គណបក្សកែទម្រង់កម្ពុជា នឹងធ្វើសមាជប្រកាសសមាសភាពថ្នាក់ដឹកនាំនៅដើមឆ្នាំក្រោយវិញ ដោយសម្អាងលើមូលហេតុមួយចំនួន រួមទាំងភាពយឺតយ៉ាវផ្ដល់សុពលភាពពីក្រសួងមហាផ្ទៃ។
ស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន ឱ្យដឹងនៅថ្ងៃចន្ទនេះថា គណបក្សនេះមិនអាចធ្វើសមាជ ដើម្បីប្រកាសសមាសភាពមេដឹកនាំតាមការគ្រោងទុកនៅថ្ងៃទី២៣ ខែតុលា ឆ្នាំ២០២១នេះបានទេ ដោយថា ត្រូវលើកទៅធ្វើនៅខែមករា ឆ្នាំ២០២២វិញ។
លោកបញ្ជាក់ថា ការលើកពេលនេះបណ្ដាលមកពីបញ្ហាជំងឺកូវីដ-១៩ ការផ្ដល់សុពលភាពយឺតដែលទើបទទួលបានត្រឹមមួយខែមកនេះ ខណៈសមាជិកមកពីក្រៅប្រទេសនឹងជួបបញ្ហាលំបាកក្នុងការធ្វើដំណើរមកចូលរួម ដោយសារសំបុត្រយន្តហោះថ្លៃពិបាករកទិញជាដើម។
លោកបន្ថែមថា តែបេក្ខភាពជាប្រធានបក្សមិនកែប្រែទេ គឺអតីតមន្ត្រីជាន់ខ្ពស់បក្សប្រឆាំង លោក ប៉ុល ហំម ដដែល តែតំណែងអនុប្រធានបក្សអាចផ្លាស់ប្តូរ។
លោកថា៖ «ប្រាកដណាស់ ឯកឧត្ដម ប៉ុល ហំម នឹងទៅជាប្រធាន។ ហើយបើសិនរយៈពេលមួយខែពីរខែនេះ មិនមានសមាសភាពក្រៅពីឯកឧត្ដម សុន ឆ័យ ឯកឧត្ដម យ៉ែម បុញ្ញឬទ្ធ ងាកមករកការរួបរួមទេ អាហ្នឹងយើងប្រគល់តួនាទីអនុប្រធានជូនគាត់។ ហើយបើគាត់អត់មកទេ ខ្ញុំអាចក្លាយជាអនុប្រធានខ្លួនឯង»៕
