រដ្ឋាភិបាលកម្ពុជានៅព្រឹកថ្ងៃទី២៣ ខែតុលានេះ បានធ្វើពិធីអបអរសាទរខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីសជាឱឡារិកលើកដំបូងនៅឯវិមានសន្តិភាព។
លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា តំណាងឱ្យលោកនាយករដ្ឋមន្ត្រី ហ៊ុន សែន និងឯកអគ្គរាជទូតជប៉ុនប្រចាំនៅកម្ពុជាលោក Mikami Masahiro (តំណាងឱ្យអង្គទូតនិងប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស) ធ្វើជាអធិបតីនៅក្នុងពិធីនៅថ្ងៃនេះ។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជាកាលពីថ្ងៃទី២២ ខែតុលា បានឱ្យដឹងថា ពិធីអបអរសាទរនេះ មានការចូលរួមតំណាងមកពីស្ថាប័នព្រឹទ្ធសភា រដ្ឋសភា រាជរដ្ឋាភិបាល អង្គទូត និងការិយាល័យអង្គការសហប្រជាជាតិ នៅរាជធានីភ្នំពេញ។ ក្រៅពីនេះ រដ្ឋមន្ត្រីកិច្ចការអឺរ៉ុប និងការបរទេសបារាំងលោក Jean-Yves Le Drian និងរដ្ឋមន្ត្រីការបរទេសឥណ្ឌូនេស៊ីលោកស្រី Retno L.P. Marsudi តំណាងឱ្យសហប្រធាននៃកិច្ចព្រមព្រៀងសន្តិភាពទីក្រុងប៉ារីសផ្ញើសារអបអរសាទរផងដែរ។
គួរកត់សម្គាល់ថា នេះគឺជាលើកទី១ហើយ ដែលរដ្ឋាភិបាលកម្ពុជាបានប្រារព្ធពិធីអបអរសាទរកិច្ចព្រមព្រៀងសន្តិភាពទីក្រុងប៉ារីសយ៉ាងឱឡារិក។ បន្ថែមលើនេះ រដ្ឋាភិបាលកម្ពុជា ក៏បានបោះពុម្ពក្រដាសប្រាក់ថ្មីប្រភេទ ៣០ ០០០ រៀល ដើម្បីទុកជាអនុស្សាវរីយ៍ ដោយបានរំលេចរូបថតរបស់លោកនាយករដ្ឋមន្ត្រី ហ៊ុន សែន និងព្រះឆាយាលក្ខណ៍ របស់ព្រះបរមរតនាកោដ្ឋ នរោត្ដមសីហនុ ផងដែរ៕
