អង្គការភ្លែនអន្តរជាតិកម្ពុជា (PIC) អះអាងថា កុមារកម្ពុជាដែលមានអាយុក្រោម១៧ឆ្នាំ ប្រមាណ ៧២% រងគ្រោះដោយសារកង្វះអាហារូបត្ថម្ភ គុណភាពអប់រំនៅមានកម្រិតទាប ខ្វះទឹកស្អាត និងខ្វះអនាម័យ។
ថ្លែងក្នុងពិធីផ្សព្វផ្សាយក្រោមប្រធានបទ «យុទ្ធសាស្ត្រប្រចាំប្រទេស ២,៥លានហេតុផល ២០២១-២០២៦» និងអបអរសាទរ «ទិវាក្មេងស្រីអន្តរជាតិ ២០២១» នៅថ្ងៃទី២០ ខែតុលា ឆ្នាំ ២០២១នេះ លោកស្រី គ្វីននេត វ៉ង នាយិកាប្រចាំប្រទេសរបស់អង្គការភ្លែនអន្តរជាតិកម្ពុជា មានប្រសាសន៍ថា លទ្ធផលនៃការវិភាគស្ថានភាពស្ដីពីសិទ្ធិកុមារនិងសិទ្ធិក្មេងស្រី ដែលបានរៀបចំកាលពីខែតុលា ឆ្នាំ២០២០ បង្ហាញថា បញ្ហាជាច្រើនទាក់ទងនឹងពួកគេនៅតែបន្តកើតឡើង និងនៅតែជាក្ដីបារម្ភពីសំណាក់អង្គការភ្លែនអន្តរជាតិកម្ពុជា។
លោកស្រី គ្វីននេត វ៉ង មានប្រសាសន៍ទៀតថា ការអប់រំគ្រប់កម្រិតនៅកម្ពុជាមានគុណភាពទាប ដែលធ្វើឱ្យកុមារជាច្រើនមិនទទួលបានស្តង់ដារនៃការរៀនសូត្រសមស្របតាមអាយុ រួមទាំងអក្ខរភាព និងលេខនព្វន្តកម្រិតមូលដ្ឋាន។
លោកស្រីថា៖ «ប្រមាណ ៧២% នៃកុមារកម្ពុជា មានអាយុ០-១៧ឆ្នាំ រងគ្រោះដោយសារកង្វះផ្នែកអាហារូបត្ថម្ភ ខ្វះការអភិវឌ្ឍកុមារ [ECD] ខ្វះទឹកស្អាត ខ្វះអនាម័យ បញ្ហាផ្ទះសម្បែង និងគុណភាពអប់រំនៅគ្រប់កម្រិតគឺទាប»។
លោកស្រី គ្វីននេត វ៉ង បន្ថែមថា ចំពោះសិស្សកម្រិតមធ្យមសិក្សាដែលចុះឈ្មោះចូលរៀនវគ្គអប់រំបណ្ដុះបណ្ដាលបច្ចេកទេសនិងវិជ្ជាជីវៈ មានចំនួនត្រឹមតែ ២% ប៉ុណ្ណោះ ដែលនេះជាបញ្ហាប្រឈមសម្រាប់សិស្សក្នុងវិស័យមួយនេះ ពាក់ព័ន្ធនឹងលទ្ធភាពទទួលបានសេវាអប់រំ គុណភាព សមត្ថភាពស្ថាប័ន និងទិដ្ឋភាពសង្គម។
អគ្គលេខាធិការ នៃអគ្គលេខាធិការដ្ឋានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ លោក សុខ ស៊ីឡូ ប្រាប់ វីអូឌី នៅថ្ងៃពុធនេះថា លោកមិនដឹងថាតួលេខរបស់អង្គការភ្លែនអន្តរជាតិកម្ពុជានេះស្រាវជ្រាវពីណានោះឡើយ។ លោកថា ជាធម្មតា តួលេខភាគរយនៃការស្រាវជ្រាវត្រូវមានការបែងចែកដោយឡែកពីគ្នា ដូចជា អាហារូបត្ថម្ភផ្សេង ការអប់រំផ្សេង ទឹកស្អាតផ្សេង ពោលគឺមិនអាចបូកភាគរយស្រាវជ្រាវចូលគ្នាបានទេ។
លោក សុខ ស៊ីឡូ មានប្រសាសន៍ថា៖ «តួលេខផ្លូវការ ស្រុកខ្មែរយើងផ្អែកតែលើក្រសួងផែនការមួយទេ គឺតួលេខផ្លូវការរបស់រដ្ឋាភិបាល។ តែចំពោះគាត់ទៅស្រាវជ្រាវពីផ្សេងៗ អាហ្នឹងយើងអត់ទទួលស្គាល់អីជាផ្លូវការទេ។ ជួនកាល អង្គការមួយៗគាត់ស្រាវជ្រាវតាមគម្រោងគាត់ តាមតំបន់ផ្សេងៗ។ អ៊ីចឹងចង់ច្បាស់ លុះត្រាយកតួលេខរបស់ក្រសួងផែនការ អាហ្នឹងទើបអាចប្រើប្រាស់ជាផ្លូវការបាន»។
ដោយឡែក អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បដិសេធធ្វើអត្ថាធិប្បាយនៅថ្ងៃនេះ ដោយថា លុះត្រាលោកបានពិនិត្យឯកសារស្រាវជ្រាវនោះជាមុនសិន។
លោកថា៖ «ខ្ញុំស្នើសុំឯកសារនៃការស្រាវជ្រាវនោះ ដើម្បីពិនិត្យ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ការពង្រឹងការអប់រំសម្រាប់កុមារ គឺជាដំណើរការវែងឆ្ងាយមួយដែលទាមទារឱ្យមានការចូលរួមពីភាគីពាក់ព័ន្ធ។ លោកថា ក្រៅពីការចូលរួមរបស់ក្រសួងអប់រំ អង្គការជាតិ-អន្តរជាតិ ការពង្រឹងសិទ្ធិអំណាចក្នុងសហគមន៍ដើម្បីធ្វើឱ្យពួកគាត់កាន់តែមានភាពសកម្មឡើង គឺជាផ្នែកមួយជួយដល់ការអប់រំលើកុមារ។
លោក សន ជ័យ ថ្លែងថា៖ «កុមារមានឱកាសរៀនសូត្រនៅសាលាតាមពេលវេលាកំណត់ ប៉ុន្តកុមារត្រូវការការរួមចំណែកពីអាណាព្យាបាល ដូចជាការជួយពង្រឹងសមត្ថភាពបន្ថែម ជួយតាមដានការសិក្សា ជួយរំឭកមេរៀន។ តែបើអាណាព្យាបាលមមាញឹកច្រើន អាហ្នឹងក៏ជាឧបសគ្គដល់ការរៀនសូត្ររបស់កូនដែរ»។
លោក សន ជ័យ ថាអ្នកពាក់ព័ន្ធគួរបង្កើតឱ្យមានបរិយាកាសសន្ទនារវាងអាណាព្យាបាលសិស្ស និងគណៈគ្រប់គ្រងសាលានៅតាមសហគមន៍។ លោកថា ទិដ្ឋភាពនេះគឺជាយន្តការមួយដែលអាចជួយបង្កើននូវគុណភាពអប់រំដល់កុមារដែរ ដោយថា សំឡេងរបស់អាណាព្យាបាលអាចតំណាងដល់កុមារ ហើយវាជាឱកាសសម្រាប់បំពេញតម្រូវការរបស់កុមារតាមភាពជាក់ស្តែង ជាពិសេសសាលារៀននៅតំបន់ជនបទដាច់ស្រយាល៕