ក្រសួងការបរទេសចិន បានឱ្យដឹងនៅថ្ងៃចន្ទនេះថា រដ្ឋមន្រ្តីការបរទេស និងជាទីប្រឹក្សារដ្ឋ លោក វ៉ាង យី (Wang Yi) នឹងជួបជាមួយគណៈប្រតិភូនៃរដ្ឋាភិបាលបណ្ដោះអាសន្នរបស់ពួកតាលីបង់ ក្នុងអំឡុងដំណើរទស្សនកិច្ចរបស់លោកទៅកាន់ប្រទេសកាតា នៅថ្ងៃទី២៥ និងទី២៦ ខែតុលានេះ។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យការបរទេសចិន លោក Wang Wenbin ដែលបានថ្លែងនៅក្នុងសន្និសីទសារព័ត៌មានមួយនៅទីក្រុងប៉េកាំងថា សម្រាប់ជំនួបនេះ ភាគីទាំងពីរគ្រោងនឹងផ្លាស់ប្តូរទស្សនៈនានាស្ដីពីស្ថានភាពនៅក្នុងប្រទេសអាហ្វហ្គានីស្ថាន និងប្រធានបទដែលទាក់ទងនឹងក្ដីកង្វល់រួម។
អ្នកនាំពាក្យដដែលបន្តថា៖ «ក្នុងនាមជាប្រទេសជិតខាង និងជាដៃគូមិត្តភាពប្រពៃណីរបស់អាហ្វហ្គានីស្ថាន ប្រទេសចិនតែងតែបង្ហាញការគាំទ្រក្នុងការសន្ទនានិងទំនាក់ទំនង ដើម្បីដឹកនាំការអភិវឌ្ឍជាវិជ្ជមាននៃស្ថានភាពនៅក្នុងប្រទេសអាហ្វហ្គានីស្ថាន»។
គួរបញ្ជាក់ថា អាហ្វហ្គានីស្ថាន បានធ្លាក់ចូលទៅក្នុងការគ្រប់គ្រងដោយក្រុមសកម្មប្រយុទ្ធអ៊ីស្លាមតាលីបង់ កាលពីពាក់កណ្ដាលខែសីហាកន្លងទៅ បន្ទាប់ពីកងទ័ពអាមេរិក និងបស្ចិមប្រទេសមួយចំនួនផ្សេងទៀត បានសម្រេចចាកចេញដោយបញ្ចប់បេសកកម្មយោធានិងការទូតរបស់ខ្លួន។
ទាក់ទិននឹងករណីនេះ ចិន កាលពីពេលកន្លងទៅ ក៏ធ្លាប់បានលើកឡើងផងដែរថា ពិភពលោក គួរតែគាំទ្រដល់ប្រទេសអាហ្វហ្គានីស្ថាន មិនមែនដាក់សម្ពាធបន្ថែមទៀតនោះទេ ខណៈដែលពួកគេក៏បានទាមទារឱ្យមានការដកទណ្ឌកម្មសេដ្ឋកិច្ចនានា និងដកការបង្កកទ្រព្យសម្បត្តិអន្តរជាតិលើអាហ្វហ្គានីស្ថានរាប់ពាន់លានដុល្លារផងដែរ៕