សកម្មជនដីធ្លីម្នាក់ នៅស្រុកតំបែរ ខេត្តត្បូងឃ្មុំ ត្រូវបានតុលាការដោះលែងឱ្យមានសេរីភាពវិញ ក្រោយពីអនុវត្តទោសចប់តាមការកំណត់របស់តុលាការ។
កាលពីថ្ងៃទី១ ខែធ្នូ ឆ្នាំ២០២០ សាលាឧទ្ធរណ៍ខេត្តត្បូងឃ្មុំ ចេញសាលដីកាសម្រេចដាក់ទោសប្រធានសហគមន៍ស្រែប្រាំង លោក សែម សាង ឱ្យជាប់ពន្ធនាគារចំនួន២ឆ្នាំ ក្រោមបទចោទ «កំហែងយកដោយមានស្ថានទម្ងន់ទោសដោយប្រើប្រាស់អាវុធ» និងបានដោះលែងឱ្យមានសេរីភាពវិញកាលពីថ្ងៃទី១៤ ខែតុលា ឆ្នាំ២០២១នេះ បន្ទាប់ពីអនុវត្តទោសចប់។
ក្រោយចេញពីពន្ធនាគារនេះ ប្រធានសហគមន៍ស្រែប្រាំង លោក សែម សាង សុំមិនទាន់និយាយអ្វីជាមួយសារព័ត៌មានទេ ដោយសារបារម្ភពីសុវត្ថិភាព។
លោក សែម សាង ត្រូវបានចាប់ខ្លួនកាលពីថ្ងៃទី១៧ ខែតុលា ឆ្នាំ២០១៩ ក្រោយពីលោកសកម្មដឹកនាំប្រជាពលរដ្ឋនៅសហគមន៍ស្រែប្រាំង តវ៉ារឿងជម្លោះដីធ្លីជាមួយក្រុមហ៊ុនចិនមួយ និងជាមួយឧកញ៉ាម្នាក់ ស្ថិតនៅភូមិស្រែប្រាំង ឃុំត្រពាំងព្រីង ស្រុកតំបែរ ខេត្តត្បូងឃ្មុំ។
បើតាមឯកសារចងក្រងដោយសម្ព័ន្ធសហគមន៍កសិករកម្ពុជា បានឱ្យដឹងថា ដីព្រៃលិចទឹករបស់សហគមន៍ស្រែប្រាំង និងសហគមន៍បុស្សស្នោ ទំហំ៥៨០ហិកតា ផ្ដើមមានជម្លោះជាមួយក្រុមហ៊ុនចិន «ហាម៉ីនី វីន អ៊ិនវេសមេន» ចាប់តាំងពីឆ្នាំ២០១៤ និងដីទំហំ២០០ហិកតាទៀត មានជម្លោះជាមួយឧកញ៉ា ម៉ែន ចាន់ធឿន ខណៈពលរដ្ឋទាំងនោះប្រមាណ២៥០គ្រួសារបានចូលមកកាន់កាប់ដីនៅតំបន់មានជម្លោះនេះតាំងពីឆ្នាំ២០០២។
ពលរដ្ឋម្នាក់នៅសហគមន៍ស្រែប្រាំង លោក ថា លីដា ឱ្យដឹងថា នៅសហគមន៍នេះ តំណាងពលរដ្ឋ៣នាក់ត្រូវបានតុលាការឃុំខ្លួនជាបន្តបន្ទាប់យ៉ាងអយុត្តិធម៌ ក្នុងនោះមានលោក សែម សាង លោក ហឿន ស៊ីនាត និងលោក សែម ចំណាន ហើយថា ការចាប់ខ្លួននោះ ស្របពេលភរិយារបស់ពួកគាត់មានផ្ទៃពោះសម្រាលកូនថែមទៀត ដែលធ្វើឱ្យគ្រួសារអ្នកជាប់ទាំងនោះបានជួបការលំបាកក្នុងជីវភាពជាខ្លាំង។
ពលរដ្ឋរូបនេះបន្តថា ករណីអាជ្ញាធរចាប់តំណាងពលរដ្ឋទាំង៣នាក់នៅសហគមន៍ស្រែប្រាំងនោះ គឺជាការគំរាមកំហែង និងបំបាក់ស្មារតី មិនឱ្យប្រជាពលរដ្ឋផ្សេងទៀតហ៊ានចេញតវ៉ាដីធ្លីតែប៉ុណ្ណោះ។
លោកបន្ថែមថា៖ «វាគឺជាការគំរាមកំហែងដល់ប្រជាពលរដ្ឋផ្សេងៗទៀត មិនឱ្យក្រោកឈរតវ៉ាទៀត។ ហើយខ្ញុំឃើញថា តាំងពីមានការចាប់ខ្លួនមក គឺមានការគំរាមកំហែងជាបន្តបន្ទាប់ទៀត ប្រសិនជាពលរដ្ឋហ៊ានសកម្មជាងគេក្នុងការចេញមុខតវ៉ា គេគំរាមថា នឹងចាប់ដាក់ពន្ធនាគារដូចតំណាងមុនៗដែរ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ដែលតាមដានករណីនេះ មានប្រសាសន៍ថា ការចាប់ខ្លួននិងចោទប្រកាន់ទៅលើតំណាងពលរដ្ឋទាំង៣នាក់នោះ ជារឿងអយុត្តិធម៌ ដោយថា ពួកគេមិនមានកំហុសដូចការចោទប្រកាន់ឡើយ។
ប្រធានសមាគមរូបនេះបន្តថា រឿងរ៉ាវដែលឈានដល់មានការចាប់ខ្លួនតំណាងពលរដ្ឋទាំងនេះ គឺពាក់ព័ន្ធជម្លោះដីធ្លី ដោយសារពួកគេសកម្មខ្លាំងក្នុងការចេញមុខតវ៉ាទាមទាររកដំណោះស្រាយដីធ្លីជាមួយក្រុមហ៊ុន និងបុគ្គលមានលុយមានអំណាច ខណៈជម្លោះនោះអូសបន្លាយជិត១០ឆ្នាំដោយគ្មានដំណោះស្រាយ។ លោកក៏បានអំពាវនាវដល់រដ្ឋាភិបាលនិងតុលាការគ្រប់ជាន់ថ្នាក់ ពិចារណាក្នុងការដោះលែងតំណាងពលរដ្ឋទាំង៤នាក់ និងដោះស្រាយដីធ្លីជូនពលរដ្ឋឱ្យពួកគេបានមានដីធ្លីបង្កបង្កើនផលឡើងវិញ។
លោកបន្ថែមថា៖ «ហើយជំរុញដំណើរការនៃការដោះស្រាយដីធ្លីជូនពលរដ្ឋ ដោយឈរលើគោលការណ៍យុត្តិធម៌ និងធាតុពិតនៃផ្លូវច្បាប់ និងតម្រូវការជាក់ស្ដែងរបស់ប្រជាពលរដ្ឋ ជាពិសេសត្រូវឈរលើតម្រូវការរបស់ពលរដ្ឋភាគច្រើន ជាជាងឈរលើឈ្មួញនិងបុគ្គលមានលុយអំណាចភាគតិច ពីព្រោះថា ដីធ្លីជាអាយុជីវិតរបស់ប្រជាពលរដ្ឋ ដែលពួកគាត់ត្រូវការដើម្បីបង្កបង្កើនផលសម្រាប់ចិញ្ចឹមជីវិត។ អ៊ីចឹងប្រសិនបើពួកគាត់បាត់បង់ដីធ្លី និងបាត់បង់ផ្ទះសម្បែង នឹងធ្វើឱ្យពួកគាត់បាត់បង់មុខរបរប្រាក់ចំណូល អ៊ីចឹងវានឹងធ្វើឱ្យការអភិវឌ្ឍរបស់យើងធ្លាក់ចុះឬគ្មានកំណើនផងដែរ»។
កាលពីដើមឆ្នាំ២០២១ អង្គការសង្គមស៊ីវិលចំនួន៨៨ស្ថាប័នបានចេញសេចក្ដីថ្លែងការណ៍មួយ ដោយទាមទារដល់តុលាការឱ្យទម្លាក់ចោលការចោទប្រកាន់លើតំណាងសហគមន៍ដីធ្លីចំនួន៤នាក់ រួមមាន តំណាងសហគមន៍ជាំក្រវៀន លោក ផុន សុផល, លោក សែម សាង, លោក ហឿន ស៊ីនាត និងលោក សែម សំណាង តំណាងសហគមន៍ស្រែប្រាំង នៅស្រុកតំបែរ ខេត្តត្បូងឃ្មុំ ឱ្យមានសេរីភាពវិញ។
ក្រុមអង្គការសង្គមស៊ីវិលទាំងនេះបានចាត់ទុកការចាប់និងឃុំខ្លួនតំណាងសហគមន៍ដីធ្លីទាំងនោះថា ជាការគំរាមកំហែងដោយផ្ទាល់និងប្រយោលចំពោះប្រជាពលរដ្ឋ ដោយគ្រាន់តែពួកគេធ្វើសកម្មភាពនិងប្រើប្រាស់សិទ្ធិរបស់ខ្លួនតវ៉ាទាមទារស្របតាមរដ្ឋធម្មនុញ្ញនិងកតិកាសញ្ញាអន្តរជាតិ៕