មជ្ឈមណ្ឌលសិល្បៈ និងវប្បធម៌ជាតិ (National Academy of Fine and Dramatic Arts) នៅក្នុងរដ្ឋធានីដាកា (Dhaka) ប្រទេសបង់ក្លាដែស បានបើកដំណើរការឡើងវិញ បន្ទាប់ពីការបិទខ្ទប់អស់រយៈពេលជាង១៨ខែ ដោយសារតែករណីជំងឺរាតត្បាតកូវីដ-១៩។
ទីតាំងនេះ ត្រូវបានបង្កើតឡើងក្នុងឆ្នាំ១៩៧៤ ខណៈដែលទីកន្លែងនេះក៏ត្រូវបានចាត់ទុកថាជាមជ្ឈមណ្ឌលដ៏សំខាន់មួយសម្រាប់រៀបចំសិក្ខាសាលា កិច្ចប្រជុំ និងវគ្គបណ្ដុះបណ្ដាលឯកទេសរយៈពេលខ្លី បន្ថែមពីលើការផ្ដល់អាហារូបករណ៍និងជំនួយហិរញ្ញវត្ថុសម្រាប់សិល្បករដែលមានទេពកោសល្យ និងរៀបចំការប្រកួតប្រជែងក្នុងវិស័យសិល្បៈផ្សេងៗ។
បន្ទាប់ពីមានការសម្រេចចិត្តបើកឡើងវិញ សិល្បករនានាបានសម្ដែងនូវសេចក្ដីរីករាយនិងការពេញចិត្តដែលអាចបន្តការងាររបស់ពួកគេបានសារជាថ្មី ជាពិសេសជាមួយនឹងការត្រលប់មកវិញនៃពិធីបុណ្យវប្បធម៌ «Ganga Jamuna Cultural Festival 2021»។
នៅក្នុងបទសម្ភាសជាមួយសារព័ត៌មាន A24 News អ្នករចនាមួយរូប លោក Thandu Rayhan ថ្លែងថា៖ «មនុស្សគ្រប់គ្នាដែលធ្វើការនៅក្នុងទីតាំងនេះ ទទួលបានអារម្មណ៍រំភើបយ៉ាងខ្លាំងដែលពោរពេញទៅដោយភាពរីករាយ ក្នុងការអាចយកឈ្នះលើករណីឆ្លងរីករាលដាលនៃមេរោគកូវីដ-១៩ បាន។ ដូច្នេះ យើងអាចមើលឃើញបានថា សកម្មភាពទាំងឡាយបានវិលត្រលប់មកកាន់អ្នកដែលធ្វើការក្នុងទីតាំងនេះវិញហើយ ស្របពេលដែលយើងកំពុងតែរៀបចំពិធីបុណ្យវប្បធម៌ប្រកបដោយភាពរីករាយ»។
ប្រធានក្រុមរបាំបាឡេបង់ក្លាដែស (Bangladesh Ballet Troup) លោក Amanul Haque បានឱ្យដឹងថា៖ «វប្បធម៌នាំមកនូវអត្តសញ្ញាណជាតិ និងធ្វើឱ្យជាតិសាសន៍មួយកាន់តែមានភាពស្រស់បំព្រង។ ក្នុងអំឡុងពេលនៃការរីករាលដាលចុងក្រោយនៃវីរុសកូរ៉ូណា សកម្មភាពវប្បធម៌របស់យើងត្រូវបានបិទទាំងស្រុង។ ទោះជាយ៉ាងណាក៏ដោយ យើងអាចត្រលប់មកកាន់សកម្មភាពនេះវិញបាន បន្ទាប់ពីករណីជំងឺរាតត្បាតមានសភាពស្ងប់ស្ងាត់។ យើងអាចវិលត្រលប់មកវិញនៅក្នុងពេលវេលាដ៏ល្អមួយ ខណៈដែលមនុស្សទូទៅអាចចូលរួមបានដោយក្ដីរីករាយ»។
អ្នកជំនាញផាត់មុខនៃមជ្ឈមណ្ឌល Shilpakala Academy ប្រទេសបង់ក្លាដែស លោក Lutfor Rahman បានលើកឡើងថា៖ «មជ្ឈមណ្ឌលនេះត្រូវបានបិទអស់រយៈពេលប្រមាណជាមួយឆ្នាំកន្លះមកហើយ ក្នុងអំឡុងពេលមានការឆ្លងរីករាលដាលធ្ងន់ធ្ងរនៃវីរុសកូវីដ-១៩។ ហើយពួកយើងដែលជាអ្នកបម្រើការក្នុងទីតាំង បានជួបប្រទះបញ្ហាជាច្រើនក្នុងការមកកាន់ទីនេះ។ វាគឺជាអារម្មណ៍ដ៏ល្អមួយដែលយើងអាចមកកាន់ទីនេះម្តងទៀត បន្ទាប់ពីខកខានអស់រយៈពេលជាយូរ។ បច្ចុប្បន្ន យើងបានចាប់ផ្ដើមការហ្វឹកហាត់របស់យើងឡើងវិញហើយ»។
សកម្មជនវប្បធម៌មួយរូប អ្នកស្រី Mahfuja Akhter Meera បានបញ្ជក់ឱ្យដឹងថា៖ «មនុស្សទូទៅដែលរួមទាំងសកម្មជនវប្បធម៌ទាំងឡាយ ទទួលបានអារម្មណ៍រស់រានឡើងវិញហើយ។ យើងរីករាយដែលបានជួបអ្នករាល់គ្នាឡើងវិញ គិតចាប់ពីថ្ងៃទី១ ខែតុលា ហើយវាពិតជាសេចក្ដីសោមនស្សណាស់សម្រាប់យើង»។
ជាមួយគ្នានេះដែរ អ្នកគាំទ្រសិល្បៈវប្បធម៌ម្នាក់ អ្នកស្រី Arifa Sultana ក៏បានលើកឡើងថា៖ «បន្ទាប់ពីរយៈពេលដ៏យូរនៃជំងឺរាតត្បាតកូវីដ-១៩ ខ្ញុំរីករាយខ្លាំងណាស់នៅពេលនេះ ដែលបានមកកាន់មជ្ឈមណ្ឌល Shilpakala Academy សារជាថ្មីម្ដងទៀត។ កាលពីពេលកន្លងទៅ ខ្ញុំតែងតែមកកាន់ទីនេះជាមួយនឹងក្មេងៗ។ ទីតាំងនេះត្រូវបានបិទដំណើរការអស់រយៈពេលយ៉ាងយូរ ដោយសារជំងឺរាតត្បាត។ បច្ចុប្បន្ននេះ ស្ថានការណ៍មានភាពប្រសើរឡើងវិញហើយ»។
សកម្មជនវប្បធម៌មួយរូបទៀត លោក Mshruk Titu បានថ្លែងថា៖ «វាគឺជាកម្លាំងចលករថ្មីមួយសម្រាប់អ្នកធ្វើការផ្នែកវប្បធម៌ទាំងឡាយ ខណៈដែលអង្គការប្រមាណជា១៤០នៅទូទាំងប្រទេសកំពុងចូលរួមក្នុងពិធីបុណ្យវប្បធម៌នេះ រួមជាមួយនឹងការរាំ ចម្រៀង ការសូត្រកំណាព្យ និងការសម្ដែងនានា»៕
