មេដឹកនាំកូរ៉េខាងជើង លោក គីម ជុងអ៊ុន កាលពីថ្ងៃចន្ទកន្លងទៅ បានថ្លែងការពារការអភិវឌ្ឍអាវុធរបស់ប្រទេសខ្លួន។
ប្រព័ន្ធផ្សព្វផ្សាយរដ្ឋ បានស្រង់សម្ដីមេដឹកនាំរូបនេះដែលបានលើកឡើងថា វាគឺជាការចាំបាច់ក្នុងការបង្កើនវិស័យយោធារបស់កូរ៉េខាងជើង ដើម្បីការពារខ្លួនក្នុងការប្រឈមមុខទៅនឹងគោលនយោបាយអរិភាពពីសហរដ្ឋអាមេរិក និងកូរ៉េខាងត្បូង។
ការលើកឡើងរបស់លោក គីម ជុងអ៊ុន នេះ ត្រូវបានធ្វើឡើងនៅក្នុងសុន្ទរកថាមួយនៅឯពិព័រណ៍អភិវឌ្ឍន៍ផ្នែកការពារជាតិ កាលពីថ្ងៃចន្ទ។ នេះបើយោងតាមរបាយការណ៍មួយរបស់ទីភ្នាក់ងារព័ត៌មាន KCNA។
ជាមួយគ្នានេះ រូបភាពមួយចំនួនក្នុងកាសែតរបស់គណបក្សកាន់អំណាចកូរ៉េខាងជើង ក៏បានបង្ហាញពីសកម្មភាពដែលលោក គីម ជុងអ៊ុន ឈរនៅក្បែរមីស៊ីលផ្លោងឆ្លងទ្វីបដ៏ធំបំផុតរបស់ប្រទេសខ្លួនផងដែរ។
ទាក់ទិននឹងករណីនេះ អ្នកនាំពាក្យក្រសួងការពារជាតិកូរ៉េខាងត្បូងមួយរូបបានថ្លែងឱ្យដឹងថា ពួកគេកំពុងតែតាមដានស្ថានការណ៍នេះយ៉ាងដិតដល់។
គួរបញ្ជាក់ថា ប្រទេសកូរ៉េខាងត្បូង កាលពីពេលថ្មីៗនេះក៏បានបាញ់បង្ហោះសាកល្បងកាំជ្រួចមីស៊ីលផ្លោងចេញពីនាវាមុជទឹកជាលើកដំបូង និងបានទិញយន្តហោះចម្បាំង F-35 ផលិតដោយអាមេរិកផងដែរ។
សហរដ្ឋអាមេរិក ក៏ធ្លាប់បានលើកឡើងឱ្យដឹងផងដែរថា ខ្លួនត្រៀមខ្លួនរួចជាស្រេចក្នុងការចរចាការទូតណាមួយជាមួយទីក្រុងព្យុងយ៉ាង៕
