ប្រធានាធិបតីហ្វីលីពីន លោក រ៉ូឌ្រីហ្គោ ឌុយទែរតេ (Rodrigo Duterte) បានឱ្យដឹងនៅថ្ងៃព្រហស្បតិ៍ម្សិលមិញថា លោកនឹងទទួលខុសត្រូវទាំងស្រុង ចំពោះសង្គ្រាមប្រឆាំងគ្រឿងញៀនដែលបានបង្កឱ្យមនុស្សរាប់ពាន់នាក់ស្លាប់បាត់បង់ជីវិត។
ទីភ្នាក់ងារសារព័ត៌មាន Reuters បានស្រង់សម្ដីប្រធានាធិបតីរូបនេះ ដែលបានថ្លែងនៅក្នុងសុន្ទរកថាមួយថា៖ «បើសិនជាមាននរណាម្នាក់ត្រូវជាប់ពន្ធនាគារ ម្នាក់នោះហើយគឺជាខ្ញុំ»។
លោកបន្ថែមថា៖ «ខ្ញុំសូមទទួលខុសត្រូវទាំងស្រុងលើករណីនេះ»។
ការថ្លែងរបស់លោក រ៉ូឌ្រីហ្គោ ឌុយទែរតេ នេះ ត្រូវបានធ្វើឡើងមួយថ្ងៃបន្ទាប់ពីក្រសួងយុត្តិធម៌ ប្រកាសថា នឹងពិនិត្យមើលឡើងវិញពីករណីនៃការស្លាប់បាត់បង់ជីវិតមនុស្សរាប់ពាន់នាក់ នៅក្នុងយុទ្ធនាការប្រឆាំងគ្រឿងញៀនរយៈពេល៥ឆ្នាំរបស់លោក ឌុយទែរតេ។
គួរបញ្ជាក់ថា ប្រទេសហ្វីលីពីនបានទទួលរងសម្ពាធពីអង្គការសហប្រជាជាតិ ក្នុងការស៊ើបអង្កេតលើការចោទប្រកាន់ពីបទឃាតកម្មជាប្រព័ន្ធលើជនសង្ស័យគ្រឿងញៀនទាំងឡាយ ខណៈដែលតុលាការឧក្រិដ្ឋកម្មអន្តរជាតិ (ICC) កាលពីពេលថ្មីៗនេះក៏បានប្រកាសថា ខ្លួននឹងស៊ើបអង្កេតយុទ្ធនាការប្រឆាំងគ្រឿងញៀនរបស់លោក ឌុយទែរតេ ដែលបានសម្លាប់មនុស្សជាង៦ ០០០ នាក់ផងដែរ។
ទោះជាយ៉ាងណា លោក រ៉ូឌ្រីហ្គោ ឌុយទែរតេ ដែលនឹងត្រូវបញ្ចប់អាណត្តិនៅឆ្នាំក្រោយនេះ នៅតែលើកឡើងពីការបន្តយុទ្ធនាការរបស់លោក ក្នុងការបង្រ្កាបអ្នកជួញដូរគ្រឿងញៀននៅក្នុងប្រទេស ដោយថ្លែងថា៖ «ខ្ញុំសូមបញ្ជាក់សារជាថ្មីនូវអ្វីដែលខ្ញុំបានលើកឡើងកាលពីពេលកន្លងទៅថា ប្រសិនបើអ្នកបំផ្លាញប្រទេសរបស់ខ្ញុំនិងយុវជន តាមរយៈការផ្ដល់គ្រឿងញៀនដល់ពួកគេ គឺមានន័យថាអ្នកបំផ្លាញអនាគត»។
លោកបន្តថា៖ «ហើយបើសិនជាអ្នកបំផ្លាញប្រទេសជាតិ ខ្ញុំនឹងកម្ចាត់អ្នក»៕