អង្គការស្បៀង និងកសិកម្មនៃសហប្រជាជាតិ (FAO) បានឱ្យដឹងថា នៅកម្ពុជា គ្រួសារក្រីក្រនិងងាយរងគ្រោះកំពុងប្រឈមនឹងវិបត្តិសេដ្ឋកិច្ចយ៉ាងធ្ងន់ធ្ងរ ដោយសារបាត់បង់ចំណូលក្នុងអំឡុងវិបត្តិកូវីដ-១៩ ខណៈពួកគេភាគច្រើនពឹងផ្អែកលើប្រភពចំណូលពីការងារកសិកម្ម និងលក់កម្លាំងពលកម្មទាំងក្នុងប្រទេសនិងក្រៅប្រទេស។
ការលើកឡើងនេះបានធ្វើឡើងក្នុងសេចក្ដីប្រកាសព័ត៌មាននៅក្នុង «ទិវាស្បៀងអាហារពិភពលោក (WFD)» ដែលនឹងប្រារព្ធនៅថ្ងៃទី១៦ ខែតុលា ឆ្នាំ២០២១ ស្អែកនេះ ក្រោមប្រធានបទ «សកម្មភាពយើងគឺជាអនាគតយើង ផលិតកម្មល្អ អាហារូបត្ថម្ភល្អ បរិស្ថានល្អ នាំឱ្យជីវិតកាន់តែប្រសើរ»។
ក្នុងសេចក្ដីប្រកាសព័ត៌មាននោះ អង្គការ FAO បានឱ្យដឹងថា ជំងឺរាតត្បាតកូវីដ-១៩បានបង្កឱ្យមានការរាំងស្ទះដល់វឌ្ឍនការដែលបានរៀបចំជាយូរមកហើយ ដើម្បីសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពត្រឹមឆ្នាំ២០៣០។
អង្គការ FAO បន្តថា ជំងឺកូវីដ-១៩កាន់តែធ្វើឱ្យប្រជាកសិករពិបាកថែមទៀតក្នុងការលក់ផលិតផលដែលខ្លួនផលិតបាន ស្របពេលដែលពួកគេក៏កំពុងតែប្រឈមជាមួយផលប៉ះពាល់នៃការប្រែប្រួលអាកាសធាតុនិងព្រឹត្តិការណ៍អាកាសធាតុនានាជាដើម។
ករណីនេះ អង្គការ FAO បានគូសបញ្ជាក់ថា៖ «នៅកម្ពុជា គ្រួសារក្រីក្រនិងងាយរងគ្រោះកំពុងប្រឈមនឹងវិបត្តិសេដ្ឋកិច្ចយ៉ាងធ្ងន់ធ្ងរ ដោយសារពួកគេភាគច្រើនពឹងផ្អែកលើប្រភពចំណូលផ្សេងៗ រួមមាន ការធ្វើស្រែចម្ការ ការស៊ីឈ្នួលដោយលក់កម្លាំងពលកម្ម សកម្មភាពមិនមែនកសិកម្ម និងប្រាក់បញ្ញើពីពលករចំណាកស្រុកទាំងនៅក្នុងប្រទេសនិងក្រៅប្រទេស។ ការផ្ទុះឡើងនៃជំងឺកូវីដ-១៩ បានធ្វើឱ្យពលរដ្ឋជាច្រើនបាត់បង់ការងារ»។
អង្គការនេះបន្ថែមថា អង្គការសហប្រជាជាតិនៅកម្ពុជាបានវាយតម្លៃផលប៉ះពាល់សង្គម-សេដ្ឋកិច្ចថា «ជាងពាក់កណ្ដាលនៃគ្រួសារនៅកម្ពុជា ត្រូវកាត់បន្ថយបរិមាណនិងគុណភាពអាហាររបស់ពួកគេ ក្នុងអំឡុងពេលមានជំងឺរាតត្បាតកូវីដ-១៩នេះ»។
អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា លោក តូច ចាន់នី ទទួលស្គាល់ថា គ្រួសារក្រីក្រពិតជាមានភាពលំបាកមែនក្នុងស្ថានភាពនេះ។
តែយ៉ាងណា លោកថា៖ «ក្រសួងសង្គមកិច្ច មានកម្មវិធីផ្ទេរសាច់ប្រាក់ជូនអ្នកក្រនិងងាយរងគ្រោះ ក្នុងអំឡុងពេលកូវីដ-១៩។ កម្មវិធីនេះ យើងធ្វើបានជិតពីរឆ្នាំហើយ អ៊ីចឹងកម្មវិធីហ្នឹង យើងផ្ទេរអញ្ចេះ ឧទាហរណ៍ក្នុងគ្រួសារមួយ គាត់មានបណ្ណក្រីក្រ ហើយក្នុងគ្រួសារហ្នឹងមានសមាជិកប៉ុន្មាន? មានមនុស្សចាស់ កុមារ អ្នកផ្ទុកមេរោគអេដស៍? អ៊ីចឹងសុទ្ធជាមុខសញ្ញាដែលយើងផ្ដល់។ ជាមធ្យម មួយគ្រួសារបានប្រហែលខ្ទង់ជា៣០ម៉ឺនរៀល ក្នុងរង្វង់ប៉ុណ្ណឹងក្នុងមួយខែ។ ហើយការបង្កើតកម្មវិធីនេះគឺល្អណាស់ គ្មានប្រទេសណាធ្វើបានទេ! កម្ពុជាក្រ តែកម្ពុជាធ្វើបាន»។
ជាមួយគ្នានេះដែរ លោកថា ក្រុមប្រឹក្សាជាតិគាំពារសង្គម និងក្រសួងសង្គមកិច្ច កំពុងពិភាក្សាបន្តពីលទ្ធភាពក្នុងការជួយដល់គ្រួសារដែលមានបណ្ណក្រីក្រ សម្រាប់រយៈពេលវែងនាពេលអនាគតផងដែរ ដែលពួកគេនឹងទទួលបាននូវកញ្ចប់របបធានារ៉ាប់រងសង្គម។
ប្រធានសមាគមសេដ្ឋកិច្ចឯករាជ្យក្រៅប្រព័ន្ធ លោក វន់ ពៅ យល់ស្របចំពោះរបាយការណ៍របស់អង្គការ FAO ដោយថា ក្នុងវិបត្តិកូវីដ-១៩នេះបានធ្វើឱ្យគ្រួសារក្រីក្រកាន់តែមានស្ថានភាពលំបាកទៅៗ។
លោកថា ដើម្បីដោះស្រាយជួយគ្រួសារក្រីក្រ រដ្ឋត្រូវបង្កើតជាមូលនិធិឬឥណទានណាមួយសម្រាប់ជួយបណ្ដុះបណ្ដាលវិជ្ជាជីវៈទៅដល់អ្នកដែលធ្វើការនៅក្នុងសហគ្រាសខ្នាតតូច និងអ្នកធ្វើការក្នុងសេដ្ឋកិច្ចក្រៅប្រព័ន្ធ ក៏ដូចជាអ្នកធ្វើការផ្នែកកសិកម្ម ជាដើម។
លោកបន្តថា៖ «ពលរដ្ឋផ្នែកកសិកម្មដែលដួលរលំដោយសារកូវីដ-១៩ រដ្ឋត្រូវមានការបង្រៀនជំនាញកសិកម្មឱ្យត្រូវជំនាញ។ ការងារផ្សេងទៀត ត្រូវបង្រៀនការពង្រឹងមុខរបររបស់គាត់។ ហើយក្រោយបង្រៀនចប់ ត្រូវតែមានមូលនិធិមួយជួយទ្រទ្រង់អាជីវកម្មឡើងវិញ ឬជួយពង្រឹងយ៉ាងណាឱ្យអាជីវកម្មនោះអាចដំណើរការឡើងវិញក្រោយកូវីដ-១៩បញ្ចប់។ ប៉ុន្តែបើកូវីដ-១៩នៅបន្តទៀត រដ្ឋត្រូវរៀបចំយ៉ាងម៉េចឱ្យពលរដ្ឋអាចរស់នៅបានក្នុងស្ថានភាពកូវីដ-១៩»។
សេចក្ដីប្រកាសព័ត៌មានរបស់អង្គការ FAO អះអាងថា ខ្លួនបានត្រៀមខ្លួនរួចរាល់ក្នុងការផ្ដល់ការគាំទ្រដល់កម្ពុជា ដើម្បីធ្វើឱ្យប្រសើរឡើងនូវការប្រើប្រាស់ធនធានធម្មជាតិ សម្រាប់ការផលិតស្បៀង ការកែច្នៃ និងការចែកចាយ ដើម្បីកាត់បន្ថយការបាត់បង់ជីវចម្រុះ ការបំពុល ការប្រើប្រាស់ទឹក ការសឹករេចរឹលដី និងការបញ្ចេញឧស្ម័នផ្ទះកញ្ចក់ ជាដើម។
អង្គការ FAO ក៏គាំទ្រផងដែរចំពោះការនាំមកនូវបច្ចេកវិទ្យាច្នៃប្រតិដ្ឋថ្មី ព្រមទាំងចំណេះដឹងប្រពៃណីល្អៗដែលមានស្រាប់សម្រាប់ប្រជាកសិករ សំដៅលើកទឹកចិត្តពួកគេក្នុងការផលិតស្បៀងដែលមានជីវជាតិ ប្រកបដោយនិរន្តរភាព និងមិនប៉ះពាល់ដល់បរិស្ថាន៕
