ក្រុមហ៊ុន Facebook Inc នឹងធ្វើការកំណត់សកម្មជននិងអ្នកសារព័ត៌មាននានាជាបុគ្គលសាធារណៈ ក៏ដូចជាបង្កើនការការពារប្រឆាំងនឹងការយាយីនិងការបៀតបៀនចំពោះក្រុមមនុស្សទាំងនេះផងដែរ។ នេះបើតាមប្រធានផ្នែកសុវត្ថិភាពសកលរបស់ក្រុមហ៊ុនបណ្ដាញសង្គមមួយនេះ ដែលបានឱ្យដឹងនៅក្នុងបទសម្ភាសន៍មួយនៅសប្ដាហ៍នេះ។
ក្រុមហ៊ុនដដែលបន្តថា ការសម្រេចផ្លាស់ប្តូរវិធីសាស្រ្តរបស់ខ្លួន ដើម្បីការពារអ្នកសារព័ត៌មាននិងអ្នកការពារសិទ្ធិមនុស្សពីការយាយីនេះ គឺដោយសារតែពួកគេយល់ថា ក្រុមមនុស្សទាំងនេះស្ថិតនៅក្នុងក្រសែភ្នែកសាធារណៈតាមរយៈការងារជាច្រើនរបស់ពួកគេ។
គួរបញ្ជាក់ថា ហ្វេសប៊ុកស្ថិតក្រោមការត្រួតពិនិត្យយ៉ាងទូលំទូលាយពីអ្នកតាក់តែងច្បាប់និងនិយ័តករនានាទូទាំងពិភពលោក ជុំវិញការអនុវត្តការសម្របសម្រួលមាតិកានិងផលប៉ះពាល់ដែលភ្ជាប់ទៅនឹងវេទិការបស់ខ្លួន។
ទោះជាយ៉ាងណាក៏ដោយ របៀបដែលហ្វេសប៊ុកចាត់ទុកបុគ្គលសាធារណៈនិងមាតិកាដែលបង្ហោះដោយឬអំពីក្រុមមនុស្សទាំងនេះ គឺជាប្រធានបទនៃការជជែកវែកញែកយ៉ាងសំខាន់មួយ។
ហ្វេសប៊ុកក៏ធ្វើឱ្យមានភាពខុសគ្នារវាងបុគ្គលសាធារណៈនិងបុគ្គលឯកជននៅក្នុងការការពារដែលខ្លួនផ្ដល់ជូនសម្រាប់ការពិភាក្សាតាមប្រព័ន្ធអនឡាញផងដែរ។
ប្រធានផ្នែកសុវត្ថិភាពសកលរបស់ក្រុមហ៊ុនហ្វេសប៊ុក អ្នកស្រី Antigone Davis បានថ្លែងឱ្យដឹងថា ក្រុមហ៊ុនក៏កំពុងពង្រីកការកំណត់ប្រភេទនៃការវាយប្រហារមួយចំនួនដែលនឹងមិនអនុញ្ញាតឱ្យបង្ហាញជាសាធារណៈនៅលើគេហទំព័ររបស់ខ្លួន ខណៈដែលនេះជាផ្នែកមួយដើម្បីកាត់បន្ថយការវាយប្រហារចំពោះស្ត្រី ជនជាតិស្បែកខ្មៅ និងសហគមន៍អ្នកស្រឡាញ់ភេទដូចគ្នា (LGBTQ) ជាដើម។
ជាមួយគ្នានេះ ហ្វេសប៊ុកក៏នឹងមិនអនុញ្ញាតឱ្យមានមាតិកាបែបអាសអាភាសធ្ងន់ធ្ងរ រូបភាព ឬគំនូរកាត់តបែបអាសអាភាស ឬការវាយប្រហារអវិជ្ជមានដោយផ្ទាល់លើរូបរាងរបស់មនុស្សម្នាក់ផងដែរ៕