យ៉ាងហោចណាស់មនុស្ស៦នាក់ ត្រូវបានបញ្ជូនទៅស្នងការដ្ឋាននគរបាលខេត្តព្រះសីហនុ និងជិត៤០នាក់ទៀត បន្តសាកសួរនៅកងរាជអាវុធហត្ថស្រុក ពាក់ព័ន្ធរឿងទន្ទ្រានកាន់កាប់ដីព្រៃ នៅស្រុកព្រៃនប់ ខេត្តព្រះសីហនុ ដើម្បីស្វែងរកមេខ្យល់មកផ្តន្ទាទោសតាមច្បាប់។
ស្នងការនគរបាលខេត្តព្រះសីហនុ លោក ជួន ណារិន ប្រាប់វីអូឌីនៅថ្ងៃអាទិត្យនេះថា មុននឹងសមត្ថកិច្ចឃាត់ខ្លួនអ្នកទន្ទ្រានកាន់កាប់ដីព្រៃនេះ សមត្ថកិច្ចក៏បានចុះណែនាំនិងពន្យល់ពលរដ្ឋ៥៨នាក់ ដែលបានកាប់រានព្រៃ និងចងតង់ធ្វើជាជម្រក ស្ថិតនៅចំណុចបាតខ្ទះ ក្នុងភូមិទួលទទឹង២ ឃុំទួលទទឹង ស្រុកព្រៃនប់ កាលពីថ្ងៃទី២១ ខែតុលា ឆ្នាំ២០២១នេះ។
ប៉ុន្តែលោកថានៅពេលនោះ ក្រុមពលរដ្ឋនិងកម្លាំងសមត្ថកិច្ចប៉ះទង្គិចគ្នា ហើយពលរដ្ឋបានប្រើហិង្សាគប់ដបសាំងលើសមត្ថកិច្ចជាដើម។
ករណីនេះ សមត្ថកិច្ចជំនាញ បានចុះបង្ក្រាបក្រុមអ្នកទន្ទ្រានកាន់កាប់ដីព្រៃ បានចំនួន៤៣នាក់ ក្នុងនោះមាន៦នាក់ ត្រូវបានបញ្ជូនទៅស្នងការដ្ឋាននគរបាលខេត្តព្រះសីហនុ ហើយ៣៧នាក់ទៀត ត្រូវសមត្ថកិច្ចបន្តសាកសួរនៅកងរាជអាវុធហត្ថស្រុកព្រៃនប់ ដើម្បីរកមេខ្យល់ឬអ្នកនៅពីក្រោយខ្នងយកទៅផ្តន្ទាទោសតាមច្បាប់ ។
បើតាមហ្វេសប៊ុករបស់រដ្ឋបាលខេត្តព្រះសីហនុ កាលពីថ្ងៃទី២២ខែតុលា ឆ្នាំ២០២១នេះ ឱ្យដឹងថាកាលពីរសៀល ថ្ងៃទី២១ ខែតុលា ឆ្នាំ២០២១ ក្រុមការងារចម្រុះ បានចុះទៅដល់ចំណុចកើតហេតុ ដោយឃើញមានមនុស្សចំនួន៥៨នាក់ កំពុងធ្វើសកម្មភាពកាប់រានដីព្រៃ និងចងតង់ធ្វើជាជម្រក ក្នុងនោះក្រុមការងារចម្រុះបានធ្វើការណែនាំឱ្យពួកគាត់បញ្ឈប់សកម្មភាព និងត្រឡប់ទៅលំនៅដ្ឋានវិញ។ ប៉ុន្តែក្រុមពលរដ្ឋទាំងនោះមិនស្តាប់ ហើយបានប្រើអំពើហិង្សាគប់ដបសាំងមកលើកម្លាំងសមត្ថកិច្ចថែមទៀត។ រដ្ឋបាលខេត្តថា ដើម្បីបញ្ចៀសការប៉ះទង្គិចគ្នា ទើបក្រុមការងារចម្រុះបានដកថយដើម្បីរង់ចាំការណែនាំបន្ត។
ប្រភពដដែលបន្តថា រហូតដល់ព្រឹកថ្ងៃទី២២ ខែតុលា ឆ្នាំ២០២១ ក្រុមការងារចម្រុះបានចុះទៅកន្លែងកើតហេតុជាលើកទី២ ដើម្បីឃាត់ខ្លួនមនុស្ស ដែលកំពុងនៅលើទីតាំងជាក់ស្តែងបានចំនួន៤៣នាក់ ស្រី៨នាក់ ក្នុងនោះបានបញ្ជូនជនសង្ស័យចំនួន៦នាក់ ទៅស្នងការដ្ឋានខេត្តព្រះសីហនុ ដើម្បីសួរនាំបន្ត។ ដោយឡែកអ្នកពាក់ព័ន្ធចំនួន៣៧នាក់ទៀត បន្ទាប់ពីសាកសួរ និងធ្វើកិច្ចសន្យា គឺបានឱ្យមេឃុំចៅសង្កាត់របស់ពួកគាត់មកធានាត្រឡប់ទៅលំនៅដ្ឋានវិញ។
អាជ្ញាធរខេត្តបន្តថា យោងតាមចម្លើយរបស់ប្រជាពលរដ្ឋទាំងនោះគឺមានទាំងអ្នកក្នុងខេត្ត និងក្រៅខេត្ត គឺត្រូវបានមេខ្យល់ដែលមានអង្គការចាត់តាំង បានធ្វើការបោកបញ្ឆោតឱ្យចូលទៅកាប់រានដីព្រៃឈើដើម្បីយកដីចែកគ្នា។
រដ្ឋបាលខេត្ត អំពាវនាវថា៖ «ប្រជាពលរដ្ឋទាំងអស់ សូមកុំចាញ់បោកមេខ្យល់ និងជនខិលខូច ដោយធ្វើការញុះញង់ឱ្យទៅកាប់រានទន្ទ្រានដីព្រៃយកធ្វើជាកម្មសិទ្ធិ ឬរំលោភបំពានលើដីកម្មសិទ្ធឯកជន និងការប្រើប្រាស់អំពើហិង្សាប្រឆាំងមន្ត្រីសាធារណៈជាដើម ដែលទង្វើនេះ នឹងធ្វើឱ្យបងប្អូនក្លាយខ្លួនជាជនល្មើសនឹងត្រូវប្រឈមមុខចំពោះផ្លូវច្បាប់ថែមទៀត»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ជំរុញទៅអាជ្ញាធរពាក់ព័ន្ធត្រូវធ្វើការសិក្សាលើអង្គហេតុ និងអង្គច្បាប់ឱ្យបានច្បាស់លាស់ មុននឹងចាត់វិធានការច្បាប់លើប្រជាពលរដ្ឋ ដើម្បីកុំឱ្យពួកគេរងនូវភាពអយុត្តិធម៌ នាំឱ្យមានបញ្ហាប្រឈមនានា នៅក្នុងសង្គមទៅថ្ងៃមុខបន្តទៀត ។
លោកមានប្រសាសន៍ថា៖ «បើសិនជាសមត្ថកិច្ចមិនរកយន្តការក្នុងការដោះស្រាយឱ្យបានឆាប់រហ័ស ហើយនឹងដោះស្រាយឱ្យបានទាន់ពេលវេលាទេ បញ្ហាដីធ្លីនេះវាក្លាយទៅជាបញ្ហាក្តៅគគុក។ បញ្ហារាំរ៉ៃបង្កឱ្យមានអំពើហិង្សា និងមានការចាប់ខ្លួនជាបន្តបន្ទាប់ ដោយសារសារឬសគល់នៃបញ្ហាដីធ្លីដែលយើងមិនបានសិក្សានិងស្វែងរកដំណោះស្រាយ ដោយតម្លាភាពនឹងយុត្តិធម៌»។
រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សកំពុងគ្រប់គ្រងអំណាច លោក ស ខេង កាលពីដើមខែតុលា ឆ្នាំ២០២១នេះ បានក្រើនរំឭកមន្ត្រីថា បញ្ហាជម្លោះដីធ្លីនឹងជះឥទ្ធិពលដល់ការបាត់បង់សន្លឹកឆ្នោតនៅពេលខាងមុខ បើមិនព្យាយាមដោះស្រាយដោយតម្លាភាពទេនោះ៕
