ក្រសួងអប់រំ យុវជន និងកីឡា បានប្រកាសថា នឹងពង្រីកវិសាលភាពនៃការបើកសាលារៀនគ្រប់កម្រិតឡើងវិញនៅក្នុងក្របខណ្ឌទូទាំងប្រទេស ចាប់ពីថ្ងៃទី១ ខែវិច្ឆិកា ឆ្នាំ២០២១ តទៅ ក៏ប៉ុន្តែត្រូវធ្វើឡើងដោយការប្រយ័ត្នប្រយែងបំផុត។
យោងតាមសេចក្តីជូនដំណឹងរបស់ក្រសួងអប់រំ នៅល្ងាចថ្ងៃទី២១ ខែតុលានេះ បានឱ្យដឹងថា ចាប់ពីថ្ងៃទី១ ខែវិច្ឆិកា ឆ្នាំ២០២១ ក្រសួងនឹងពង្រីកវិសាលភាពនៃការបង្រៀន និងរៀនតាមបណ្តុំសម្រាប់គ្រឹះស្ថានសិក្សាសាធារណៈ និងឯកជន នៅគ្រប់កម្រិត ក្នុងភូមិសាស្ត្រទូទាំងរាជធានី ខេត្តទាំងអស់។ ការពង្រីកវិសាលភាពនេះ រួមបញ្ចូលទាំងការពង្រីកពីកម្រិតថ្នាក់ទី៩ និងទី១២ រហូតដល់គ្រប់កម្រិតថ្នាក់នៅមធ្យមសិក្សា និងពង្រីកវិសាលភាពដល់កម្រិតបឋមសិក្សា គ្រឹះស្ថានឧត្តមសិក្សាសាធារណៈនិងឯកជន វិទ្យាស្ថានជាតិអប់រំ វិទ្យាស្ថានបច្ចេកវិទ្យា គ្រឹះស្ថានបណ្តុះបណ្តាលគ្រូ គ្រឹះស្ថានសិក្សាអប់រំពិសេស សាលាអនុវត្តន៍ និងវិទ្យាល័យចំណេះទូទៅនិងអប់រំបច្ចេកទេស ដោយគោរពតាមយ៉ាងខ្ជាប់ខ្ជួននូវបទដ្ឋានសុខាភិបាលជាធរមាន។ ប៉ុន្តែថ្នាក់រៀននីមួយៗ ត្រូវកំណត់ចំនួនសិស្សចាប់ពី ១៥ ទៅ ២០ នាក់ និងត្រូវរៀនឆ្លាស់វេនគ្នា។
បើតាមក្រសួងអប់រំ ការសម្រេចឈានទៅបើកសាលារៀនឡើងវិញនេះ បានធ្វើឡើងបន្ទាប់ពីក្រសួងបានវាយតម្លៃទៅលើដំណើរការបង្រៀននិងរៀនតាមបណ្តុំសម្រាប់គ្រឹះស្ថានសិក្សាសាធារណៈ និងឯកជននាពេលកន្លងមក ដោយមិនមានបញ្ហាឆ្លងរាលដាលជំងឺកូវីដ-១៩ធ្ងន់ធ្ងរនោះទេ។ ក្រសួងក៏បានវាយតម្លៃដែរថា ការឆ្លងជំងឺកូវីដ-១៩ ទៅលើគ្រូបង្រៀន និងសិស្សានុសិស្ស ក្នុងរយៈពេល៧ថ្ងៃមុនពិធីបុណ្យភ្ជុំបិណ្ឌ និង៧ថ្ងៃក្រោយពិធីបុណ្យភ្ជុំបិណ្ឌកន្លងមក មានកម្រិតតិចតួច និងអាចគ្រប់គ្រងបាន។ ម្យ៉ាងវិញទៀត មាតាបិតា អាណាព្យាបាល គ្រូបង្រៀន និងសិស្សានុសិស្ស និស្សិត ក៏បានទទួលវ៉ាក់សាំងការពារជំងឺកូវីដ-១៩ ក្នុងអត្រាខ្ពស់ផងដែរ៕
