលក់ ហើយខ្លួនប្រាណចេញរមាស់ពេញខ្លួនថែមទៀតផង។
ការខកចិត្តនេះ ធ្វើឡើងក្រោយពេលចៅក្រមសាលាដំបូងរាជធានីភ្នំពេញបានបើកសវនាការលើសំណុំរឿងកុមារា កាក់ សុវណ្ណច័្ឆយ កាលពីថ្ងៃទី២៩ ខែកញ្ញា ឆ្នាំ២០២១ ដោយសម្រេចថានឹងប្រកាសសាលក្រមនៅរសៀលថ្ងៃទី១៣ ខែតុលានេះ។
វីអូឌី មិនអាចទាក់ទងសុំការបញ្ជាក់បន្ថែមពីលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបានទេ នៅថ្ងៃពុធនេះ។
តែយ៉ាងណាក្ដី មេធាវីការពារក្ដីឱ្យកុមារា កាក់ សុវណ្ណច្ឆ័យ គឺលោក សំ សុគង់ មានប្រសាសន៍ថា តុលាការបានលើកពេលប្រកាសសាលក្រមកូនក្ដីរបស់លោកទៅថ្ងៃក្រោយ ដោយសារចៅក្រមជាប់ប្រជុំ ហើយតុលាការក៏មិនបានកំណត់ពេលវេលាជាក់លាក់ថានឹងប្រកាសសាលក្រមជាថ្មីនៅថ្ងៃណានោះទេ។
លោកថា៖ «វាប៉ះពាល់សិទ្ធិជនជាប់ចោទ នៅពេលដែលគាត់ត្រូវទទួលដំណឹងពីការសម្រេចផ្ដន្ទាទោសឬមិនផ្ដន្ទាទោសគាត់ក្រោយពេលសវនាការ។ ណាមួយកូនក្ដីខ្ញុំជាអនីតិជន ហើយគាត់មានជំងឺអូទីហ្សឹមផង ហើយការឃុំខ្លួនគាត់មានរយៈពេលជាង៤ខែហើយ។ អ៊ីចឹងតាមគោលការណ៍នៃក្រមនីតិវិធីព្រហ្មទណ្ឌ គឺការឃុំខ្លួនអនីតិជនមិនឱ្យលើសពី៣ខែទេ»។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា ការបន្តឃុំខ្លួនបណ្ដោះអាសន្ននៅពន្ធនាគារ និងការពន្យារពេលប្រកាសសាលក្រមនេះ បានធ្វើឱ្យប៉ះពាល់សិទ្ធិរបស់កុមារដែលមានចែងនៅក្នុងច្បាប់ជាតិនិងអន្តរជាតិ។
លោកស្រីថា៖ «យើងត្រូវធានាដល់ការការពារនូវឧត្ដមផលប្រយោជន៍សម្រាប់កុមារផង ហើយសិទ្ធិទទួលបានការជំនុំជម្រះដោយយុត្តិធម៌ផង។ អ៊ីចឹងការបន្តក្នុងការពន្យារពេល ទាំងការដាក់ឱ្យស្ថិតនៅក្នុងការឃុំខ្លួនបណ្ដោះអាសន្ន និងការពន្យារពេលប្រកាសនូវសាលក្រមនេះ ដូចពាក្យស្លោកយើងហៅថា “ការពន្យារពេលនៃការផ្ដល់យុត្តិធម៌ គឺជារឿងអយុត្តិធម៌បាត់ហើយ”»។
កុមារា កាក់ សុវណ្ណច្ឆ័យ ត្រូវបានសមត្ថកិច្ចកម្ពុជាចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១ ក្រោមការចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ» បន្ទាប់ពីកុមារអាយុក្រោម១៨ឆ្នាំរូបនេះបានបង្ហោះសាររិះគន់រដ្ឋាភិបាលតាមប្រព័ន្ធតេឡេក្រាម។
កុមារ កាក់ សុវណ្ណច្ឆ័យ ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្តងរួចមកហើយកាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែកុមារារូបនោះត្រូវបានសមត្ថកិច្ចដោះលែងវិញ ក្រោយសាកសួរអស់រយៈពេល៤៨ម៉ោង។
ក្រោយពីសមត្ថកិច្ចដោះលែងរួច ប៉ុន្មានខែក្រោយមក កុមារា កាក់ សុវណ្ណច្ឆ័យ ត្រូវបានជនមិនស្គាល់មុខលួចវាយពីក្រោយបណ្ដាលឱ្យបែកក្បាលដេរ២០ថ្នេរ។ ប៉ុន្តែជាច្រើនខែមកនេះ សមត្ថកិច្ចនៅមិនទាន់រកឃើញមុខជនដៃដល់ ដើម្បីយកមកផ្ដន្ទាទោសនៅឡើយទេ៕