អាជីវករមួយចំនួននៅស្រុកឈូក ត្អូញត្អែរថា អាជ្ញាធរនៅតែបន្តយកភាស៊ីពីអ្នកលក់ដូរតាមកញ្ច្រែង កញ្ជើ ល្អី បើទោះបីជាពួកគេប្រាប់អ្នកយកភាស៊ីថា អភិបាលខេត្តកំពតដែលទើបឡើងតំណែងថ្មី ឱ្យឈប់យកពីពលរដ្ឋចាប់ពីថ្ងៃនេះក៏ដោយ។
ការត្អូញត្អែរនេះធ្វើឡើងបន្ទាប់ពីអភិបាលខេត្តកំពត លោក ម៉ៅ ធនិន បានចុះជួបសំណេះសំណាលជាមួយពលរដ្ឋនិងអាជីវករនៅក្នុងផ្សារឈូក កាលពីថ្ងៃ២៦ ខែតុលា ដើម្បីស្វែងយល់ពីសុខទុក្ខនិងជីវភាពប្រចាំថ្ងៃរបស់ប្រជាពលរដ្ឋ និងប្រាប់ទៅអាជ្ញាធរស្រុក ពិសេសអ្នកគ្រប់គ្រងផ្សារ ត្រូវរៀបចំសណ្ដាប់ធ្នាប់ឱ្យបានល្អទាំងក្នុង ព្រមទាំងបរិវេណជុំវិញផ្សារ។ លើសពីនេះ មិនត្រូវយកថ្លៃភាស៊ី ចំពោះអាជីវករចាស់ជរានិងពលរដ្ឋដែលដាក់លក់តាមកញ្ច្រែងល្អីតូចៗ ហើយត្រូវសម្រួលទីតាំងឱ្យពួកគាត់បានលក់ដូរសមរម្យជាដើម។
វ័យ៥៩ឆ្នាំ អ្នកស្រី ជៀស ម៉េត ដែលអះអាងថាជាអាជីវករលក់បន្លែត្រសក់ ស្ពៃតឿ ស្ពែក្រញាញ់ និងស្ពៃស នៅផ្សារឈូក ខេត្តកំពត បានប្រាប់ វីអូឌី នៅថ្ងៃទី២៧ ខែតុលានេះថា រូបគាត់និងអាជីវករផ្សេងទៀតមានក្ដីរីករាយ នៅពេលទទួលបានព័ត៌មានកាលពីម្សិលមិញថា អភិបាលខេត្តថ្មី មិនឱ្យអាជ្ញាធរស្រុកនិងអ្នកគ្រប់គ្រងផ្សារយកភាស៊ីពីពលរដ្ឋដែលដាក់លក់តាមកញ្ច្រែងល្អីតូចៗនេះ។
ប៉ុន្តែអ្នកស្រីបង្ហាញការសោកស្ដាយចំពោះអាជ្ញាធរដែលមិនអនុវត្តតាមការណែនាំនេះ ដោយសារនៅថ្ងៃទី២៧ ខែតុលានេះ ប្រហែលជាងម៉ោង៩ព្រឹក អ្នកយកភាស៊ីតាមផ្សារឈូក នៅតែមកយកលុយភាស៊ីពីគាត់និងអាជីវករផ្សេងទៀត ក្នុងមួយកន្លែងចន្លោះពី៥០០រៀលដល់១ ០០០រៀល។
អ្នកស្រីថា៖ «ជួនណាគាត់មកយកភាស៊ីនៅម៉ោងជាង៩ ជួនណាម៉ោងជាង១០ព្រឹក គាត់ដើរមកយកភាស៊ីពីខ្ញុំនៅផ្សារ យកពីខ្ញុំ៥០០រៀល។ មកយកថ្ងៃហ្នឹង នៅម៉ោងប្រហែលជាង៩ព្រឹក។ បើគេលក់ធំដុំ គេយក១ ០០០រៀល បើខ្ញុំលក់តិចតួច គេយក៥០០រៀល»។
អ្នកស្រី អ៊ុន ធាវី ដែលអះអាងថាជាអាជីវករលក់សាច់មាន់និងទាតាមកញ្ច្រែងល្អី ចន្លោះពី៥ទៅ១០ក្បាលក្នុងមួយថ្ងៃ និយាយថា គាត់ត្រូវបង់ភាស៊ីក្នុងមួយថ្ងៃចំនួន១ ០០០រៀល ទៅឱ្យអ្នកគ្រប់គ្រងភាស៊ីក្នុងផ្សារឈូកជារៀងរាល់ថ្ងៃ ទោះបីជាលក់មិនដាច់ក៏ត្រូវបង់ឱ្យដែរ។
អ្នកស្រីស្នើទៅអ្នកគ្រប់គ្រងផ្សារឈូក ឱ្យឈប់យកភាស៊ីពីអាជីវករដែលលក់តាមកញ្ច្រែងល្អី តាមការណែនាំរបស់អាជ្ញាធរខេត្ត ដើម្បីទុកឱកាសឱ្យពលរដ្ឋបានសន្សំប្រាក់ខ្លះទ្រទ្រង់ជីវភាពក្នុងគ្រួសារ។
អ្នកស្រីស្នើថា៖ «ខ្ញុំចង់ឱ្យគាត់ [អភិបាលខេត្តកំពត លោក ម៉ៅ ធនិន] ជួយកុំឱ្យអាជ្ញាធរគាត់យកភាស៊ី ព្រោះយើងលក់បានតិចតួចគ្រាន់ទិញម្ហូប។ បើយកច្រើន ណាមួយយើងលក់មិនដាច់ អ្នកលក់មាន់មានគ្នា៤នាក់ ប្រាប់អាជ្ញាធរយកភាស៊ីថា បងយកម្នាក់៥០០រៀលទៅ គាត់[អ្នកយកភាស៊ី]ថាមិនព្រម គេមិនដឹងថាលក់ដាច់ឬមិនដាច់ទេ ប៉ុន្តែមេគេឱ្យយក១ ០០០រៀល គេអត់ព្រមចុះ»។
វីអូឌី មិនអាចសុំការបំភ្លឺពីប្រធានផ្សារឈូកបានទេនៅថ្ងៃនេះ ខណៈអភិបាលខេត្តកំពត លោក ម៉ៅ ធនិន អះអាងថាជាប់រវល់ប្រជុំ។
មន្ត្រីឃ្លាំមើលសិទ្ធិមនុស្សអង្គការអាដហុកខេត្តកំពត លោក យន់ ផល្លី សាទរនឹងការលើកឡើងរបស់អភិបាលខេត្ត ដែលអំពាវនាវទៅអាជ្ញាធរឈប់យកភាស៊ីពីអ្នកលក់ដូរតាមកញ្ច្រែងល្អី។ ប៉ុន្តែលោកថា បើដូចអាជីវករលើកឡើងថា អ្នកយកភាស៊ីផ្សារនៅតែបន្តយកពីអាជីវករមែននោះ ថ្នាក់ដឹកនាំខេត្ត ត្រូវចាត់វិធានការរដ្ឋបាលឬវិធានការច្បាប់លើមន្ត្រីថ្នាក់ក្រោមទាំងនោះ ដើម្បីជាគំរូល្អ កុំឱ្យរឿងបែបនេះកើតឡើងបន្តទៀត ។
លោកមានប្រសាសន៍ថា៖ «បើសិនជាមិនអនុវត្តទៅតាមអនុសាសន៍ ឬក៏តាមការណែនាំរបស់អភិបាលខេត្ត បានន័យថា អាជ្ញាធរដែនដីត្រូវមានវិធានការចំពោះបុគ្គលហ្នឹង ត្រូវតែមានវិធាន ដើម្បីជាគំរូល្អ ដើម្បីឱ្យអ្នកផ្សេងៗទៀតយកគំរូតាម»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ កត់សម្គាល់ថា ក្រោយពីសារាចររបស់រដ្ឋាភិបាលចេញកាលពីដើមខែធ្នូ ឆ្នាំ២០១៦ មិនឱ្យអាជ្ញាធររាជធានី-ខេត្ត យកភាស៊ីពីអាជីវករក្រីក្រដែលលក់តាមកញ្ច្រែងល្អី គឺអាជ្ញាធរទាំងនោះផ្អាកយកបានប្រហែលជា៥ទៅ៦ខែតែប៉ុណ្ណោះ។ ក្រោយមក លោកថា ការយកភាស៊ីនៅតែបន្តកើតមានដដែល រហូតមកដល់ពេលបច្ចុប្បន្ននេះ។
លោកមានប្រសាសន៍ថា៖ «អ្នកក្រីក្រលក់ដូរដើម្បីផ្គត់ផ្គង់សម្រាប់ជីវភាពប្រចាំថ្ងៃ ធ្វើឱ្យប៉ះពាល់ការប្រកបមុខរបរអាជីវកម្មតូចតាចរបស់ពួកគាត់។ ហើយចំណុចទី២ ធ្វើឱ្យមានការលំបាកសម្រាប់រកកន្លែងលក់ដូរតូចតាចទាំងអស់ហ្នឹងផងដែរ បើសិនជាមិនមានយន្តការច្បាស់លាស់ដូចមានចែងក្នុងសារាចររបស់រដ្ឋាភិបាល ឬអាជ្ញាធរទាំងអស់ហ្នឹងមានប្រសាសន៍តែក្នុងវេទិកា ឬក៏សំណេះសំណាលពលរដ្ឋ តែអត់មានយន្តការជាក់លាក់ណាមួយ យើងឃើញថា រឿងហ្នឹងវាហាក់ដូចជាមិនមានប្រសិទ្ធភាពអ្វីសម្រាប់ជាប្រយោជន៍ពលរដ្ឋប៉ុន្មានទេ»។
យោងតាមសារាចររបស់រដ្ឋាភិបាលចុះថ្ងៃទី០៩ ខែធ្នូ ឆ្នាំ២០១៦ បានសម្រេចលុបចោលការបង់ថ្លៃភាស៊ី និងការបង់ថ្លៃសេវាផ្សេងទៀត ចំពោះការលក់ដូររបស់ប្រជាពលរដ្ឋតាមកញ្ច្រែង កញ្ជើ ល្អី ដើម្បីកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាពលរដ្ឋ ព្រមទាំងកែលម្អសេវាសាធារណៈជូនប្រជាពលរដ្ឋ៕
