កម្ពុជានៅតែបន្តរកឃើញអ្នកជំងឺកូវីដ-១៩ ស្លាប់ដោយវីរុសមួយនេះ ក្នុងចំនួនជាង២០នាក់រយៈពេល៤ថ្ងៃជាប់ៗគ្នាមកហើយ ចាប់តាំងពីថ្ងៃទី១៤ខែតុលាមក ធ្វើឱ្យចំនួនអ្នកស្លាប់សរុបកើនឡើងជាង២ ៦០០នាក់ ខណៈឆ្លងថ្មីមានជាង២០០នាក់ទៀត ដែលធ្វើឱ្យអ្នកឆ្លងសរុបនៅកម្ពុជាកើនឡើងជាង១១៦ ០០០នាក់។
សេចក្ដីប្រកាសព័ត៌មានរបស់ក្រសួងសុខាភិបាលនៅថ្ងៃទី១៧ ខែតុលា ឆ្នាំ២០២១នេះ បានឱ្យដឹងថា អ្នកស្លាប់ដោយសារជំងឺកូវីដ-១៩ កាលពីថ្ងៃម្សិលមិញ មានចំនួន២៤នាក់បន្ថែមទៀត ហើយករណីឆ្លងថ្មីមានចំនួន២៥៨នាក់ ស្របពេលអ្នកជាសះស្បើយថ្មីមានចំនួន ៤០៥នាក់ផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃអាទិត្យនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៦ ៦៦៤នាក់ ក្នុងនោះអ្នកជំងឺព្យាបាលជាសះស្បើយសរុបមានចំនួន ១១០ ៨៧០ នាក់ និងអ្នកស្លាប់សរុប ២៦៥៨នាក់។ ដោយឡែក ករណីនាំចូលពីក្រៅប្រទេសសរុបមានចំនួន ១៩ ៣៤៣នាក់៕
