ធនាគារអភិវឌ្ឍន៍អាស៊ី (ADB) បានឱ្យដឹងថា ពលរដ្ឋកម្ពុជាចំនួនតែ១៨%ប៉ុណ្ណោះដែលមានចំណេះដឹងផ្នែកហិរញ្ញវត្ថុ ខណៈអ្នកជំនាញថា ការមានចំណេះដឹងផ្នែកហិរញ្ញវត្ថុទាប នឹងអាចធ្វើឱ្យពលរដ្ឋងាយសម្រេចចិត្តខុសក្នុងការប្រើប្រាស់សេវាហិរញ្ញវត្ថុ។
តាមសេចក្ដីប្រកាសព័ត៌មាននៅថ្ងៃទី១៨ ខែតុលា ឆ្នាំ២០២១ ADB បានអនុម័តប្រាក់កម្ចីផ្ដោតលើគោលនយោបាយចំនួន៤០លានដុល្លារ ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការពង្រីកលទ្ធភាពទទួលបានឥណទាន ក្នុងចំណោមសហគ្រាសធុនតូចនិងមធ្យម (MSMEs) ព្រមទាំងអនុវត្តកំណែទម្រង់ដើម្បីជំរុញស្ថិរភាពហិរញ្ញវត្ថុ និងធ្វើឱ្យប្រសើរឡើងនូវហេដ្ឋារចនាសម្ព័ន្ធវិស័យហិរញ្ញវត្ថុ ជាដើម។
ជាមួយគ្នានេះដែរ ADB បញ្ជាក់ថា ពលរដ្ឋកម្ពុជាតែ១៨%ប៉ុណ្ណោះដែលត្រូវបានចាត់ទុកថាមានចំណេះដឹងផ្នែកហិរញ្ញវត្ថុ ខណៈពលរដ្ឋភាគច្រើនលើសលុប ជាពិសេសពលរដ្ឋក្រីក្រ លទ្ធភាពទទួលបានផលិតផលនិងសេវាកម្មហិរញ្ញវត្ថុនៅមានកម្រិត ហើយចំណេះដឹងផ្នែកហិរញ្ញវត្ថុនៅទាបថែមទៀតផង។
ADB លើកឡើងថា៖ «ជំងឺរាតត្បាតកូវីដ-១៩ ការផ្ដល់ប្រាក់កម្ចីអចលនទ្រព្យ [Real Estate Lending] និងកំណើនឥណទានលឿន [Fastercredit Growth] បានបង្កើនហានិភ័យដល់ស្ថិរភាពហិរញ្ញវត្ថុរបស់កម្ពុជា។ ហេដ្ឋារចនាសម្ព័ន្ធហិរញ្ញវត្ថុរបស់ប្រទេស មិនទាន់បានអភិវឌ្ឍពេញលេញ ដែលជាកត្តាប្រឈមដល់លទ្ធភាពទទួលបានហិរញ្ញវត្ថុ និងការអភិវឌ្ឍទីផ្សារ ពីព្រោះពលរដ្ឋកម្ពុជា ១៨%ប៉ុណ្ណោះ ដែលត្រូវបានចាត់ទុកថាមានចំណេះដឹងផ្នែកហិរញ្ញវត្ថុ»។
តាមសេចក្ដីប្រកាសព័ត៌មានដដែល បានដកស្រង់ប្រសាសន៍របស់អ្នកឯកទេសផ្នែកហិរញ្ញវត្ថុរបស់ធនាគារអភិវឌ្ឍន៍អាស៊ី លោកស្រី Berita Ainabe ថារដ្ឋាភិបាលកម្ពុជាបានបោះជំហានយ៉ាងសំខាន់ក្នុងការរក្សាស្ថិរភាពហិរញ្ញវត្ថុ និងធ្វើឱ្យការគ្រប់គ្រងវិបត្តិមានភាពប្រសើរឡើង ក្នុងពេលមានជំងឺរាតត្បាតកូរីដ-១៩ ផងដែរ។
លោកស្រីមានប្រសាសន៍ថា៖ «តាមរយៈកម្មវិធីថ្មីនេះ រាជរដ្ឋាភិបាលបានអនុម័តច្បាប់សំខាន់ៗដែលគាំទ្រដល់យុទ្ធសាស្ត្របរិយាប័ន្នហិរញ្ញវត្ថុជាតិ និងបានផ្ដួចផ្ដើមគំនិតជាច្រើន ដើម្បីបង្កើនលទ្ធភាពទទួលបានហិរញ្ញវត្ថុ រួមទាំងគម្រោងធានាឥណទានសាធារណៈ [Public Credit Guarantee Scheme] សម្រាប់សហគ្រាសធុនតូចនិងមធ្យមដំបូងគេនៅកម្ពុជាផងដែរ»។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន សុំមិនធ្វើការបកស្រាយជុំវិញករណីនេះ ដោយបង្វែរសំណួរអ្នកសារព័ត៌មានឱ្យសួរទៅខាងធនាគារជាតិវិញ។
វីអូឌី មិនអាចទាក់ទងទេសាភិបាលធនាគារជាតិនៃកម្ពុជា លោក ជា ចាន់តូ និងអ្នកនាំពាក្យធនាគារជាតិនៃកម្ពុជា អ្នកស្រី ជា សិរី បានទេ នៅថ្ងៃអង្គារនេះ។
អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា លោក កាំង តុងងី មានប្រសាសន៍កាលពីម្សិលមិញថា នៅពេលដែលពលរដ្ឋមានចំណេះដឹងផ្នែកហិរញ្ញវត្ថុទាប ពួកគាត់ងាយនឹងធ្វើការសម្រេចចិត្តខុសក្នុងការប្រើប្រាស់សេវាហិរញ្ញវត្ថុ។ លោកបន្តថា ជាឧទាហរណ៍ ដូចជាការខ្ចីប្រាក់ពីក្រុមហ៊ុនដែលគ្មានអាជ្ញាបណ្ណត្រឹមត្រូវ រហូតដល់ធ្លាក់ក្នុងអន្ទាក់បំណុលដោះខ្លួនមិនរួច ជាដើម។
លោក កាំង តុងងី បន្តថា៖ «អ៊ីចឹងនៅពេលដែលយើងនិយាយពីចំណេះដឹងហិរញ្ញវត្ថុ យើងត្រូវយកចិត្តទុកដាក់លើចំណូលនិងចំណាយរបស់គ្រួសារយើង។ ទាក់ទងនឹងការគ្រប់គ្រងបំណុល ពេលបងប្អូនមានបំណុល សូមបងប្អូនរៀបចំផែនការឱ្យច្បាស់ថា បំណុលដែលយើងខ្ចីគេមកហ្នឹង យើងយកមកធ្វើអី? យកមកដើម្បីបង្កើនចំណូលឬយកមកទិញសម្ភារហ៊ឺហា? បើរបស់ហ៊ឺហាដែលមិនជួយបង្កើនចំណូលយើង អ៊ីចឹងយើងត្រូវចៀសឱ្យផុត [ធ្លាក់ក្នុងអន្ទាក់បំណុល]»។
វិនិយោគិន និងជាអ្នកជំនាញផ្នែកហិរញ្ញវត្ថុ លោក ង៉ែត ជូ ថ្លែងថា លោកហាក់មិនមានការភ្ញាក់ផ្អើលចំពោះលទ្ធផលនៃការរកឃើញរបស់ ADB នេះទេ ដោយសារលោកធ្លាប់បានធ្វើការងារពាក់ព័ន្ធនឹងវិស័យហិរញ្ញវត្ថុនេះច្រើន។ យ៉ាងណា លោកថា បញ្ហាពលរដ្ឋមិនសូវមានចំណេះដឹងផ្នែកហិរញ្ញវត្ថុនេះ ជាបញ្ហាប្រឈមដ៏ធំសម្រាប់ពួកគាត់ទៅថ្ងៃអនាគត។
លោកថា៖ «បញ្ហានេះ គឺអាចជាបញ្ហាធំនាពេលអនាគត! ពេលបច្ចុប្បន្ន មានជាបញ្ហារួចហើយ គឺពលរដ្ឋមួយចំនួនមិនមានលទ្ធភាពសងកម្ចីរបស់ខ្លួនទេ។ ពួកគាត់យកកម្ចីទៅប្រើមិនចំគោលដៅ ដូចជា ទី១ អាចថាគាត់មិនយល់ពីគោលបំណងនៃកម្ចី និងទី២ គាត់ខ្វះភាពស្មោះត្រង់ដោយប្រាប់គេ [មន្ត្រីឥណទាន] ថាយកកម្ចីទៅរកស៊ី ឬទិញជីកសិកម្ម តែតាមពិតយកទៅ ក្នុងគោលបំណងផ្សេងដូចជាបង់រម្លស់ម៉ូតូ [សម្ភារនិយម] ជាដើម ដែលមិនបានបង្កើតជាផលចំណេញ។ នេះអាចជាហានិភ័យនៅក្នុងវិស័យ ខាតសេដ្ឋកិច្ច ព្រោះប្រទេសយើងមិនមែនជាអ្នកផលិតសម្ភារទាំងនោះ តែជាអ្នកនាំចូល»។
ករណីនេះ លោកលើកឡើងថា ពលរដ្ឋត្រូវមានភាពស្មោះត្រង់ ដើម្បីសហការនឹងមីក្រូហិរញ្ញវត្ថុ ហើយប្រើកម្ចីឱ្យចំគោលដៅ។ រីឯមីក្រូហិរញ្ញវត្ថុ គួរដាក់វិន័យមន្ត្រីរបស់ខ្លួនឱ្យបានច្បាស់លាស់ ចំពោះការផ្ដល់ជូនកម្ចីដល់អតិថិជនដែលមានហេតុផលសមស្រប។ ចំណែកធនាគារជាតិនៃកម្ពុជាវិញ គួរបង្កើតកម្មវិធីអប់រំតាមប្រព័ន្ធផ្សព្វផ្សាយ ដើម្បីបញ្ជ្រាបការអប់រំឬការយល់ដឹងដល់ពលរដ្ឋពាក់ព័ន្ធផ្នែកហិរញ្ញវត្ថុឱ្យបានកាន់តែទូលំទូលាយបន្ថែមទៀត។
បើតាមសេចក្ដីប្រកាសរបស់ធនាគារអភិវឌ្ឍន៍អាស៊ីដដែល នៅឆ្នាំ២០២០ ធនាគារមួយនេះបានផ្តល់ប្រាក់កម្ចីនិងជំនួយឥតសំណងជិត៥០០លានដុល្លារ (៤៧៧,២លានដុល្លារ) ដល់ប្រទេសកម្ពុជា និងផ្តល់បន្ថែមចំនួនជិត៣០០លានដុល្លារ (២៨១,៣លានដុល្លារ) ទៀត តាមរយៈសហហិរញ្ញប្បទាន៕