រយៈពេល២សប្ដាហ៍ដើមខែនេះ ពលរដ្ឋខ្មែរជិត៤០០នាក់ដែលប្រថុយឆ្លងដែនទៅថៃត្រូវបានចាប់ខ្លួន

ថ្ងៃទី ១២ខែតុលា ឆ្នាំ ២០២១ សមត្ថកិច្ចខេត្តបាត់ដំបង និងមន្ត្រីពាក់ព័ន្ធនានា បានចុះបង្រ្កាប​ទប់ស្កាត់ប្រជាពលរដ្ឋដែលប៉ុនប៉ងលបលួចឆ្លងដែន​ពីប្រទេសកម្ពុជាចូលទៅក្នុងប្រទេ​ស​ថៃដោយខុសច្បាប់ ស្ថិតនៅ​ចំណុចភូមិអូរដាលើ ឃុំបឹងរាំង​ ស្រុកកំរៀង​ ខេត្តបាត់ដំបង​។ (ហ្វេសប៊ុក៖ ស្នងការដ្ឋាននគរបាលខេត្តបាត់ដំបង)

មន្រ្តីសង្គមស៊ីវិល លើកឡើងថា ពលរដ្ឋខ្មែរជាង​៣៧០នាក់ រួម​ទាំងកុមារតូចៗផង​នោះ​ ត្រូវ​បានអាជ្ញាធរ​ព្រំដែន​កម្ពុជានិ​ង​ថៃ ចាប់ឃាត់ខ្លួនបាន អំឡុងពួកគេលួចឆ្លងដែនទាំងប្រថុយទៅរកការងារធ្វើនៅប្រទេសថៃ គិតចាប់ពីថ្ងៃទី១ ដល់​ថ្ងៃទី១៣ ខែតុ​លា ឆ្នាំ២០២១។ 

មន្រ្តីផ្នែកទេសន្តរប្រវេសន៍នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) កញ្ញា​ ទ្រី សុភា ប្រាប់ ​វីអូឌី​ នៅថ្ងៃ​ទី១៤ ខែតុលា​នេះថា ចលនាចំណាកស្រុកដោយប្រឈមនេះ គឺមានការកើនឡើងបន្ទាប់ពីចប់រដូវបុណ្យភ្ជុំ។ កញ្ញាថា គិតមិនដល់២សប្ដាហ៍ផង ពួកគេយ៉ាងហោច ៣​៧​​៣នាក់ ត្រូវ​បានចាប់ខ្លួនបានក្នុង១២ករណី ដែលភាគច្រើនប​ង្រ្កាបបានពេលពួកគេបានឆ្លងចូលដល់ទឹកដី​ប្រទេស​ថៃ។ 

បើតាមប្រភពដដែល តួលេខនេះគឺកើនឡើងខ្ពស់ជាងរយៈពេលមុខរដូវភ្ជុំបិណ្ឌ។ កញ្ញាថា តាមរបាយ​ការណ៍​ដែលបា​នកត់ត្រា ក្នុងខែកញ្ញា គឺមាន១៦ករណី ឃាត់ខ្លួនមនុស្សបាន១៩១នាក់ ឯក្នុងខែសីហា គឺមាន១២ករណី ឃាត់ខ្លួនម​នុស្ស១​​៧​៥នាក់។ 

មន្រ្តីឃ្លាំមើលសិទ្ធិពលករចំណាកស្រុកខ្មែររូបនេះ បន្ថែមថា ពលករទាំងនោះមានមួយចំនួនបានត្រលប់​ពីថៃ ដើម្បីជួបជុំគ្រួសារ ប៉ុន្តែដោយសារមិនអាចរកការងារធ្វើសមរម្យក្នុងស្រុក​បាន ពួកគេ​ក៏សម្រេច​វិល​ទៅ​វិញ ឯ​មួយចំនួនជាពលករថ្មីដែលមកពីបណ្ដាខេត្តផ្សេងៗ។ 

កញ្ញា ទ្រី សុភា បន្ថែមថា៖ «នេះវាអាចជាទំនោរទាំង២ ទាំងអ្នកដែលធ្លាប់ធ្វើការហើយ ទាំងអ្នកដែលគាត់មិនដែលទៅសោះ ហើយគាត់ចង់ស្វែងរកការងារធ្វើ។ ហើយមួយទៀត វាជាការព្រួយបារម្ភ ដោយ​សារ​គាត់​អាច​នឹង​មិនទទួលបានព័ត៌មានច្បា​ស់លា​ស់ ព្រោះព្រំដែននៅតែមានការរឹតបន្តឹង ហើយមិនទាន់​មានការបើកឡើងវិញទេ ទោះបីជាយើងទទួលបានព័ត៌មានថានៅខាងថៃមានការបន្ធូរបន្ថយ»

កញ្ញាស្នើដល់ពលរដ្ឋខ្មែរត្រូវ​បង្កើនការអត់ធ្មត់ ចៀសវាងធ្វើចំណាកស្រុកទាំងប្រថុយ ដែលប្រឈមនឹងការចាញ់បោកមេខ្យល់ ការចាប់ខ្លួនបញ្ជូនទៅធ្វើចត្តាឡីស័ក និងអាចឈានដល់ការដាក់ពន្ធនាគារ​ពីសំណាក់អាជ្ញាធរថៃ ជាដើម​។ កញ្ញា​បន្តថា អាជ្ញាធរកម្ពុជាគួរបង្កើនគោលនយោបាយរបបសន្តិសុខសង្គម ការងារក្នុងស្រុក និងបណ្ដុះបណ្ដាលវិជ្ជាជីវៈផ្សេងៗដល់ពលរដ្ឋខ្មែរ ដើម្បីកាត់បន្ថយការចំណាកស្រុក ហើយជួយសម្របសម្រួលកុំឱ្យអាជ្ញាធរថៃចាប់បញ្ជូនពួកគេទៅពន្ធនា​គារ។

វីអូឌី មិនអាចទាក់ទងសុំការអធិប្បាយជុំវិញបញ្ហាពលករចំណាកស្រុកនេះពីអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានទេ នៅថ្ងៃព្រហស្បតិ៍នេះ។

យ៉ាងណា អ្នកនាំពាក្យក្រសួងការបរទេសកម្ពុជា លោក កុយ គួង ប្រាប់ វីអូឌី តាមសារ Telegram ថា កន្លងមក ស្ថានទូតនិងស្ថានអគ្គកុងស៊ុលកម្ពុជានៅប្រទេសថៃ តែងតែយកចិត្តទុកដាក់ជួយសម្របសម្រួលអន្តរាគមន៍ជាមួយអាជ្ញាធរថៃ ដើម្បីបញ្ជូនពលរដ្ឋខ្មែរដែលឆ្លងដែនចូលថៃដោយខុសច្បាប់បានត្រលប់មកវិញជាហូរហែ។ 

លោកបន្ត​ថា៖ «ពួកគាត់មិនត្រូវបានឃាត់ខ្លួនទុកនៅប្រទេសថៃយូរឡើយ។ ពលករស្របច្បាប់ដែលមានបំណងត្រលប់មកមាតុភូមិ ហើយទៅសុំអន្តរាគមន៍ពីស្ថានអគ្គកុងស៊ុលកម្ពុជា នៅខេត្តស្រះកែវ ប្រទេសថៃ ក៏តែងបានត្រលប់មកវិញដោយសុវត្ថិភាពដែរ»។  

តាមរបាយការណ៍ស្រាវជ្រាវថ្មីមួយរបស់អង្គការសង់ត្រាល់ ចុះផ្សាយកាលពីខែកញ្ញា មានពលរដ្ឋខ្មែរយ៉ាងហោច ៧៤១នាក់ បាន​​លួ​ចឆ្លងដែនដោយខុសច្បាប់​ទៅ​រកការ​ងារ​ធ្វើ​​ក្នុង​ប្រទេសថៃ​ទាំង​ប្រថុយ​ប្រថាន ហើយត្រូវអាជ្ញាធរ​ព្រំដែនថៃនិង​ក​ម្ពុជា​ចា​ប់​ខ្លួន​បាន គិត​ក្នុង​រយៈ​ពេល​៧ខែដើមឆ្នាំ២០​២​១ នៃការរីករាលដាលជំងឺកូវីដ-១៩។

របាយការណ៍ដដែលបន្តថា ក្នុងចំណោមនោះ គឺមានជិត៥០ភាគរយត្រូវរងការផាកពិន័យនិងស៊ើបអង្កេតបញ្ជូ​នទៅចាត់ការប​ន្តតា​មនី​តិវិធីច្បាប់ ដែលធ្វើឱ្យពួកគេត្រូវរងគ្រោះបន្ថែមលើការគ្មានការ​ងារ​ធ្វើ គ្មានចំណូល បំ​ណុល ហើយរងទុក្ខលំបាករាងកា​​​យ និងសុខភាពថែមមួយកម្រិត៕


សេចក្ដីកែតម្រូវ៖ កថាខណ្ឌទី៣ «បើតាមប្រភពដដែល […] ឯក្នុងខែសីហា គឺមានករណី ឃាត់ខ្លួនម​នុស្ស១​​៧​៥នាក់។» ទៅជា «បើតាមប្រភពដដែល […] ឯក្នុងខែសីហា គឺមាន១២ករណី ឃាត់ខ្លួនម​នុស្ស១​​៧​៥នាក់។»

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ