រដ្ឋមន្ត្រីការបរទេសម៉ាឡេស៊ី បានឱ្យដឹងនៅថ្ងៃព្រហស្បតិ៍នេះថា សមាគមប្រជាជាតិអាស៊ីអាគ្នេយ៍ (អាស៊ាន) គួរតែធ្វើការគិតគូរឡើងវិញអំពីគោលនយោបាយមិនជ្រៀតជ្រែកកិច្ចការរបស់ប្រទេសជាសមាជិករបស់ខ្លួន ស្របពេលដែលវិបត្តិសិទ្ធិមនុស្សនៅក្នុងប្រទេសមីយ៉ាន់ម៉ាកាន់តែយ៉ាប់យ៉ឺនទៅ។
កាលពីថ្ងៃសុក្រសប្ដាហ៍មុន អាស៊ានបានសម្រេចដកវត្តមានមេដឹកនាំយោធាមីយ៉ាន់ម៉ាមិនឱ្យចូលរួមក្នុងកិច្ចប្រជុំកំពូលអាស៊ាន ដោយលើកឡើងពីកង្វះវឌ្ឍនភាពនៅក្នុងផែនទីបង្ហាញផ្លូវ ដើម្បីស្តារសន្តិភាពរបស់ប្រទេសមួយនេះ ដែលរបបយោធាបានយល់ព្រមជាមួយតំបន់កាលពីខែមេសាកន្លងទៅ។
ទោះជាយ៉ាងណា អាស៊ាននឹងអញ្ជើញតំណាងមីយ៉ាន់ម៉ាដែលមិនពាក់ព័ន្ធនយោបាយមួយរូប ដើម្បីចូលរួមក្នុងកិច្ចប្រជុំនេះជំនួសវិញ។
ទាក់ទិននឹងករណីនេះ ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្ត្រីការបរទេសម៉ាឡេស៊ី លោក Saifuddin Abdullah ដែលបានថ្លែងថា អាស៊ានគួរតែធ្វើការគិតគូរពិចារណាឱ្យបានល្អិតល្អន់អំពីគោលនយោបាយមិនជ្រៀតជ្រែករបស់ខ្លួន ខណៈដែលស្ថានការណ៍ក្នុងប្រទេសមីយ៉ាន់ម៉ាកាន់តែដុនដាបទៅ ក្នុងនោះ ជនស៊ីវិលជាង១ ០០០នាក់ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានា គិតចាប់តាំងពីរដ្ឋប្រហារ ថ្ងៃទី១ ខែកុម្ភៈ។
រដ្ឋមន្ត្រីការបរទេសរូបនេះបន្ថែមថា៖ «ខ្ញុំបានក្រើនរំឭកក្នុងកិច្ចប្រជុំកាលពីថ្ងៃសុក្រថា អាស៊ានគឺទាក់ទងទៅនឹងប្រទេសជាសមាជិកចំនួន១០។ បើទោះបីជាករណីដែលកើតឡើងនៅក្នុងប្រទេសមីយ៉ាន់ម៉ា គឺមានបញ្ហាជាតិក៏ដោយ ប៉ុន្តែវាក៏មានផលប៉ះពាល់ដល់តំបន់ផងដែរ»។
លោកបន្តថា៖ «ហើយខ្ញុំក៏បានបញ្ជាក់ផងដែរថា យើងមិនអាចប្រើគោលការណ៍មិនជ្រៀតជ្រែកក្នុងការចៀសវាងមិនដោះស្រាយបញ្ហាបាននោះទេ»។
លោក Saifuddin Abdullah បន្ថែមថា ការមិនជ្រៀតជ្រែកបានរួមចំណែកដល់អសមត្ថភាពរបស់អាស៊ានក្នុងការសម្រេចចិត្តប្រកបដោយប្រសិទ្ធភាព ហើយលោកក៏បានស្នើឱ្យមានការផ្លាស់ប្តូរឆ្ពោះទៅរកគោលនយោបាយថ្មីមួយនៃការចូលរួមក្នុងន័យស្ថាបនា ឬការមិនព្រងើយកន្តើយលើប្រទេសជាសមាជិកណាមួយផងដែរ៕
