បុគ្គលិកផ្នែកព័ត៌មាននៅទូរទស្សន៍ CNC ដែលត្រូវក្រុមហ៊ុនបញ្ឈប់ពីការងារ បានអះអាងថា ពួកគេកំពុងរកកិច្ចអន្តរាគមន៍ផ្លូវច្បាប់ ដើម្បីទាមទារអត្ថប្រយោជន៍ផ្សេងៗតាមច្បាប់ស្តីពីការងារ។
បុគ្គលិកផ្នែកព័ត៌មាន លោក យ៉ង់ សុភា បានឱ្យ VOD ដឹងនៅថ្ងៃពុធនេះថា ក្រុមការងារផ្នែកព័ត៌មាន ផ្នែកកាត់តរូបភាព និងផ្នែកសម្របសម្រួលកម្មវិធី សរុបចំនួន២២នាក់ ត្រូវបានក្រុមហ៊ុន ខេមបូឌាន ប្រតខេសស្ទីងសឺវីស (Cambodian Broadcasting Service Co.,Ltd)បញ្ឈប់ពីការងារ ក្រោមហេតុផលថាជួបវិបត្តិហិរញ្ញវត្ថុ។
លោកបន្តថា កាលពីថ្ងៃចន្ទ ភាគីក្រុមហ៊ុនបានជូនដំណឹងឱ្យពួកគេមកកាន់ស្នាក់ការកណ្ដាលនៅរាជធានីភ្នំពេញ ដោយយកទាំងឧបករណ៍ផ្សេងៗមកជាមួយផង ដើម្បីធ្វើជំរឿនបុគ្គលិក។
លោកថា៖ «ប៉ុន្តែពេលមកដល់ហ្នឹង គាត់ [ភាគីក្រុមហ៊ុន] បានប្រាប់ហេតុផលយើងថា ក្រុមហ៊ុនមានបញ្ហា ត្រូវការរំសាយបុគ្គលិកមួយចំនួន។ គាត់មានលិខិតជាលាយលក្ខណ៍អក្សរឱ្យយើងចុះហត្ថលេខាទៅ ប៉ុន្តែយើងអត់ចុះទេ ដោយសារតែយើងយល់ឃើញថា អត្ថប្រយោជន៍ទាំងនោះមិនទាន់ស្របទៅតាមច្បាប់នៅឡើយ»។
បើតាមលោក សុភា ពេលនេះក្រុមការងារនៅទូរទស្សន៍ CNC ដែលត្រូវក្រុមហ៊ុនបញ្ឈប់ពីការងារ បានរកមេធាវីឱ្យជួយការពារក្ដី ដើម្បីទាមទារអត្ថប្រយោជន៍បន្ថែមក្រៅពីក្រុមហ៊ុនទូទាត់ឱ្យ ទៅតាមច្បាប់ស្តីពីការងារ។
មេធាវីនៅសហភាពការងារកម្ពុជា លោក ឌួង វាសនា អះអាងថា លោកបានទទួលការពឹងពាក់ករណីនេះពីបុគ្គលិកទូរទស្សន៍ CNC ដែលត្រូវគេបញ្ឈប់ពិតមែន។ តែលោកថា មិនទាន់បានដឹងពីមូលហេតុលម្អិតពីដំណើររឿងនេះនៅឡើយ។
លោកថា៖ «គាត់ថាបញ្ឈប់ហើយ អត់គិតលុយឱ្យស្របតាមច្បាប់ស្ដីពីការងារ»។
នាយករងផ្នែកព័ត៌មាននៅទូរទស្សន៍ CNC កញ្ញា អ៊ុង ចាន់សោភា សុំមិនធ្វើអត្ថាធិប្បាយ ដោយថាមិនដឹងរឿងតវ៉ានេះ។
កញ្ញាថា៖ «ខ្ញុំអត់ទាន់ដឹងព័ត៌មានហ្នឹងទេ អ៊ីចឹងខ្ញុំអត់ទាន់មានអីនិយាយទេ»។
យ៉ាងណា បុគ្គលិកផ្នែកព័ត៌មានដែលត្រូវបញ្ឈប់ លោក យ៉ង់ សុភា បានបញ្ជាក់ថា ក្រុមបុគ្គលិក ដែលត្រូវក្រុមហ៊ុនបញ្ឈប់ពីការងារដោយមិនមានកំហុសនេះ មិនបដិសេធចំពោះការសម្រេចរបស់ក្រុមហ៊ុននោះទេ ប៉ុន្តែពួកគេស្នើឱ្យក្រុមហ៊ុនអនុវត្តផលប្រយោជន៍ជាសំណងទៅតាមច្បាប់លើកិច្ចសន្យាការងារមិនកំណត់ថេរវេលា រវាងពួកគេនិងក្រុមហ៊ុន ខណៈការបញ្ឈប់នេះ ភាគីក្រុមហ៊ុនបានផ្ដល់ឱ្យប្រាក់អតីតភាព ប្រាក់ឈប់សម្រាកប្រចាំឆ្នាំ (គិតតែមួយឆ្នាំចុងក្រោយ) ប្រាក់ដំណាច់ជួសការជូនដំណឹង និងប្រាក់ខែចុងក្រោយ។
បើតាមលោក យ៉ង់ សុភា ការបញ្ឈប់ពួកគេនេះ ភាគីក្រុមហ៊ុនមិនបានផ្ដល់អត្ថប្រយោជន៍ទៅតាមច្បាប់កាងារទេ ដូចជា ប្រាក់ដំណាច់ឆ្នាំ ប្រាក់អតីតភាពការងារ និងប្រាក់ជំងឺចិត្ត ជាដើម៕
