សាលាដំបូងរាជធានីភ្នំពេញ នឹងបើកសវនាការកាត់ក្ដីករណីអាណាព្យាបាលទារកប្ដឹងម្ចាស់ក្រុមហ៊ុនម្សៅទឹកដោះគោ Nutrilatt នៅចុងខែវិច្ឆិកាខាងមុខនេះ ខណៈអាណាព្យាបាលទារករងគ្រោះ បានទទូចស្នើសុំឱ្យតុលាការឆាប់បញ្ចប់សំណុំរឿងមួយនេះ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានមានប្រសាសន៍ប្រាប់ វីអូឌី កាលពីល្ងាចថ្ងៃព្រហស្បតិ៍ថា សំណុំរឿងម្សៅទឹកដោះគោ Nutrilatt គឺកំពុងស្ថិតនៅក្នុងដំណាក់កាលចៅក្រមជំនុំជម្រះនៅឡើយ។
លោកថា៖ «នៅដំណាក់កាលចៅក្រមជំនុំជម្រះ កម្មវិធីជំនុំជម្រះបន្តនៅថ្ងៃទី២៣ ខែវិច្ឆិកា ឆ្នាំ២០២១»។
ម្ដាយទារករងគ្រោះដែលមានទីលំនៅនៅរាជធានីភ្នំពេញ អ្នកស្រី ចាន់ ផល្គុណ ឱ្យដឹងថា ក្រោយដាក់ពាក្យបណ្ដឹង នៅថ្ងៃទី១៣ ខែតុលា ថ្មីៗនេះ ចៅក្រមបានកោះហៅអាណាព្យាបាលរងគ្រោះទៅបំភ្លឺតទល់នឹងម្ចាស់ក្រុមហ៊ុនដែលជាចុងចោទដែរ ប៉ុន្តែម្ចាស់ក្រុមហ៊ុនតែងតែអូសបន្លាយពេលវេលា ក្នុងការបង្ហាញមុខនូវទំនួលខុសត្រូវចំពោះជនរងគ្រោះដែលមានបញ្ហាដោយសារផលិតផលនោះ។
អ្នកស្រីនិយាយថា៖ «បើសិនជាមានការពន្យារពេលឬបន្លាយពេលយូរទៀត យើងអត់អាចមានឱកាសក្នុងការប្ដឹងតវ៉ាអីទៀតទេ គឺយើងមានតែទទូចឱ្យតុលាការ ចៅក្រម គាត់មេត្តាទុករឿងនេះជាអាទិភាព។ ត្បិតតែរឿងនេះ វាត្រូវការពេលវេលាយូរក្នុងការសិក្សា ប៉ុន្តែយើងក៏ត្រូវការភាពទទួលខុសត្រូវ និយាយឱ្យចំគឺសំណងមួយចំនួន ដើម្បីយកមកចំណាយលើការលូតលាស់របស់កូនយើងដូចគ្នា»។
ចំណែកម្ដាយទារករងគ្រោះម្នាក់ទៀត រស់នៅខេត្តតាកែវ អ្នកស្រី ជា សុគន្ធារី និយាយថា កូនប្រុសរបស់អ្នកស្រីបានបៅទឹកដោះគោ Nutrilatt តាំងពីទើបតែកើតបានមួយខែ។ អ្នកស្រីបន្តថា ពីដំបូងមិនបានចាប់អារម្មណ៍ថាកូនមានបញ្ហាសុខភាពនោះទេ គឺគ្រាន់តែកត់សម្គាល់ថា កូនមានស្បែកសឡើងៗ រហូតដល់កូនរបស់គាត់អាយុបាន៩ខែ ទើបអ្នកស្រីចាប់ផ្ដើមឃើញពីលក្ខណៈខុសប្លែក ស្លេកស្លាំង រហូតដល់ឃើញមានការចែកចាយលើបណ្ដាញសង្គមពីករណីទារកបញ្ចូលឈាម មានបញ្ហាសុខភាព ដោយសារបៅម្សៅទឹកដោះគោនេះ។
អ្នកស្រីបន្តថា៖ «ជាតិដែក ស័ង្កសី សំខាន់ណាស់សម្រាប់ការលូតលាស់សុខភាពរបស់ក្មេង ដែលក្នុងម្សៅទឹកដោះគោត្រូវមាន។ ប៉ុន្តែជាក់ស្ដែង ក្នុងទឹកដោះគោមួយហ្នឹងដែលកូនខ្ញុំបៅ គឺអត់មានសោះ ដូចអឹម [បៅ] ខ្យល់ហ្នឹង! ចង់ឱ្យគាត់ [តុលាការ] ពន្លឿនការកាត់ក្ដី អត់ចង់់ឱ្យគាត់អូសបន្លាយទៀតទេ»។
យ៉ាងណា អ្នកស្រី ជា សុគន្ធារី មានសុទិដ្ឋិនិយមថា តុលាការនឹងកាត់ក្ដីឱ្យម្ចាស់ក្រុមហ៊ុនចេញមុខមកទទួលទោសតាមផ្លូវច្បាប់ ដូចជា សងជាសំណងសមរម្យ ជាដើម សម្រាប់ការស្រោចស្រង់សុខភាពទារករងគ្រោះដោយសារផលិតផលរបស់ក្រុមហ៊ុន Nutrilatt។
នាយកប្រតិបត្តិក្រុមហ៊ុនម្សៅទឹកដោះគោ Nutrilatt លោក ទឹម សុវណ្ណារ៉ា សុំមិនបកស្រាយអ្វីឡើយ នៅពេល វីអូឌី ទាក់ទងសុំការឆ្លើយតប ដោយលោកបានត្រឹមអះអាងថា លោកបានធ្វើតាមផ្លូវច្បាប់រួចអស់ហើយ។
លោកថា៖ «ថ្ងៃហ្នឹង ចៅក្រមគាត់បានលើកឡើងហើយតើបង! ខ្ញុំអត់មានអីបកស្រាយទេ ព្រោះខ្ញុំមិនមែនចៅក្រមផង។ […] ខ្ញុំសុំមិនបកស្រាយល្អជាង ទុកឱ្យខាងគាត់ [អាណាព្យាបាលទារក] បកស្រាយតែម្ខាងចុះ ព្រោះខ្ញុំបានធ្វើអីតាមច្បាប់ទាំងអស់ហើយបង អត់អីទេ!»
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ក្រុមហ៊ុនត្រូវតែមានសំណងដល់អាណាព្យាបាលទារករងគ្រោះ ដើម្បីឱ្យអ្នកទាំងនោះមានលទ្ធភាពព្យាបាលកូនរបស់ពួកគាត់ ហើយបើសិនក្រុមហ៊ុនមានការយឺតយ៉ាវមិនព្រមសង រដ្ឋាភិបាលត្រូវតែធ្វើអន្តរាគមន៍។
លោកបន្តថា៖ «អាហ្នឹងវាធ្វើឱ្យមានគ្រោះថ្នាក់ដល់កុមារ បើនៅតែមានការលើកលែងពួកអ្នកលក់ផលិតផលក្លែងក្លាយ អ្នកលក់ផលិតផលខូចគុណភាព [នោះវា] នឹងក្លាយជាឋានសួគ៌របស់ពួកមនុស្សខូច ដែលគាត់នឹងយកផលិតផលអស់ហ្នឹងមកលក់នៅទីផ្សារកម្ពុជា ហើយដែលធ្វើឱ្យប៉ះពាល់ដល់សុខភាពពលរដ្ឋ។ រដ្ឋាភិបាលដែលជាអ្នកមានកាតព្វកិច្ចក្នុងការការពារសុខភាពពលរដ្ឋ មានកាតព្វកិច្ចក្នុងការប្រយុទ្ធប្រឆាំងនឹងផលិតផលក្លែងក្លាយ ផលិតផលខូចគុណភាពហ្នឹង គេនឹងមើលឃើញថា តួនាទីនេះមានភាពអសកម្មទៅវិញ»។
ក្រុមហ៊ុនម្សៅទឹកដោះគោ Nutrilatt កាលពីថ្ងៃទី៩ ខែកញ្ញា ឆ្នាំ២០២០ បានប្រកាសទទួលស្គាល់ថា ផលិតផលជំនួសទឹកដោះម្ដាយរបស់ខ្លួនមានបញ្ហា ហើយប្រកាសទទួលខុសត្រូវលើផលប៉ះពាល់ទៅលើទារកដែលបានទទួលទានផលិតផលរបស់ខ្លួន។ ក្នុងលិខិតនោះ ក្រុមហ៊ុន Nutrilatt Master LM Co., Ltd បានបង្ហាញការសោកស្ដាយនិងស្នើសុំអភ័យទោសពីមាតាបិតានៃទារកដែលបានធ្លាក់ខ្លួនឈឺក្រោយពីទទួលទានម្សៅទឹកដោះគោរបស់ខ្លួន។ ក្រុមហ៊ុននេះបានទទួលស្គាល់ថា ម្សៅទឹកដោះគោរបស់ខ្លួនដែលមានលេខកូដ៦ប្រភេទ មានបញ្ហាបច្ចេកទេសលើធាតុផ្សំដែលបណ្ដាលឱ្យប៉ះពាល់ដល់សុខភាពទារក។
សំណុំរឿងកំណើនកុមារឈឺជំងឺស្លេកស្លាំងដោយកង្វះជាតិដែកធ្ងន់ធ្ងរ បានកើតឡើងតាំងពីខែមេសា ឆ្នាំ២០២០មកម៉្លេះ។ អត្ថបទស៊ើបអង្កេតរបស់ វីអូឌី ដែលចេញផ្សាយកាលពីថ្ងៃទី២០ ខែឧសភា ឆ្នាំ២០២០ រកឃើញថា ជាង៩០% ក្នុងចំណោមកុមារ៣៤នាក់ដែលរងគ្រោះដោយសារជំងឺនេះ បានបៅទឹកដោះគោម៉ាក នុតទ្រីលែត១ (Nutrilatt 1)។
ដោយឡែក ផ្អែកតាមលទ្ធផលពិសោធន៍ពីមន្ទីរពិសោធន៍សិង្ហបុរីវិញ រកឃើញថា ផលិតផលនុតទ្រីលែត មិនបានបំពេញតម្រូវការអប្បបរមាលើកម្រិតជាតិដែកដែលមានកំណត់ក្នុងស្ដង់ដារ Codex [សុវត្ថិភាពអាហារសម្រាប់មនុស្សគ្រប់រូបនៅគ្រប់ទីកន្លែង] នោះទេ។ ជាក់ស្ដែង ផលិតផលនេះស្ទើរតែគ្មានជាតិដែកសោះ ពោលគឺកម្រិតជាតិដែកមានត្រឹមតែ <០,២៥មីលីក្រាម/១០០ក្រាមប៉ុណ្ណោះ។ ស្ដង់ដារអន្តរជាតិ គឺតម្រូវការជាតិដែកយ៉ាងតិចណាស់ ២,២៨៦មីលីក្រាម/១០០ក្រាម សម្រាប់ទារកអាយុ០ខែដល់៦ខែ (ទឹកដោះគោម្សៅលេខ១) និង ៤,៧២មីលីក្រាម/១០០ក្រាម សម្រាប់កុមារអាយុពី៦ខែដល់១២ខែ (ទឹកដោះគោម្សៅលេខ២)៕