រដ្ឋមន្ត្រីក្រសួងការបរទេសសហរដ្ឋអាមេរិក លោក Antony Blinken នៅក្នុងកិច្ចសន្ទនាតាមរយៈទូរសព្ទជាមួយរដ្ឋមន្ត្រីការបរទេសស៊ូដង់ អ្នកស្រី Mariam Sadiq al-Mahdi នៅថ្ងៃព្រហស្បតិ៍នេះ បានថ្កោលទោសទាក់ទងទៅនឹងការកាន់កាប់អំណាចដោយពួកយោធារបស់ប្រទេសស៊ូដង់ និងការចាប់ខ្លួនមេដឹកនាំស៊ីវិលមួយចំនួនរបស់ប្រទេសនេះ។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្ត្រីការបរទេសអាមេរិករូបនេះ ដែលបានលើកឡើងនៅលើបណ្ដាញសង្គម ធ្វីតធ័រ (Twitter) ថា ពួកគេក៏បានពិភាក្សាអំពីវិធីដ៏ល្អបំផុតដែលសហរដ្ឋអាមេរិកអាចគាំទ្រចំពោះការអំពាវនាវរបស់ប្រជាជនស៊ូដង់ សម្រាប់ការវិលត្រលប់ទៅកាន់លទ្ធិប្រជាធិបតេយ្យវិញផងដែរ។
គិតចាប់តាំងពីមានការដណ្ដើមអំណាចរបស់ពួកយោធា កាលពីថ្ងៃចន្ទ មនុស្សរាប់ពាន់នាក់នៅក្នុងប្រទេសស៊ូដង់ បានប្រមូលផ្ដុំគ្នាចេញមកដើរនៅតាមដងផ្លូវទាំងឡាយ ដើម្បីធ្វើសកម្មភាពតវ៉ានានា ដែលក្នុងនោះមនុស្សជាច្រើននាក់ក៏ត្រូវបានសម្លាប់នៅក្នុងការប៉ះទង្គិចគ្នាជាមួយកងកម្លាំងសន្តិសុខផងដែរ។
គួរបញ្ជាក់ថា នាយករដ្ឋមន្ត្រីស៊ូដង់ លោក Abdalla Hamdok ក៏ត្រូវបានកងកម្លាំងផ្លាស់ទៅកាន់ទីតាំងមិនស្គាល់មួយ បន្ទាប់ពីលោកបដិសេធចេញសេចក្ដីថ្លែងការណ៍ដើម្បីគាំទ្រដល់រដ្ឋប្រហារយោធានេះ ស្របពេលទាហានក៏បានចាប់ខ្លួនសមាជិកភាគច្រើននៃគណៈរដ្ឋមន្ត្រីរបស់ស៊ូដង់ និងមេដឹកនាំគណបក្សដែលគាំទ្ររដ្ឋាភិបាលមួយចំនួនធំផងដែរ ដែលបានធ្វើឱ្យលទ្ធិប្រជាធិបតេយ្យរបស់ប្រទេសនេះធ្លាក់ចូលទៅក្នុងភាពច្របូកច្របល់៕
