ជនចំណាកស្រុកដែលភាគច្រើនមកពីប្រទេសហៃទី និងវ៉េណេស៊ុយអេឡា កំពុងតែកកកុញនៅទីក្រុងឆ្នេរសមុទ្រ Necocli ភាគខាងជើងប្រទេសកូឡុំប៊ី ខណៈដែលពួកគេរង់ចាំការដឹកជញ្ជូនតាមទូកឆ្ពោះទៅកាន់ព្រៃតំបន់ Darien Gap ក្នុងប្រទេសប៉ាណាម៉ា ដើម្បីបន្តដំណើរទៅកាន់ប្រទេសម៉ិកស៊ិក និងអាមេរិក។
ការប៉ុនប៉ងក្នុងការបន្តដំណើររបស់ជនចំណាកស្រុក តាមរយៈការជិះទូកដោយខុសច្បាប់ និងមានមនុស្សច្រើនកកកុញនេះ ក៏ត្រូវបានចាត់ទុកថាជាសកម្មភាពប្រកបដោយគ្រោះថ្នាក់មួយផងដែរ។
នៅពេលដែលពួកគេចាកចេញពីតំបន់ឆ្នេរសមុទ្រ ប្រទេសកូឡុំប៊ី ពួកគេត្រូវធ្វើដំណើរទៅកាន់តំបន់ Darien Gap ដែលជាតំបន់ព្រៃតភ្ជាប់ប្រទេសកូឡុំប៊ី និងប៉ាណាម៉ា និងជាកន្លែងដែលពួកគេត្រូវដើរជាច្រើនគីឡូម៉ែត្រ។
ទាក់ទិននឹងករណីនេះ ជនចំណាកស្រុកហៃទីមួយរូប លោក Wilson Michel បានប្រាប់ទីភ្នាក់ងារសារព័ត៌មាន Reuters ឱ្យដឹងថា៖ «ប្រសិនបើជាស្ថានភាពព្រៃតំបន់ Darien Gap មានគ្រោះថ្នាក់ នោះយើងមិនអាចដើរបានលឿននោះទេ។ ខ្ញុំដឹងថា តាមរយៈការអត់ធ្មត់ ខ្ញុំនឹងទៅដល់គោលដៅដោយគ្មានបញ្ហា»។
គួរបញ្ជាក់ថា ជនចំណាកស្រុករាប់ពាន់នាក់បានធ្វើដំណើរឆ្លងកាត់ទីក្រុង Necocli ជារៀងរាល់ឆ្នាំ ខណៈដែលការបិទព្រំដែនដោយសារករណីជំងឺរាតត្បាតកូវីដ-១៩ ក៏បានបង្កជាការរាំងស្ទះមួយចំនួនដល់ការធ្វើដំណើររបស់ក្រុមមនុស្សទាំងនេះផងដែរ៕