ផ្ទះ​ពលរដ្ឋ​១០​គ្រួសារ​នៅ​សង្កាត់​បាក់ខែង​លិចទឹក​ដោយសារ​ចាក់​ដី​លុប​ព្រែក

កូនប្រុសរបស់អ្នកស្រី ប៉ិច ចាន់ណា អុំទូកសំដៅទៅផ្ទះរបស់គាត់ដែលត្រូវបានជន់លិចខ្លាំង ដោយអះអាងថាក្រោយការចាក់ដីលុបព្រែកក្បែរនោះ ថ្ងៃទី១០ ខែតុលា ឆ្នាំ២០២១។ (ហ៊ន ថូវ៉ាន)

ពលរដ្ឋចំនួន១០គ្រួសារនៅសង្កាត់បាក់ខែង​ ខណ្ឌជ្រោយចង្វារ រាជធានីភ្នំពេញ​ កំពុងស្វែងរកអន្តរាគមន៍ពីអាជ្ញាធរពាក់ព័ន្ធ ដោយអះអាងថា ផ្ទះរបស់ពួកគាត់លិចដោយទឹកភ្លៀងជាងកន្លះខែមកហើយ ក្រោយពី​អាជ្ញាធរចាក់ដីលុបព្រែកដែលជាផ្លូវទឹកមួយកន្លែងនៅក្បែរនោះ។​

ប្រជាពលរដ្ឋម្នាក់ដែលរងការលិចលង់ផ្ទះខ្លាំងជាងគេក្នុងចំណោមពលរដ្ឋជាង១០គ្រួសារ អ្នក​ស្រី ប៉ិច ចាន់​ណា​ វ័យ​៥០ឆ្នាំ ឱ្យដឹ​ង​ថា​ គាត់​និង​គ្រួសារ​រស់នៅទីនោះអស់រយៈពេលជាង​២០ឆ្នាំមក​ហើយ មិន​ដែល​មាន​បញ្ហា​លិច​លង់​ធ្ងន់ធ្ងរបែបនេះពីមុនមកនោះទេ។ អ្នកស្រីថា បន្ទាប់ពីមានការចាក់ដីលុបព្រែកជីកដែលនៅក្បែរនោះកាលពីអំឡុងខែសីហាកន្លងមក ផ្ទះអ្នកស្រីនិងប្រជាពលរដ្ឋផ្សេងទៀតក៏ចាប់ផ្ដើមទទួលរងការលិចលង់តែម្ដង។

អ្នកស្រីនិយាយថា៖ «មកនៅកន្លែងនេះយូរហើយ មិនដែលមាន​បញ្ហាឬ​ក៏លិច​លង់​អី​ដូចពេល​នេះ​ទេ វាលិច​ដែរ​ តែ​លិច​ដោយសារទឹកជំនន់មកពីទន្លេធំ​។ ហើយបើលិចដោយសារភ្លៀង គឺ​លិចតិចតួច ជិះ​ម៉ូតូ​បាន ព្រោះតែពេលភ្លៀងមក ទឹកវាហូរចូលក្នុងព្រែកហ្នឹង។ ហើយបើចាក់លុបអ៊ីចឹង​ វាហូរទៅ​ណាបាន គឺដក់នៅកន្លែងហ្នឹងហើយ»។

អ្នកស្រីបន្តថា ក្រុម​គ្រួសាររបស់គាត់ត្រូវ​ជញ្ជូន​អីវ៉ាន់​ទាំង​ម៉ោង​១២​យ​ប់ ថ្ងៃទី៦ ខែតុលា ចំពេល​ថ្ងៃភ្ជុំ ដើម្បី​ទៅរកទីទួល​មានសុវត្ថិភាពបណ្ដោះអាសន្ន ព្រោះភ្លៀង​ធ្លាក់ធ្វើឱ្យផ្ទះគាត់កន្លែងខ្លះលិចត្រឹម​ក និង​កន្លែងខ្លះលិចត្រឹមចង្កេះ​ មិនអាចស្នាក់នៅកើត។​

អ្នកស្រីបន្ថែមថា៖ «ភ្ជុំនេះមិនបានទៅវត្តនឹង​គេទេ រវល់តែជញ្ជូនសម្បុកសម្បត្តិទៅដាក់លើគោក បើមិនអ៊ីចឹង​អណ្ដែតអស់ហើយ។ ខំទិញនំអន្សមគេមកយកទុក​ទៅវ​ត្តអស់បីបួនម៉ឺ​ន មាន​បានទៅឯណា បើលិចផ្ទះអស់ហើយ ដូនតាឆ្នាំនេះគ្មានបានអីទេ»។

ផ្ទះរបស់ពលរដ្ឋម្នាក់ដែលត្រូវបានជន់លិចខ្លាំង ដោយអះអាងថាក្រោយការចាក់ដីលុបព្រែកក្បែរនោះ ថ្ងៃទី១០ ខែតុលា ឆ្នាំ២០២១។ (ហ៊ន ថូវ៉ាន)

ពលរដ្ឋម្នាក់ទៀតដែលរស់នៅទីនោះដែរ លោក យឹង គឹមយ៉េន វ័យ៤៦ឆ្នាំ ឱ្យដឹងថា គាត់បានប្រឹងប្រែងស្វែងរកការអន្តរាគមន៍ពីមន្ត្រីពាក់ព័ន្ធឱ្យដោះស្រាយបញ្ហាទឹកលិចនេះ ប៉ុន្តែហាក់​មិនមានការយកចិត្តទុកដាក់ទេ។​

លោកនិយាយថា៖ «ទាក់ទងទៅគេបួនដប់ដងហើយ គេថាចាំគេប្រាប់ថ្នាក់លើឱ្យ​ ហើយ​ក៏ស្ងាត់​អ៊ីចឹង​ទៅ។ បើអ្នកខ្លះថាជាប់ប្រជុំ ប្រជុំនោះប្រជុំពេកហើយ។ ម្សិលមិញក៏ខលទៅ ថ្ងៃនេះក៏ខលទៅ តែគ្មានអ្នកណាមកមើលសោះ»។

ម្ដាយរបស់​លោក យឹង គឹមយ៉េន គឺអ្នកស្រី ហៃ គឹមហឿន ដែលមានវ័យ៦០ឆ្នាំ បានសម្ដែងការ​ព្រួយបារម្ភពីបញ្ហាជំនន់ទឹកភ្លៀងដែលកំពុងជួបប្រទះនេះ ត្បិតថាទឹកបានលិចមកដល់បរិវេណជុំវិញផ្ទះរបស់អ្នកស្រីអស់ទៅហើយ និងនៅសល់ប្រហែលកម្ពស់៣​តឹកទៀ​តប៉ុណ្ណោះ ផ្ទះអ្នកស្រីនឹងត្រូវលិច។ ម៉្យាងទៀត​ ដោយសារអ្នកស្រីទើបតែ​វះកាត់ជំងឺមហារីករួច ប្រសិនបើលិចក្រោមផ្ទះ អ្នកស្រីបារម្ភថា​នឹងមានការលំបាក​សម្រាប់អ្នកស្រីក្នុងការផ្លាស់ទីទៅខាងលើផ្ទះផង​ដែរ។

អ្នកស្រីបន្តថា៖ «បើលិចក្រោមផ្ទះអស់ គឺពិបាកហើយ! គ្មានកន្លែងនៅ មានតែនៅលើផ្ទះ ណាមួយទើបវះកាត់ហើយ បើឡើងចុះៗអ៊ីចឹងពិបាកណាស់»។

ពលរដ្ឋដែលផ្ទះលិចទឹកទាំងនេះអះអាងថា ពួកគាត់រង់ចាំដំណោះស្រាយពីអាជ្ញាធរជាងកន្លះ​ខែមក​ហើយ នៅតែមិនមានការដោះស្រាយ បណ្ដាលឱ្យសត្វចិញ្ចឹមនិងដំណាំភាគច្រើន​បាន​ងាប់។ អ្នកភូមិ​បានប្រមូលលុយចូល​គ្នា ដើម្បីទិញប្រេងជាង១០០លីត្របូម​ទឹកចេញ ប៉ុន្តែភ្លៀងបន្តធ្លាក់មកលិចដដែល។​

ទាក់ទងទៅនឹងបញ្ហានេះ ចៅសង្កាត់បាក់ខែង លោក គង់ ប៊ុនលី អះអាងថា បញ្ហាទឹកលិចផ្ទះនេះ ហួសពីសមត្ថភាពសង្កាត់ ទើបលោកស្នើទៅសាលាខណ្ឌឱ្យជួយ។​

លោកថា៖ «ដោយសារទីតាំងហ្នឹងមានវិសាលភាពទឹកធំធេងហួសពីសមត្ថភាព​ខ្ញុំ ខាងសង្កាត់ ទើបខ្ញុំធ្វើការរាយការណ៍ភ្លាមៗ​ទៅខាងអភិបាលខណ្ឌ ដើម្បីឱ្យ​​លោក​ធ្វើការចាត់ចែងដឹកនាំគ្រឿងចក្រដើម្បីយកមកធ្វើការកាយដី»។ ​

លោក គង់ ប៊ុនលី បន្ថែមថា ចំពោះករណីចាក់ដីលុបព្រែកត្រង់ចំណុចស្ពានលេខ៧​ លើផ្លូវជាតិ​លេខ៦​នេះ ដោយសារព្រែកនេះ​អស់មុខងារនៅក្នុងការបម្រើដល់ប្រយោជន៍​ប្រជាជន និងដើម្បីចៀសវាងពីការកេងប្រវ័ញ្ចរបស់បុគ្គលមួយចំនួនទៅលើព្រែកនេះ ទើប​ខាងសង្កាត់​រៀបចំចាក់ដីនោះ​សម្រាប់សាងសង់មណ្ឌលសុខភាព។​

នាយកមជ្ឈមណ្ឌលប្រជាពលរដ្ឋ ដើម្បីអភិឌ្ឍន៍ និងសន្តិភាព លោក យង់ គិមអេង លើកឡើងថា រដ្ឋាភិបាលគួរតែបញ្ឈប់ការលុបបឹងនិងព្រែកនៅក្នុងរាជធានីភ្នំពេញ ព្រោះក្នុងពេល​បច្ចុប្បន្ន​នេះ​ ចំនួន​បឹងនិងព្រែកដែលជាកន្លែងស្តុកទឹកកុំឱ្យ​​មាន​ការ​ជន់​លិច​នៅ​ក្នុង​ទីក្រុង​​​ កាន់តែមានចំនួនតិចទៅៗ​ពីមួយថ្ងៃទៅមួយថ្ងៃ ដែលប្រការនេះនឹងបង្កឱ្យ​​មាន​ការលិច​លង់​ប៉ះពាល់​ដល់ការរស់នៅរបស់​ប្រជាពលរដ្ឋ។

លោកបន្តថា៖ «ការលុបបឹងលុបព្រែកនេះ ជារួម មិនគួរបន្តធ្វើទេ ពីព្រោះបឹងព្រែកដែលនៅក្នុងរាជធានីភ្នំពេញស្ទើរតែអស់ទៅហើយ កាន់តែតិចទៅៗ ហើយបើនៅក្នុងរាជធានី គឺយើង​លែង​ឃើញ​មាន​ហើយ​បឹង។ បើនៅតាមជាយរាជធានីគឺ​នៅមានខ្លះៗ តែកំពុងតែធ្វើការលុបជាហូរហែ ដែលធ្វើឱ្យ​​យើងមានការព្រួយបារម្ភ ដែលការលុបបែបនេះ​នឹងធ្វើឱ្យ​​មានការ​លិចលង់ប្រជាជន ខូចខាតផលដំណាំ និងការរស់នៅរបស់ពួកគាត់»។

ព្រែកជីកនៅចំណុចស្ពានលេខ៧មួយនេះ ត្រូវបានអាជ្ញាធរខណ្ឌជ្រោយចង្វា​រចាក់ដីខ្សាច់លុប កាលពីថ្ងៃទី២២ ខែកក្កដា ឆ្នាំ២០២១។ ការចាក់ដីលុបព្រែកនេះបានផ្អាកដំណើរការអស់រយៈពេលពីរខែមកហើយ បន្ទាប់ពីបានចាក់ដល់ចំណុចព្រំប្រទល់ដីរបស់ប្រជាពលរដ្ឋក្នុងទំហំជិត១០០ម៉ែត្រការ៉េ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ