ធនាគារជាតិកម្ពុជា ឱ្យដឹងថា ក្នុងឆមាសទី១ ឆ្នាំ២០២១ កម្ពុជានាំចេញផលិតផលគិតជាទឹកប្រាក់ចំនួន៣៥,២ទ្រីលានរៀល កើនឡើង៣,៧% ខណៈការនាំចូលវិញគិតជាទឹកប្រាក់៦០,៥ទ្រីលានរៀល កើនឡើង៤៤,៣% បើធៀបនឹងរយៈពេលដូចគ្នាក្នុងឆ្នាំ២០២០។
ធនាគារជាតិនៃកម្ពុជា កាលពីរសៀលថ្ងៃទី១៣ ខែតុលា ឆ្នាំ២០២១ បានចេញរបាយការណ៍ស្ដីពីទំហំពាណិជ្ជកម្មកម្ពុជា ក្នុងឆមាសទី១ ឆ្នាំ២០២១ ដោយបញ្ជាក់ទៀតថា ផលិតផលសំខាន់ៗដែលកម្ពុជានាំចេញមានសម្លៀកបំពាក់ ផលិតផលកាត់ដេរផ្សេងៗ ស្បែកជើង គ្រឿងបង្គុំអេឡិចត្រូនិច និងទោចក្រយាន ទៅកាន់ទីផ្សារចម្បងៗដូចជា សហរដ្ឋអាមេរិក សហភាពអឺរ៉ុប ចិន ជប៉ុន និងសិង្ហបុរី។
ធនាគារជាតិនៃកម្ពុជា បន្តថា ផលិតផលនាំចូលសម្រាប់បម្រើតម្រូវការក្នុងស្រុកសំខាន់ៗ រួមមាន វត្ថុធាតុដើមសម្រាប់វិស័យកាត់ដេរ ប្រេងឥន្ធនៈ សម្ភារ និងបរិក្ខារសំណង់ យានយន្ត ម្ហូបអាហារ និងភេសជ្ជៈ មកពីប្រទេសចម្បងៗដូចជា ចិន សិង្ហបុរី វៀតណាម ថៃ និងសហភាពអឺរ៉ុប។
របាយការណ៍បូកសរុបលទ្ធផលការងារពាណិជ្ជកម្មឆ្នាំ២០២០ និងទិសដៅការងារពាណិជ្ជកម្មឆ្នាំ២០២១ របស់ក្រសួងពាណិជ្ជកម្ម ឱ្យដឹងថា ទំហំពាណិជ្ជកម្មរបស់កម្ពុជាពេញមួយឆ្នាំ២០២០ នាំចេញទៅក្រៅប្រទេស មានទំហំទឹកប្រាក់ចំនួន១៧ ២១៥,៣៧លានដុល្លារ ពោលគឺមានការកើនឡើង១៦,៧២% បើធៀបនឹងរយៈពេលដូចគ្នាកាលពីឆ្នាំ២០១៩។ ក្នុងឆ្នាំ២០២០ដដែល ការនាំចូលមាន១៨ ៥៩០,៤៨លានដុល្លារអាមេរិក មានការថយចុះ៧,៨៤% បើធៀបនឹងរយៈពេល១២ខែដូចគ្នាក្នុងឆ្នាំ២០១៩៕