ប្រមុខរដ្ឋាភិបាល លោក ហ៊ុន សែន បានសម្រេចកាត់ផ្ទៃដី «បឹងតាមោក» ឬ «បឹងទំនប់កប់ស្រូវ» ទំហំជិត៣៦ម៉ឺនម៉ែត្រក្រឡា (៣៥៩ ៧២៧,៥ហិកតា) ឬស្មើជិត៣៦ហិកតា ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ដើម្បីប្រគល់ទៅឱ្យអគ្គមេបញ្ជាការនៃកងយោធពលខេមរភូមិន្ទ ព្រមទាំងមន្ត្រីជាន់ខ្ពស់យោធាមួយចំនួនទៀត សម្រាប់ធ្វើកម្មសិទ្ធិ។
ក្នុងអនុក្រឹត្យចុះថ្ងៃទី២៦ ខែសីហា ឆ្នាំ២០២១ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន បានឱ្យដឹងថា មន្ត្រីជាន់ខ្ពស់នៃកងយោធពលខេមរភូមិន្ទដែលទទួលបានដីបឹងតាមោកនោះ រួមមាន អគ្គមេបញ្ជាការនៃកងយោធពលខេមរភូមិន្ទ លោក វង្ស ពិសេន, អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ព្រមទាំងលេខាធិការរងនៃអគ្គលេខាធិការដ្ឋាន និងជានាយកនៃនាយកដ្ឋានអធិការកិច្ចនៃក្រសួងការពារជាតិ លោក យ៉ា គឹមអ៊ី។
អនុក្រឹត្យដដែលបន្តថា រដ្ឋាភិបាលក៏បានសម្រេចប្រគល់ដីនៅបឹងតាមោកទៅឱ្យស្នងការនៃស្នងការដ្ឋានស្រាវជ្រាវនិងបង្ក្រាបបទល្មើស នៃបញ្ជាការដ្ឋានកងរាជអាវុធហត្ថលើផ្ទៃប្រទេស លោក សៀ សម្បត្តិ និងលោក ប៉ោ ម៉េង ផងដែរ។
អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា បានទទួលស្គាល់ថា រដ្ឋាភិបាលពិតជាកាត់ផ្ទៃដីបឹងតាមោកជិត៣៦ហិកតា ឱ្យរូបលោក និងលោក វង្ស ពិសេន រួមទាំងមន្ត្រីផ្សេងទៀតប្រាកដមែន។ លោកបន្តថា ដីជិត៣៦ហិកតានេះជាដីដែលរូបលោកនិងមន្ត្រីផ្សេងទៀតទិញពីប្រជាពលរដ្ឋ ហើយពុំមែនជាដីបឹងនោះឡើយ។
លោកថា៖ «អនុក្រឹត្យហ្នឹងពិតត្រឹមត្រូវហើយ ព្រោះដីហ្នឹងជាដីរបស់ពួកខ្ញុំទិញពីប្រជាជនច្រើនឆ្នាំណាស់មកហើយ។ អ៊ីចឹងបានរាជរដ្ឋាភិបាលលោកប្រគល់មកឱ្យវិញហ្នឹង។ កន្លងមក មិនមែនផ្ទៃបឹងទាំងមូលទេ ប៉ុន្តែគេទប់ទឹកទៅ វាឡើងលិចទៅដល់ស្រែរបស់ប្រជាជន ដែលកាលខ្ញុំទិញ មិនមែនទិញបឹងទាំងមូលទេ។ អាណាទៅយកដីបឹងម៉េច អត់ទេ អត់មានទៅយកដីបឹងទេ»។
ក្រៅពីមន្ត្រីទាំងនោះ រដ្ឋាភិបាលក៏ធ្លាប់បានកាត់ដីនៅតំបន់បឹងធម្មជាតិមួយនេះប្រគល់ឱ្យឧកញ៉ា ក្រុមហ៊ុនឯកជន អគ្គស្នងការដ្ឋាននគរបាលជាតិ រួមទាំងក្រសួងមួយចំនួនទៀត។
ជាក់ស្ដែង កាលពីថ្ងៃទី៥ ខែសីហា ឆ្នាំ២០២១ លោកនាយករដ្ឋមន្ត្រី ហ៊ុន សែន កាត់ដីផ្ទៃបឹងតាមោកចំនួន១០០ហិកតា ប្រគល់ឱ្យក្រសួងមហាផ្ទៃ ធ្វើជាកម្មសិទ្ធិ ប៉ុន្តែដីផ្ទៃ១០០ហិកតានេះត្រូវបានក្រសួងមហាផ្ទៃប្រកាសលក់ ដើម្បីយកប្រាក់សម្រាប់សាងសង់អគារការិយាល័យដែលមានស្រាប់ឡើងវិញ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់ វីអូឌី កាលពីថ្ងៃទី២១ ខែតុលា ឆ្នាំ២០២១ ថាមូលហេតុដែលក្រសួងប្រកាសលក់ដីបឹងតាមោក ១០០ហិកតានោះ ដោយសារខ្វះប្រាក់សម្រាប់កសាងអគារទីស្ដីការក្រសួងមហាផ្ទៃ។
លោកថា៖ «ការកសាងហ្នឹង យើងបានស្នើសុំលុយពីរដ្ឋាភិបាលហើយ ហើយយើងខ្វះលុយសាងសង់អគារហ្នឹង ដូចសម្ដេចក្រឡាហោមលោកមានប្រសាសន៍អ៊ីចឹង អត់មានប្រើប្រាស់លុយរដ្ឋាភិបាលទេ។ យើងប្រើប្រាស់លុយដូនតាយើង ហើយលុយដូនតាយើង គឺលុយដីហ្នឹងឯង។ ដូច្នេះ គណៈកម្មការហ្នឹង ដើម្បីបានដីហ្នឹងហើយ យើងដោះដូរជាប្រាក់។ ដូច្នេះ បានប៉ុន្មានៗ ទាល់តែសួរគណៈកម្មការហ្នឹងទៅ ពូមិនដឹងទេ! [យើងចាប់ផ្ដើមសាងសង់] និយាយរួម យើងនៅតែពិភាក្សាថ្លៃ មើលប្លង់ដីឡើងវិញ យើងចាប់ផ្ដើមសាងសង់មិនហួសពីឆ្នាំហ្នឹងទេ»។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា (CYN) លោក ហេង គឹមហុង បង្ហាញការសោកស្ដាយ នៅពេលរដ្ឋាភិបាលបន្តកាត់ផ្ទៃបឹងតាមោកដែលជាបឹងធម្មជាតិចុងក្រោយសម្រាប់រំដោះទឹកនៅរាជធានីភ្នំពេញ ទៅឱ្យបុគ្គលឯកជន បើទោះបីជាកន្លងមក លោកនាយករដ្ឋមន្ត្រី ហ៊ុន សែន ធ្លាប់ប្រកាសប្ដេជ្ញាការពារក៏ដោយ។
លោកស្នើទៅរដ្ឋាភិបាលបញ្ឈប់ការកាត់ឬលុបបឹងធម្មជាតិបន្តទៀត ដោយថា ការលុបបឹងនេះបានបង្កផលប៉ះពាល់បរិស្ថានច្រើន រួមទាំងធ្វើឱ្យមានទឹកជន់លិចរាជធានីភ្នំពេញជារៀងរាល់ឆ្នាំ ចាប់តាំងពីបឹងធំៗត្រូវបានលុបអស់នោះ។
លោកថា៖ «ខ្ញុំគិតថា ដល់ពេលដែលរដ្ឋាភិបាលឈប់កាត់ផ្ទៃបឹងធម្មជាតិហើយ ពីព្រោះអីការកាត់ផ្ទៃបឹងធម្មជាតិ ប្រគល់ទៅឱ្យឯកជន វាមិនបានផ្ដល់ផលសម្រាប់ការអភិវឌ្ឍទីក្រុងទេ ហើយក៏ជារឿងអយុត្តិធម៌សម្រាប់ប្រជាជនផ្សេងទៀត។ ពួកគាត់ទទួលបានដីសង្គមកិច្ចនៅតំបន់ដាច់ស្រយាល ឆ្ងាយពីហេដ្ឋារចនាសម្ព័ន្ធ ប៉ុន្តែផ្ទុយទៅវិញ មន្ត្រីជាន់ខ្ពស់ កងទ័ព ឬកងរាជអាវុធហត្ថ បែរជាទទួលបានដីនៅក្នុងទីក្រុង ដោយមិនមានការព្រួយបារម្ភពីផលប៉ះពាល់បរិស្ថាន»។
បឹងតាមោក មានផ្ទៃដីសរុប៣ ២៣៩ហិកតា ជាអាងស្តុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បតិ្តសាធារណៈរបស់រដ្ឋ។
ប៉ុន្តែយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ ចាប់តាំងពីឆ្នាំ២០១៨ ដល់ខែចុងខែកញ្ញា ឆ្នាំ២០២១ ផ្ទៃបឹងតាមោកជាង១ ០០០ហិកតាហើយ ត្រូវបានរដ្ឋាភិបាលខ្លួនឯងបានកាត់និងដោះដូរទៅឱ្យស្ថាប័នរដ្ឋ និងក្រុមហ៊ុនឯកជន ទៅឱ្យបុគ្គលឯកជន ដែលគេដឹងថា ជាអ្នកមានប្រាក់និងមានអំណាច សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួនផងដែរ៕
