រដ្ឋមន្រ្តីការបរទេសចិន និងជាទីប្រឹក្សារដ្ឋ លោក វ៉ាង យី (Wang Yi) បានឱ្យដឹងតាមរយៈសន្និសីទមួយដែលធ្វើឡើងនៅក្នុងប្រទេសអ៊ីរ៉ង់ថា ក្រុមតាលីបង់ដែលបច្ចុប្បន្នគ្រប់គ្រងប្រទេសអាហ្វហ្គានីស្ថាន មានគោលបំណងចង់ឱ្យមានកិច្ចសន្ទនាជាមួយសហគមន៍អន្តរជាតិ។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្រ្តីការបរទេសចិនរូបនេះ ដែលបានលើកឡើងនៅក្នុងសារចេញផ្សាយដោយទូរទស្សន៍រដ្ឋអ៊ីរ៉ង់ថា៖ «ក្រុមតាលីបង់ ពិតជាចង់មានកិច្ចសន្ទនាជាមួយពិភពលោកខ្លាំងណាស់ ហើយចិននឹងរៀបចំកិច្ចប្រជុំរវាងប្រទេសជិតខាងអាហ្វហ្គានីស្ថានលើកទី៣ ក្នុងពេលវេលាសមស្របណាមួយនាពេលខាងមុខនេះ»។
ជាមួយគ្នានេះ លោក វ៉ាង យី ក៏បានជំរុញសហគមន៍អន្តរជាតិជួយដល់ការអភិវឌ្ឍរបស់អាហ្វហ្គានីស្ថានផងដែរ។
ចិន កាលពីពេលកន្លងទៅ ក៏ធ្លាប់បានស្នើពិភពលោកគួរតែគាំទ្រដល់ប្រទេសអាហ្វហ្គានីស្ថាន មិនមែនដាក់សម្ពាធបន្ថែមទៀតនោះទេ ខណៈដែលពួកគេក៏បានទាមទារឱ្យមានការដកទណ្ឌកម្មសេដ្ឋកិច្ចនានា និងដកការបង្កកទ្រព្យសម្បត្តិអន្តរជាតិលើប្រទេសមួយនេះរាប់ពាន់លានដុល្លារផងដែរ។
ជាការឆ្លើយតប អ្នកនាំពាក្យក្រុមតាលីបង់មួយរូបបានថ្លែងថា ប្រទេសចិនបានដើរតួនាទីស្ថាបនាក្នុងការលើកកម្ពស់សន្តិភាពនិងការផ្សះផ្សានៅអាហ្វហ្គានីស្ថាន ហើយពួកគេស្វាគមន៍ចិនជានិច្ចក្នុងការរួមចំណែកក្នុងការកសាងឡើងវិញរបស់ខ្លួន៕