អាជ្ញាធរសង្កាត់ដង្កោ បានឱ្យដឹងថា យ៉ាងហោចណាស់ ផ្ទះពលរដ្ឋជាង១០០គ្រួសារ នៅភូមិបាគូ បានចាប់ផ្ដើមលិចលង់ដោយសារជំនន់ដែលមានប្រភពមកពីទឹកស្ទឹងព្រែកត្នោតហក់ឡើងខ្លាំង ស្របពេលមន្ត្រីជំនាញខេត្តកំពង់ស្ពឺ ក៏បានអះអាងពីផលប៉ះពាល់ផ្ទះសម្បែង និងដំណាំពលរដ្ឋដែលរស់នៅអមដងស្ទឹងនេះផងដែរ។
ចៅសង្កាត់ដង្កោ លោកស្រី សឿង សេរី មានប្រសាសន៍ថា ជំនន់ទឹកស្ទឹងព្រែកត្នោត នៅថ្ងៃអង្គារនេះ បានបណ្ដាលឱ្យលិចផ្ទះពលរដ្ឋចំនួន១២៥គ្រួសារ ដោយផ្ទះខ្លះទឹកលិចពាក់កណ្ដាលផ្ទះ ហើយផ្ទះខ្លះទើបលិចចូលតិចតួច។
អ្នកស្រីបន្តថា យ៉ាងណា អាជ្ញាធរនៅមិនទាន់អាចបញ្ជាក់ពីផលប៉ះពាល់ជារួមបាននៅឡើយទេ ដោយសារទឹកចាប់ផ្ដើមហក់ឡើងខ្លាំង និងលិចនៅសង្កាត់ជាច្រើនទៀតក្នុងខណ្ឌដង្កោ រាជធានីភ្នំពេញ។
អ្នកស្រីបន្តថា៖ «ឆ្នាំនេះទឹកហូរខ្លាំងណាស់ បើនៅសង្កាត់គងនយ សង្កាត់សាក់សំពៅ ទឹកហូរខ្លាំងជាងសង្កាត់ដង្កោ។ ឯកឧត្ដម និងលោកស្រីអភិបាលខណ្ឌដង្កោ ពួកគាត់ចុះផ្ទាល់តែម្តង។ ដោយឡែក សង្កាត់ដង្កោ ទប់ទល់បាន ពួកគាត់ក៏គិតថាវាធូរស្រាលជាងខាងសង្កាត់ផ្សេងៗ។ សម្រាប់វិធានការ ពួកខ្ញុំត្រៀមតែបាវ បើខ្លាំងមែនទែន មានតែស្រែកអំពាវនាវរកកងទ័ពនិងថ្នាក់លើ ដោយមិនទាន់ហ៊ានគិតសុំអំណោយព្រោះសំខាន់ថ្នាក់លើកំពុងតែមមាញឹកដែរ តែក៏គិតថានឹងមានសល់តិចតួចខ្លះដែរ»។
វីអូឌី នៅមិនទាន់អាចសុំការឆ្លើយតបបន្ថែមពីអ្នកនាំពាក្យរាជធានីភ្នំពេញ លោក ម៉េត មាសភក្ដី បានទេនៅថ្ងៃអង្គារនេះ ដោយលោកថាជាប់រវល់។
យ៉ាងណា ទំព័រហ្វេសប៊ុករបស់រដ្ឋបាលរាជធានីភ្នំពេញនៅថ្ងៃនេះ បញ្ជាក់ថា អភិបាលរាជធានីភ្នំពេញ លោក ឃួង ស្រេង បានចុះពិនិត្យនិងដឹកនាំកម្លាំងចុះអន្តរាគមន៍ជួយទប់ទំនប់សណ្ដស្ទឹងព្រែកត្នោត ក្នុងភូមិសាស្ត្រខណ្ឌដង្កោ ដែលស្ថានភាពទឹកកំពុងបន្តហក់ឡើងខ្លាំង។ រដ្ឋបាលរាជធានីភ្នំពេញ ក៏បានអំពាវនាវដល់ប្រជាពលរដ្ឋដែលរស់នៅតាមសណ្ដស្ទឹងព្រែកត្នោត ត្រូវប្រុងប្រយ័ត្នខ្ពស់។
ស្របគ្នានេះដែរ កាលពីថ្ងៃទី២៥ ខែតុលា រដ្ឋបាលខណ្ឌដង្កោ បានចេញសេចក្ដីជូនដំណឹងដល់ប្រជាពលរដ្ឋដែលរស់នៅជាប់សណ្ដស្ទឹងព្រែកត្នោត រួមមាន សង្កាត់ដង្កោ សង្កាត់ព្រៃស សង្កាត់ព្រៃវែង សង្កាត់ក្រាំងពង្រ សង្កាត់ស្ពានថ្ម សង្កាត់ទៀន សង្កាត់សាក់សំពៅ សង្កាត់ជើងឯក សង្កាត់ព្រែកកំពឹស និងសង្កាត់គងនយ ត្រូវត្រៀមសម្ភារនិងបន្តតាមដានស្ថានភាពទឹកជាប្រចាំ ដើម្បីចៀសវាងការបាត់បង់សម្ភារនិងអាយុជីវិត។
ការប្រកាសឱ្យពលរដ្ឋប្រុងប្រយ័ត្ននេះ ដោយអាជ្ញាធរបញ្ជាក់ថា បច្ចុប្បន្ន ស្ថានភាពទឹកស្ទឹងបានហក់ឡើងជាបន្តបន្ទាប់បណ្ដាលមកពីជំនន់ផ្នែកខាងលើ ធ្វើឱ្យទឹកស្ទឹងព្រែកត្នោតក្នុងភូមិសាស្ត្រខណ្ឌដង្កោ មានកម្ពស់ឈានដល់កម្រិតត្រូវប្រុងប្រយ័ត្នខ្ពស់។
ដោយឡែក ប្រធានមន្ទីរធនធានទឹក និងឧតុនិយមខេត្តកំពង់ស្ពឺ លោក ញ៉ាញ់ ជាបហ៊ង មានប្រសាសន៍ថាទាក់ទងនឹងស្ថានភាពទឹកស្ទឹងព្រែកត្នោត នៅឯភូមិសាស្ត្រខេត្តកំពង់ស្ពឺ គិតមកត្រឹមថ្ងៃទី២៦ ខែតុលា ទឹកបានបន្តស្រកបណ្ដើរៗ។ លើសពីនេះ លោកថា ទ្វារទឹកក៏ចាប់ផ្ដើមទម្លាក់បណ្ដើរៗដែរ និងនៅកំពង់ទួលខាងក្រោម មានសភាពនឹង និងស្រកសន្សឹមៗផងដែរ។
លោកបន្តថា៖ «ប្រជាជនដែលរស់នៅតាមបណ្ដោយស្ទឹងព្រែកត្នោត ប៉ះពាល់ស្រូវជាង៤០០ហិកតា និងផ្ទះសម្បែងមួយចំនួនដែលស្ថិតនៅតំបន់ទាប»។
កាលពីយប់ថ្ងៃទី១៣ ខែតុលា ឆ្នាំ២០២០ ទឹកជំនន់ស្ទឹងព្រែកត្នោត ក្នុងខណ្ឌដង្កោ បានជន់ឡើងខ្លាំង និងបានហូរច្រាលទៅតំបន់កួរស្រូវ ក្នុងខណ្ឌដង្កោ នៅថ្ងៃទី១៤ ខែតុលា ក្រោយពីទំនប់ចម្ការតែ នៅខ្នងភ្នំគិរីរម្យដែលស្តុកទឹក៥លានម៉ែត្រគូប បានបាក់ ស្របពេលមានភ្លៀងធ្លាក់ច្រើនដោយសារឥទ្ធិពលព្យុះពេលនោះ។
រដ្ឋបាលរាជធានីភ្នំពេញ និងកម្លាំងសង្គ្រោះ បានចេញប្រតិបត្តិការសង្គ្រោះជាបន្តបន្ទាប់ ខណៈរដ្ឋបាលរាជធានី ឱ្យដឹងបឋមពេលនោះថា ទឹកជំនន់ស្ទឹងព្រែកត្នោត បានបង្កផលប៉ះពាល់ដល់ប្រជាពលរដ្ឋប្រមាណជាង៥ ០០០គ្រួសារ ក្នុងខណ្ឌដង្កោ ក្នុងនោះ ពលរដ្ឋប្រមាណជាង៣ ០០០គ្រួសារ ត្រូវបានជម្លៀសទៅកាន់កន្លែងមានសុវត្ថិភាព៕
