រដ្ឋមន្ត្រីក្រសួងមហាផ្ទៃ បានឱ្យដឹងថា រយៈពេល៩ខែដើមឆ្នាំ២០២១ បទល្មើសព្រហ្មទណ្ឌគ្រប់ប្រភេទ មានការថយចុះ៩ភាគរយ ខណៈការជួញដូរមនុស្ស និងបទល្មើសពាក់ព័ន្ធនឹងបច្ចេកវិទ្យា កើនឡើងគួរឱ្យកត់សម្គាល់អំឡុងវិបត្តិកូវីដ-១៩។
ក្នុងកិច្ចប្រជុំជាមួយក្រុមប្រឹក្សាធុរកិច្ចអាមេរិក-អាស៊ាន កាលពីថ្ងៃ២២ ខែតុលា រដ្ឋមន្ត្រីក្រសួងមហាផ្ទៃលោក ស ខេង បញ្ជាក់ថា រយៈពេល៩ខែ ឆ្នាំ២០២១ ស្ថានភាពសន្តិសុខ និងសណ្តាប់ធ្នាប់សាធារណៈមានភាពល្អប្រសើរ ក្នុងនោះបទល្មើសព្រហ្មទណ្ឌគ្រប់ប្រភេទ បានថយចុះ៩ភាគរយ ។ ប៉ុន្តែ បទល្មើសជួញដូរមនុស្សឆ្លងដែន និងបទល្មើសពាក់ព័ន្ធនឹងបច្ចេកវិទ្យា មានការកើនឡើងគួរឱ្យកត់សម្គាល់អំឡុងវិបត្តិកូវីដ-១៩។
យ៉ាងណា វីអូឌី មិនអាចសុំការបំភ្លឺបន្ថែមពីអ្នកនាំពាក្យក្រសួងមហាផ្ទៃ លោក ផាត សុផានិត បានទេនៅថ្ងៃអាទិត្យនេះ ។
នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត សង្កេតឃើញថា បទល្មើសជួញដូរមនុស្សឆ្លងដែន និងបទល្មើសពាក់ព័ន្ធនឹងបច្ចេកវិទ្យានាអំឡុងពេលជួបវិបត្តិកូវីដ-១៩នេះ កាន់តែធ្វើឱ្យមានការព្រួយបារម្ភខ្លាំង សម្រាប់សន្តិសុខសង្គមក្នុងប្រទេសកម្ពុជា ។
ករណីនេះ លោកជំរុញទៅអាជ្ញាធរពាក់ព័ន្ធត្រូវពង្រឹងការអប់ ផ្សព្វផ្សាយឱ្យបានទូលំទូលាយដល់ប្រជាពលរដ្ឋកុំឱ្យចាញ់បោកឧក្រិដ្ឋជនមួយចំនួន និងអនុវត្តច្បាប់លើជនល្មើសឱ្យមានតម្លាភាពរវាងអ្នកមាន និងអ្នកក្រ ទើបកាត់បន្ថយអំពើល្មើសទាំងនេះបានប្រសិទ្ធភាពខ្ពស់ ។
លោកជំរុញដូចនេះថា៖ «ធ្វើម៉េចអាជ្ញាធរពាក់ព័ន្ធត្រូវអនុវត្តច្បាប់ឱ្យបានតឹងរឹង ទោះបីជាអ្នកប្រព្រឹត្តមានឋានន្តរស័ក្ត ឬក៏មានខ្នងបង្អែកយ៉ាងណាក៏ដោយត្រូវតេចាត់វិធានការតាមផ្លូវច្បាប់។ ទីពីរ ត្រូវបង្កើនប្រសិទ្ធភាពការស៊ើបអង្កេត និងការស្រាវជ្រាវ ដើម្បីស្វែងរកយុត្តិធម៌ជួយដល់ជនរងគ្រោះដោយករណីជួញដូរ ឬក៏ប្រព័ន្ធអនឡាញ»។
របាយការណ៍សង្ខេបក្នុងឆមាសទី១ ឆ្នាំ២០២១ នៃអំពើជួញដូរមនុស្សរបស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ឱ្យដឹងថា រយៈពេល៦ខែ ឆ្នាំ២០២១នេះ រដ្ឋាភិបាលបង្ក្រាបការជួញដូរមនុស្សបានចំនួន៥៨ករណី។ ចំនួននេះបានកើនឡើងទ្វេដង បើប្រៀបធៀបនឹងឆ្នាំ២០២០ ដែលបង្ក្រាបបានចំនួនជាង២០ករណីប៉ុណ្ណោះ។
ដោយឡែក តាមរបាយការណ៍ស្រាវជ្រាវថ្មីមួយរបស់អង្គការសង់ត្រាល់ ចេញផ្សាយកាលពីខែកញ្ញា បានឱ្យដឹងថា រយៈពេល៧ខែ ដើមឆ្នាំ២០២១ អំឡុងពេលការរីករាលដាលជំងឺកូវីដ-១៩ មានពលរដ្ឋខ្មែរយ៉ាងហោច៧៤១នាក់ បានលួចឆ្លងដែនដោយខុសច្បាប់ទៅរកការងារធ្វើក្នុងប្រទេសថៃទាំងប្រថុយប្រថាន ហើយត្រូវអាជ្ញាធរព្រំដែនថៃនិងកម្ពុជាចាប់ខ្លួនបាន។
ចំណែក នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត ធ្លាប់មានប្រសាសន៍ប្រាប់វីអូឌី កាលពីខែកញ្ញា ឆ្នាំ២០២១ថា កន្លងមក លីកាដូបានទទួលព័ត៌មានពីជនរងគ្រោះដែលត្រូវបានគេបោកប្រាស់ ដោយផ្តល់ប្រាក់កម្ចីតាមអនឡាញជាថ្នូរនឹងរូបភាពអាសអាភាសមិនតិចជាង១០ករណីទេ៕
