អ្នកភូមិអះអាងថា ពួកគេប្រហែល១៥០នាក់ នៅឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បានបន្តតវ៉ាទៀតនៅថ្ងៃព្រហស្បតិ៍នេះ ខណៈទាហានមិនព្រមឈប់ធ្វើសកម្មភាពឈូសឆាយដីព្រៃសហគមន៍ដែលពួកគេបានការពារជាង២០ឆ្នាំ។
គិតមកដល់ថ្ងៃនេះ មានរយៈពេល៣ថ្ងៃហើយដែលក្រុមពលរដ្ឋទាំងនោះអះអាងថា ក្រុមទាហានបានដាក់គ្រឿងចក្រធ្វើសកម្មភាពឈូសឆាយដីព្រៃសហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» ស្ថិតនៅភូមិពោធិ៍មាស ឃុំត្រពាំងជោ ស្រុកឱរ៉ាល់ ដើម្បីបែងចែកទៅឱ្យគ្រួសារកងទ័ពចំនួន៤១គ្រួសារ។
សមាជិកសហគមន៍ម្នាក់ អ្នកស្រី ឈួន សុំ ប្រាប់ វីអូឌី ថាអ្នកភូមិប្រហែល១៥០នាក់មកពីឃុំត្រពាំងជោ បានប្រមូលផ្ដុំគ្នាតវ៉ាជាថ្មីទៀតនៅថ្ងៃនេះ ដោយសារក្រុមទាហាននៅតែបន្តដាក់គ្រឿងចក្រឈូសឆាយដីព្រៃសហគមន៍។
សមាជិកសហគមន៍រូបនេះបន្តថា ក្រុមទាហានបានផ្អាកសកម្មភាពនៅពេលដែលពលរដ្ឋមកតវ៉ាច្រើន ប៉ុន្តែពេលពលរដ្ឋត្រលប់ទៅលំនៅឋានវិញ ពួកគេបន្តធ្វើសកម្មភាពទៀត។ អ្នកស្រីថា សកម្មភាពឈូសឆាយរយៈពេល៣ថ្ងៃនេះ អស់ដីព្រៃសហគមន៍ប្រហែល៥ហិកតាទៅហើយ។
អ្នកស្រីបន្ថែមថា៖ «ប្រជាពលរដ្ឋបានដេញមកដាក់កន្លែងជុំរុំវិញ អត់ឱ្យឈូសឆាយបន្តទៀត ប៉ុន្តែពេលពលរដ្ឋមកផ្ទះអស់ វាលួចឈូសទៀត! ពេលពលរដ្ឋទៅដល់ វាសម្រាក! ប្រជាពលរដ្ឋឱ្យចេញពីកន្លែង វាសម្រាកដែរ ប៉ុន្តែគេអត់ព្រមចេញ»។
សមាជិកសហគមន៍ម្នាក់ទៀត លោក សុខ ឃឿន បង្ហាញការបារម្ភពីការបាត់បង់ដីព្រៃសហគមន៍ទាំងស្រុង ប្រសិនបើមិនមានការជួយអន្តរាគមន៍ពីស្ថាប័នពាក់ព័ន្ធ។ លោកថា គិតមកដល់ពេលនេះ សហគមន៍ «ឧត្ដមស្រែខ្ពស់» មានជម្លោះដីធ្លីជាមួយក្រុមទាហានចំនួន២ដងហើយ ដោយលើកទី១ មានជម្លោះជាមួយក្រុមទាហានលេខ «ង៧០» បានបាត់បង់ដីព្រៃសហគមន៍អស់៧៨ហិកតា និងលើកទី២នេះ បាត់បង់ដីជាង២៦២ហិកតាទៀត។
លោកបន្តថា សហគមន៍ឧត្ដមស្រែខ្ពស់ បានបម្រើផលប្រយោជន៍ដល់ប្រជាពលរដ្ឋចំនួន៣ភូមិ នៃឃុំត្រពាំងជោ ដូចជា កន្លែងសម្រាប់ឃ្វាលគោក្របី បោចវល្លិ រកផ្សិត បន្លែ និងរកអនុផលព្រៃឈើផ្សេងទៀត ហើយថា សហគមន៍នេះក៏ជាកន្លែងជម្រកសត្វព្រៃច្រើនប្រភេទផងដែរ។
បើតាមលោក សុខ ឃឿន កាលពីដើមឡើយ សហគមន៍«ឧត្ដមស្រែខ្ពស់» ហៅ «ព្រៃមេត្តាធម្មជាតិ» មានផ្ទៃដីព្រៃទំហំជាង២ ០០០ហិកតា ប៉ុន្តែក្រោយមក មានក្រុមហ៊ុនឯកជននិងក្រុមទាហានបានចូលទៅរំលោភយកជាបន្តបន្ទាប់ ដោយបច្ចុប្បន្នសហគមន៍នេះសល់ដី៨៨៧ហិកតាប៉ុណ្ណោះ។
លោកបន្ថែមថា៖ «បើអារម្មណ៍របស់ខ្ញុំ ខ្ញុំព្រួយមែនទែន ពីព្រោះដីព្រៃសហគមន៍ហ្នឹង វានៅសល់តិចបំផុត នៅសល់ប្រហែល៨៨៧ហិកតា ដល់ឥលូវគេយកជិត៣០០ហិកតា មានអីទៀត វាអស់រលីងហើយហ្នឹង។ ហើយក្នុងហ្នឹងមានដីស្រែរបស់ប្រជាពលរដ្ឋផង មិនមែនដីព្រៃសុទ្ធអីណា បើនិយាយទៅ ប្រជាពលរដ្ឋទូទាំងឃុំត្រពាំងជោហ្នឹងហើយដែលអាស្រ័យផលពីសហគមន៍ហ្នឹង»។
មេឃុំត្រពាំងជោ លោក ទេព ណែម មានប្រសាសន៍យ៉ាងខ្លីថា ដីដែលអាជ្ញាធរកំពុងធ្វើសកម្មភាពឈូសឆាយនោះ គឺមិនស្ថិតក្នុងព្រៃសហគមន៍ទេ។
មេឃុំរូបនេះបន្តថា ដីនោះគឺរដ្ឋាភិបាលបានចេញអនុក្រឹត្យកាត់ទៅឱ្យគ្រួសារកងទ័ពរួចទៅហើយ ដែលលោកជាមន្ត្រីថ្នាក់ក្រោមមិនអាចដោះស្រាយឬសម្រេចអ្វីបានឡើយ។
លោកបន្ថែមថា៖ «ដីនេះ ខាងថ្នាក់លើគេចេញច្បាប់ត្រឹមត្រូវ ឱ្យមានការឈូសឆាយ អ៊ីចឹងចង់តវ៉ាអី មានតែថ្នាក់លើទេជាអ្នកសម្រេច»។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយដោយសម្រេចកាត់ដីទំហំ២៦២,២៤ហិកតា ពីដែនជម្រកសត្វព្រៃភ្នំឱរ៉ាល់ ស្ថិតនៅភូមិសាស្ត្រភូមិពោធិ៍មាស ឃុំត្រពាំងជោ ដើម្បីប្រទានកម្មជាកម្មសិទ្ធិជូនគ្រួសារយោធិនបញ្ជាការដ្ឋានរថក្រោះកងទ័ពជើងគោក និងប្រជាពលរដ្ឋសរុប៤១គ្រួសារ សម្រាប់កសាងលំនៅឋាន និងបង្កបង្កើនផល។
មន្ត្រីសម្របសម្រួលសមាគមអាដហុកប្រចាំខេត្តកំពង់ស្ពឺ លោក រ័ត្ន ថាវី មានប្រសាសន៍ថា ដែនជម្រកសត្វព្រៃភ្នំឱរ៉ាល់ គឺការពារដោយព្រះរាជក្រឹត្យ។ លោកថា ប្រសិនបើរដ្ឋាបាលចង់ដកហូតឬកាត់ចេញដើម្បីធ្វើអ្វីមួយនោះ លុះត្រាតែមានការយល់ព្រមពីព្រះមហាក្សត្រ តាមរយៈការស្នើសុំនិងអនុវត្តទៅតាមច្បាប់អនុប្រយោគ ដោយមិនអាចចេញជាអនុក្រឹត្យ ហើយកាត់ចេញបាននោះទេ។
បើតាមក្រុមប្រជាពលរដ្ឋ ពួកគេនឹងដាក់សំណើទៅក្រសួងស្ថាប័នរដ្ឋដែលពាក់ព័ន្ធនៅពេលឆាប់ៗខាងមុខនេះ ដើម្បីសុំឱ្យរដ្ឋាភិបាលពិចារណាឡើងវិញ និងបញ្ឈប់សកម្មភាពឈូសឆាយដីព្រៃសហគមន៍របស់ពួកគេ ដោយរក្សាព្រៃនោះឱ្យអ្នកភូមិបានបន្តអាស្រ័យផល និងទុកសម្រាប់កូនចៅជំនាន់ក្រោយផងដែរ៕