អាជ្ញាធររដ្ឋបាលខណ្ឌទួលគោក និងមន្ត្រីជំនាញ បានចុះឃាត់ខ្លួនមនុស្ស៦៨នាក់ និងបង្ក្រាបទីតាំងភោជនីយដ្ឋាន និងខារ៉ាអូខេឌីអឹម «DM» ដែលលួចបើកដំណើរការអាជីវកម្ម និងការជួបជុំផឹកស៊ី ល្មើសវិធានសុខាភិបាល។
អភិបាលខណ្ឌទួលគោក លោក ជា ពិសី បានឱ្យដឹងថា កម្លាំងគណៈបញ្ជាការឯកភាពរដ្ឋ បាលខណ្ឌ និងអាជ្ញាធរពាក់ព័ន្ធ បានចុះឃាត់ខ្លួនមនុស្ស៦៨នាក់ ក្នុងនោះមានភ្ញៀវចំនួន១៧នាក់ (ស្រី២នាក់) បុគ្គលិក៥០នាក់ និងមេការម្នាក់។ ការបង្ក្រាបនេះ ធ្វើឡើងស្ថិតនៅចំណុចភោជនីយដ្ឋាន និងខារ៉ាអូខេឌីអឹម «DM» សង្កាត់ផ្សារដេប៉ូទី៣ ខណ្ឌទួលគោក នៅថ្ងៃទី២២ ខែតុលា ឆ្នាំ២០២១។ ការឃាត់នេះ ដោយរកឃើញថា ហាងមួយនេះលួចបើកដំណើរការអាជីវកម្ម ជួបជុំផឹកស៊ី ល្មើសវិធានសុខាភិបាល និងសេចក្ដីណែនាំរបស់រដ្ឋបាលរាជធានីភ្នំពេញ ក្នុងការទប់ស្កាត់ការឆ្លងរាលដាលនៃជំងឺកូវីដ-១៩។
លោក ជា ពិសី បញ្ជាក់ថា ការបង្ក្រាបនេះ កម្លាំងចម្រុះបានចុះមកដល់ទីតាំង និងបានរកឃើញ មានការជួបជុំផឹកស៊ីនៅក្នុងភោជនីយដ្ឋាន និងខារ៉ាអូខេឌីអឹម «DM» ចំនួន៣បន្ទប់ (បន្ទប់ខារ៉ាអូខេ) ជាន់ទី៣ និង១បន្ទប់ទៀត នៅជាន់ទី៥ (បន្ទប់ខារ៉ាអូខេ) ហើយ១បន្ទប់ទៀត នៅជាន់ទី៦ ដែលមានភ្ញៀវ ចំនួន០១តុ។
ក្រោយពីឃាត់ខ្លួន សមត្ថកិច្ចបានបញ្ជូនមនុស្សទាំងអស់នោះ ទៅកាន់អធិការដ្ឋាននគរបាលខណ្ឌទួលគោក ដើម្បីចាត់វិធានការច្បាប់បន្ត។
កាលពីចុងខែសីហា ឆ្នាំ២០២១ លោកនាយករដ្ឋមន្ត្រី ហ៊ុន សែន បានបន្តណែនាំដល់បណ្តាគណៈអភិបាលរាជធានី-ខេត្ត ត្រូវបន្តការអនុវត្តនូវការរឹតបន្តឹងវិធានការសុខាភិបាល វិធានការរដ្ឋបាល និងវិធានការច្បាប់ ដោយផ្អែកតាមសភាពការជាក់ស្តែងនៃជំងឺកូវីដ-១៩នេះ នៅក្នុងភូមិសាស្ត្ររាជធានី-ខេត្តរបស់ខ្លួន ក្រោមការសម្របសម្រួលរបស់គណៈប្រតិបត្តិគណៈកម្មការអន្តរក្រសួង និងអនុគណៈកម្មការដែលមានការពាក់ព័ន្ធ។
កម្ពុជាបានផ្ទុះរលកទី៣ នៃការឆ្លងរាលដាលជំងឺកូវីដ-១៩ ចាប់ពីថ្ងៃទី២០ ខែកុម្ភៈ ដែលមកដល់ពេលនេះ «ព្រឹត្តិការណ៍២០កុម្ភៈ» មានរយៈពេលជាង៨ខែហើយ តែក្រសួងសុខាភិបាលនៅមិនទាន់អាចកាត់ផ្តាច់ខ្សែចម្លងក្នុងសហគមន៍ទាំងស្រុងបាននៅឡើយទេ។ ព្រឹត្តិការណ៍នេះបានសម្លាប់មនុស្សអស់២ ៧២៥ នាក់ និងអ្នកឆ្លងសរុប ១១៧ ៦៤៤នាក់ គិតត្រឹមថ្ងៃទី២៣ ខែតុលា ឆ្នាំ២០២១នេះ៕
