អាជ្ញាធរខេត្តបន្ទាយមានជ័យ បានបញ្ជូនជនបរទេសចំនួន៤នាក់ រួមមាន ជនជាតិចិន២នាក់ និងបង់ក្លាដែស២នាក់ ទៅតុលាការ ក្រោយស្រាវជ្រាវឃើញថា ពួកគេបានចាប់ពង្រាត់និងបង្ខាំងមនុស្សដោយខុសច្បាប់នៅកាស៊ីណូមួយកន្លែងក្នុងក្រុងប៉ោយប៉ែត។
ស្នងការរងទទួលផែនការងារនគរបាលប្រឆាំងការជួញដូរមនុស្សខេត្តបន្ទាយមានជ័យ លោកស្រី ឌី សុជាតិ ថ្លែងប្រាប់ វីអូឌី នៅថ្ងៃចន្ទនេះថា សមត្ថកិច្ចជំនាញបានចុះបង្ក្រាបករណីចាប់ពង្រាត់និងបង្ខាំងមនុស្សដោយខុសច្បាប់នៅកាស៊ីណូមួយកន្លែង ស្ថិតក្នុងបុរី «សានហូ» ក្រុងប៉ោយប៉ែត ដោយបានឃាត់ខ្លួនជនជាតិចិន២នាក់ និងបង់ក្លាដែស២នាក់ កាលពីថ្ងៃទី២៣ ខែតុលា ឆ្នាំ២០២១នេះ។ លោកស្រីបន្តថា ក្រោយការឃាត់ខ្លួន សមត្ថកិច្ចក៏បានបញ្ជូនខ្លួនជនសង្ស័យទាំង៤នាក់ និងសំណុំរឿងនេះទៅសាលាដំបូងខេត្តរួចហើយដែរ។
លោកស្រីថា៖ «ដល់តុលាការហើយ បញ្ជូនទៅ២ថ្ងៃហើយ! ក៏ប៉ុន្តែអត់ទាន់ចប់ ដោយសារគាត់ជាជនបរទេសអ៊ីចឹង យើងត្រូវការអ្នកបកប្រែអីអ៊ីចឹងទៅ។ អាចចប់ដីកាឃុំថ្ងៃនេះ មានន័យថា បញ្ជូនទៅ៣ថ្ងៃហើយ [រាប់ទាំងថ្ងៃនេះ] តែអត់ទាន់ចប់ទេ តាំងពីបញ្ជូនទៅ»។
ចំណែកស្នងការដ្ឋាននគរបាលខេត្តបន្ទាយមានជ័យ ក៏បានផ្សព្វផ្សាយនៅលើទំព័រហ្វេសប៊ុករបស់ខ្លួន កាលពីថ្ងៃម្សិលមិញដែរថា ក្រៅពីការឃាត់ខ្លួនជនសង្ស័យជាជនបរទេសទាំង៤នាក់នោះ សមត្ថកិច្ចក៏បានជួយរំដោះជនជាតិថៃ៦នាក់ និងជនជាតិខ្មែរ២នាក់ និងបានសួរនាំពួកគេផងដែរ។
ស្នងការដ្ឋាននគរបាលខេត្តបញ្ជាក់ថា ការឃាត់ខ្លួនជនសង្ស័យទាំង៤នាក់ ធ្វើឡើងបន្ទាប់ពីមានសាច់ញាតិជនរងគ្រោះបានទៅដាក់ពាក្យបណ្ដឹងសុំឱ្យសមត្ថកិច្ចជួយអន្តរាគមន៍ ដោយពួកគេអះអាងថា សាច់ញាតិរបស់ខ្លួនបានទៅដាក់ពាក្យធ្វើការកាស៊ីណូអនឡាញ តែត្រូវមេការជនជាតិចិនចាប់បង្ខាំងទុក បង្អត់បាយ ចាប់ដាក់ខ្នោះ ថតរូបភាពបង្ហោះឱ្យសាច់ញាតិយកលុយទៅលោះក្នុងម្នាក់ចំនួន១ ០០០ដុល្លារ ទើបដោះលែងវិញ។ ប្រភពដដែលបញ្ជាក់ថា បើគ្មានអ្នកមកលោះទេ នឹងត្រូវឃុំទុកទីនោះរយ:ពេល៦ខែ។
អ្នកនាំពាក្យសាលាដំបូងខេត្តបន្ទាយមានជ័យ លោក រឿន លីណា ប្រាប់ថា លោកពុំទាន់ជ្រាបលម្អិតពីដំណើរការនីតិវិធីនេះនៅឡើយ ដោយសារលោកជាប់បេសកកម្មការងារ។
មន្ត្រីឃ្លាំមើលសិទ្ធិមនុស្សអង្គការអាដហុកប្រចាំខេត្តបន្ទាយមានជ័យ លោក ស៊ុំ ច័ន្ទគា បានជំរុញឱ្យអាជ្ញាធរគប្បីកំណត់នូវចរិតលក្ខណៈជនបរទេសដែលមករស់នៅឬរកស៊ីនៅកម្ពុជាឱ្យបានច្បាស់ ដើម្បីចៀសវាងបញ្ហានេះកើតឡើងបន្តទៀត។
លោកមានប្រសាសន៍ថា៖ «យើងគ្រាន់តែដឹង ប៉ុន្តែអានីតិវិធីបន្តទៅទៀត គឺវាអស់ច្រើនហើយត្រឹមតុលាការហ្នឹង។ […] ទាក់ទងនឹងសមត្ថកិច្ច រដ្ឋាភិបាល អាជ្ញាធរដែនដី ដែលត្រូវគិតគូរ ត្រូវធ្វើ ថាតើត្រូវធ្វើយ៉ាងម៉េច ដើម្បីអាចកំណត់នូវចរិតលក្ខណៈជនដែលប្រព្រឹត្ត ការរស់នៅ ការរកស៊ីរបស់ជនទាំងអស់ដែលប្រព្រឹត្ត អាហ្នឹងគឺធ្វើយ៉ាងម៉េច? ហេតុអីបានវាឈានដល់ការចាប់ជំរិត? អាហ្នឹងជាការកំណត់មុខសញ្ញារបស់មន្ត្រី»។
អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ លោក កែវ វណ្ណថន ប្រាប់ វីអូឌី នៅថ្ងៃទី២៥ ខែតុលានេះថា រយៈពេល៩ខែ ឆ្នាំ២០២១នេះ មានករណីជនបរទេសចាប់ជំរិតចំនួន១៣នាក់នៅទូទាំងប្រទេស ក្នុងនោះភាគច្រើនករណីជនជាតិចិនចាប់ជំរិតជនជាតិចិនដូចគ្នា។
យ៉ាងណា លោកថា នេះជាតួលេខដែលបានបញ្ជូនមកអគ្គនាយកដ្ឋានអន្តោប្រវេសន៍ ដើម្បីធ្វើការបណ្ដេញចេញប៉ុណ្ណោះ ចំពោះតួលេខរួមក្នុងក្របខណ្ឌទូទាំងប្រទេស គឺនៅក្នុងដៃអគ្គស្នងការដ្ឋាននគរបាលជាតិ។
លោកថា៖ «ជារួម អគ្គនាយកដ្ឋានអន្តោប្រវេសន៍តែងតែសហការជាមួយអគ្គស្នងការដ្ឋាននគរបាលជាតិ និងអង្គភាពពាក់ព័ន្ធ បង្ក្រាបរាល់គ្រប់បទល្មើសបង្កដោយជនបរទេស មិនចំពោះតែបទល្មើសចាប់ជំរិតនោះទេ»៕
