ប្រជាពលរដ្ឋ អង្គការសង្គមស៊ីវិល រដ្ឋាភិបាល និងអតីតគណបក្សប្រឆាំងនៅក្រៅប្រទេស បានអបអរសាទរយ៉ាងផុសផុលខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីសដែលខុសពីបណ្តាឆ្នាំមុនៗ។
នៅប្រទេសបារាំងបាតុកម្មដឹកនាំដោយលោក សម រង្ស៊ី នៅឯរូបសំណាក Paris La Place de la République ដែលមានពលរដ្ឋខ្មែរបារាំងរាប់រយនាក់ចូលរួម។ ចំណែកនៅសហរដ្ឋអាមេរិកវិញ បាតុកម្មក៏មានដែរនៅមុខមន្ទីររដ្ឋសភាអាមេរិក ដើម្បីទាមទារឲ្យលោកនាយករដ្ឋមន្ត្រី ហ៊ុន សែន អនុវត្តតាមកិច្ចព្រមព្រៀងសន្តិភាពទីក្រុងប៉ារីស។ ក្រៅពីនោះ ការជួបជុំរបស់ប្រជាពលរដ្ឋខ្មែរនៅតាមបណ្តារដ្ឋនានាក៏បានរៀបចំផងដែរ ដូចជាពលរដ្ឋខ្មែរនៅទីក្រុងឡុងប៊ិច (Long Beach) នៃរដ្ឋកាលីហ្វ័រញ៉ា (California) និងពលរដ្ឋខ្មែរ និងខ្មែរ-អាមេរិកាំង នៅក្នុងទីក្រុងហ្វីឡាដែលហ្វៀ (Philadelphia) នៃរដ្ឋភែនស៊ីលវែនញ៉ា (Pennsylvania) ជាដើម។
តំណាងឱ្យប្រជាពលរដ្ឋខ្មែរនៅរដ្ឋវ៉ាស៊ីនតោន សហរដ្ឋអាមេរិក និងសកម្មជនអតីតគណបក្សសង្គ្រោះជាតិនៅក្រៅប្រទេសលោក សុស ច័ន្ទតារា បានឱ្យដឹងថា ការប្រារព្ធខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីសនេះ គឺធ្វើឡើងក្នុងគោលបំណងដើម្បីបូកសរុបនិងតាមដានលទ្ធផលនៃការអនុវត្តន៍កិច្ចព្រមព្រៀងសន្តិភាពទីក្រុងប៉ារីសក្នុងរយៈពេល៣០ឆ្នាំមកនេះ ពីសំណាក់ភាគីពាក់ព័ន្ធ ជាពិសេសសំណាក់រដ្ឋាភិបាលកម្ពុជា។ លោកបន្តថា ក្នុងរយៈពេល ៣០ឆ្នាំមកនេះ រដ្ឋាភិបាលកម្ពុជាបានរំលោភលើកិច្ចព្រមព្រៀងសន្តិភាពទីក្រុងប៉ារីសតាមរយៈការំលាយគណបក្សប្រឆាំងធំជាងគេនៅកម្ពុជា គឺគណបក្សសង្គ្រោះជាតិ ការបិទសិទ្ធិសេរីភាពសកម្មភាពអង្គការសង្គមស៊ីវិល និងលំហរនៃលទ្ធិប្រជាធិបតេយ្យកំពុងរួមតូចជាដើម។ លោកបានអំពាវនាវឱ្យប្រជាពលរដ្ឋខ្មែរ ចងចាំជានិច្ចចំពោះកិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ តុលា ឆ្នាំ១៩៩១។
លោកបន្តថា៖ «សំខាន់យើងចង់ក្រើនរំលឹកដល់ប្រទេសប្រជាធិបតេយ្យទាំងអស់ ជាពិសេសភាគីដែលជាហត្ថលេខីនៃកិច្ចព្រមព្រៀងហ្នឹងឱ្យរំលឹកឡើងវិញ ហើយបន្តឃ្លាំមើលស្ថានភាពលទ្ធិប្រជាធិបតេយ្យនៅកម្ពុជា និងផ្តាំផ្ញើមកកាន់ប្រជាពលរដ្ឋកម្ពុជាកុំឱ្យភ្លេចពីកិច្ចព្រមព្រៀងសន្តិភាពទីក្រុងប៉ារីស ដែលមានអត្ថន័យធំធេងសម្រាប់ស្តារលទ្ធិប្រជាធិបតេយ្យនៅក្នុងស្រុកខ្មែរដែលធានាឱ្យមានការកសាងជាតិឱ្យរីកចំរើនឡើងវិញ»។
ការប្រារព្ធខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីសក៏មានដែរ នៅប្រទេសជប៉ុន និងប្រទេសអូស្ត្រាលីជាដើម។
ចំណែកនៅក្នុងប្រទេសកម្ពុជាវិញ បើទោះបីជាប្រជាពលរដ្ឋមិនអាចជួបជុំហែរក្បួនបានក្តី ក៏ប៉ុន្តែក្រុមអង្គការសង្គមស៊ីវិលក៏បានជួបជុំគ្នាពិភាក្សាតាមប្រព័ន្ធ Zoom ជុំវិញខ្លឹមសារនៃកិច្ចព្រមព្រៀងសន្តិភាពទីក្រុងប៉ារីសថ្ងៃ២៣ តុលា នេះ។
ស្របពេលជាមួយគ្នានេះ រដ្ឋាភិបាលកម្ពុជា ក៏បានប្រារព្ធពិធីនេះនៅវិមានសន្តិភាពយ៉ាងឱឡារិកផងដែរដោយមានការចូលរួមតំណាងមកពីស្ថាប័នព្រឹទ្ធសភា រដ្ឋសភា រាជរដ្ឋាភិបាល អង្គទូត និងការិយាល័យអង្គការសហប្រជាជាតិ នៅរាជធានីភ្នំពេញ។ ក្រៅពីនេះ រដ្ឋមន្ត្រីកិច្ចការអឺរ៉ុប និងការបរទេសបារាំងលោក Jean-Yves Le Drian និងរដ្ឋមន្ត្រីការបរទេសឥណ្ឌូនេស៊ីលោកស្រី Retno L.P. Marsudi តំណាងឱ្យសហប្រធាននៃកិច្ចព្រមព្រៀងសន្តិភាពទីក្រុងប៉ារីសផ្ញើសារអបអរសាទរផងដែរ។
ឧបនាយករដ្ឋមន្ត្រីរដ្ឋមន្ត្រីក្រសួងការបរទេសកម្ពុជាលោក ប្រាក់ សុខុន បានថ្លែងសុន្ទរកថា ដោយបានរំលឹកថា កិច្ចព្រមព្រៀងសន្តិភាពទីក្រុងប៉ារីសសំរេចទៅបាន គឺអាស្រ័យដោយគំនិត ឆន្ទៈ និងទឹកចិត្តស្នេហាជាតិពិតប្រាកដរបស់មហារដ្ឋបុរសមួយអង្គ និងមួយរូប នោះគឺ ព្រះបរមរតនៈកោដ្ឋព្រះបាទសម្តេច ព្រះនរោត្តម សីហនុ និងលោកនាយករដ្ឋមន្ត្រី ហ៊ុន សែន។ បើតាមលោក ប្រាក់ សុខុន ចាប់ពីទទួលបានតំណែងជានាយករដ្ឋមន្ត្រីភ្លាម លោកនាយករដ្ឋមន្ត្រី ហ៊ុន សែន បានប្រកាសថា មិនមានដំណោះស្រាយតាមផ្លូវយោធាឡើយ ចំពោះជំលោះនៅកម្ពុជា។ មានតែការចរចា និងដំណោះស្រាយនយោបាយ រវាងខ្មែរ និងខ្មែរ តែប៉ុណ្ណោះ។ បន្ថែមលើនេះ រដ្ឋាភិបាលកម្ពុជា ក៏បានបោះពុម្ពក្រដាសប្រាក់ថ្មីប្រភេទ ៣០ ០០០ រៀល ដើម្បីទុកជាអនុស្សាវរីយ៍ ដោយបានរំលេចរូបថតរបស់លោកនាយករដ្ឋមន្ត្រី ហ៊ុន សែន និងព្រះឆាយាលក្ខណ៍ របស់ព្រះបរមរតនាកោដ្ឋ នរោត្ដមសីហនុ ផងដែរ បើទោះបីកន្លងមក រដ្ឋាភិបាលកម្ពុជាបានរងការរិះគន់ថា ពុំសូវឱ្យតម្លៃដល់កិច្ចព្រមព្រៀងមួយនេះក្តី។
ចំណែកលោកបណ្ឌិត មាស នី អ្នកវិភាគនយោបាយបានលើកឡើងនៅក្នុងវេទិកាកិច្ចពិភាក្សាតាម Zoom មួយរៀបចំដោយសហគមន៍ខ្មែរនៅប្រទេសអូស្ត្រាលីដោយបានកត់សម្គាល់ថា ការរៀបចំពិធីអបអរសាទរខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ ខែតុលា ឆ្នាំ២០២១នេះ ហាក់បានធ្វើឡើងយ៉ាងផុសផុល។ ផុសផុល គឺខុសស្រលះពីបណ្តាឆ្នាំមុនៗនៅកម្ពុជា ដែលសូម្បីតែរកកន្លែងសម្រាប់ធ្វើពិធីនេះក៏សឹងតែរកមិនបានផង។ បើតាមអ្នកវិភាគជើងចាស់រូបនេះ នេះគឺជាចំណុចល្អមួយ ហើយថា កិច្ចព្រមព្រៀងសន្តិភាពទីក្រុងប៉ារីសហាក់ក្លាយជាចំណុចក្តៅមួយឡើងវិញនៅក្នុងឆ្នាំ២០២១នេះ៕