ប៉ូលិសអ៊ីតាលី នៅថ្ងៃចន្ទម្សិលមិញនេះ បានសម្រេចប្រើប្រាស់កាណុងបាញ់ទឹក ដើម្បីព្យាយាមបំបែកក្រុមអ្នកតវ៉ារាប់រយនាក់ដែលបានធ្វើបាតុកម្មប្រឆាំងនឹងបណ្ណចាក់វ៉ាក់សាំងកូវីដ-១៩ ឬហៅថា ហ្គ្រីនផាស (Green Pass) នៅខាងក្រៅច្រកចូលកំពង់ផែ Trieste។
រដ្ឋាភិបាលអ៊ីតាលី កាលពីថ្ងៃទី១៥ ខែតុលាកន្លងទៅ បានសម្រេចអនុវត្តប្រព័ន្ធប្រើប្រាស់បណ្ណវ៉ាក់សាំងកូវីដ-១៩ (Green Pass) ដោយតម្រូវឱ្យបុគ្គលិកកម្មករទាំងអស់មានបណ្ណនេះ ដែលជាការបញ្ជាក់ថា ពួកគេបានចាក់វ៉ាក់សាំងការពារជំងឺកូវីដ-១៩រួចរាល់។
ទាក់ទិននឹងករណីនេះ ក្រុមកម្មករកំពង់ផែទាំងឡាយបានប្រមូលផ្ដុំគ្នានៅខាងក្រៅទីតាំងកំពង់ផែ Trieste គិតចាប់តាំងពីថ្ងៃសុក្រសប្ដាហ៍មុន ដើម្បីធ្វើបាតុកម្មប្រឆាំងនឹងការសម្រេចរបស់រដ្ឋាភិបាលខ្លួន ខណៈដែលពួកគេលើកឡើងថា វាជាការរំលោភសិទ្ធិមនុស្សរបស់ពួកគេ។
ជាមួយគ្នានេះ កាណុងបាញ់ទឹក និងឧស្ម័នបង្ហូរទឹកភ្នែក ក៏ត្រូវបានប្រើប្រាស់ដោយប៉ូលិសក្នុងកិច្ចខិតខំប្រឹងប្រែង ដើម្បីបំបែកក្រុមបាតុករដែលមានបំណងធ្វើដំណើរឆ្ពោះទៅកាន់កណ្ដាលទីក្រុងផងដែរ៕
