ក្រុមមន្ត្រីសង្គមស៊ីវិល ស្នើទៅរដ្ឋាភិបាលនិងស្ថាប័នពាក់ព័ន្ធ គប្បីផ្សព្វផ្សាយពីចំណូលនិងចំណាយថវិកាជាតិជូនសាធារណជនឱ្យបានទូលំទូលាយ ដើម្បីបង្ហាញពីតម្លាភាពនិងគណនេយ្យភាពនៃការគ្រប់គ្រងថវិការដ្ឋ។
ក្នុងវេទិកាសាធារណៈថ្នាក់ជាតិស្តីពី «ការចូលរួមរបស់ពលរដ្ឋក្នុងដំណើរការនៃការកសាងផែនការថវិកា និងការតាមដានលើការចំណាយថវិកាសាធារណៈក្នុងបរិបទកូវីដ-១៩» នៅថ្ងៃនេះ នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បានថ្លែងថា រដ្ឋាភិបាលត្រូវបង្កើនការយល់ដឹងនិងលើកកម្ពស់ការចូលរួមរបស់សាធារណជន អំពីគណនេយ្យភាពថវិកា រួមទាំងដំណើរការនៃការរៀបចំផែនការថវិកា ការអនុវត្តផែនការថវិកានៅថ្នាក់ជាតិនិងថ្នាក់ក្រោមជាតិ។
ករណីនេះ លោកបានស្នើទៅរដ្ឋាភិបាលនិងស្ថាប័នពាក់ព័ន្ធត្រូវផ្សព្វផ្សាយពីចំណូលនិងចំណាយថវិកាជាតិជូនសាធារណជនឱ្យបានទូលំទូលាយ ដើម្បីឆ្លើយតបនឹងតម្រូវការរបស់ប្រជាពលរដ្ឋដែលជាអ្នកបង់ពន្ធជូនរដ្ឋ។
លោកថ្លែងថា៖ «ដើម្បីធានាថា ដើម្បីរៀបចំថវិកាប្រព្រឹត្តទៅដោយមានតម្លាភាព មានគណនេយ្យភាព ហើយមានការចូលរួម ហើយតួអង្គសំខាន់ទាំងនោះមានទី១ អង្គនីតិប្រតិបត្តិ ដែលមានក្រសួងសេដ្ឋកិច្ច និងហិរញ្ញវត្ថុ ចូលរួមក្នុងការដឹកនាំស្នូលនៅក្នុងដំណើរការរាល់វដ្ដនៃការរៀបចំថវិកាជាតិ ពីថ្នាក់ក្រោមមកដល់ថ្នាក់លើ»។
លោកបន្ថែមថា៖ «តួអង្គ២សំខាន់ គឺរដ្ឋសភានិងព្រឹទ្ធសភា ដែលលោកដើរតួនាទីក្នុងការត្រួតពិនិត្យសួរដេញដោល ក៏ដូចជាការជំរុញការជជែកពិភាក្សាស៊ីជម្រៅអំពីសំណើថវិការបស់រដ្ឋ ដើម្បីធានាថា សំណើថវិកាជាតិយើងប្រចាំឆ្នាំ គឺឆ្លើយតបទៅនឹងតម្រូវការរបស់ពលរដ្ឋ តម្រូវការជាអាទិភាពក្នុងការជំរុញម៉ាក្រូសេដ្ឋកិច្ចឱ្យដើរ ហើយធានាថា ថវិកាវិកានោះឆ្លើយតបទៅនឹងប្រជាពលរដ្ឋ។ តួអង្គទី៣ សំខាន់តែម្តង ពលរដ្ឋជាម្ចាស់ថវិកា គាត់មានការបង់ពន្ធ គាត់មានការទទួលខុសត្រូវ គាត់មានគណនេយ្យភាពចំពោះរដ្ឋមួយ គាត់ត្រូវបានកាតព្វកិច្ចបង់ពន្ធ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ ថ្លែងក្នុងវេទិកានោះថា ដើម្បីគ្រប់គ្រងថវិកាជាតិឱ្យមានតម្លាភាពពីថ្នាក់ជាតិដល់ថ្នាក់ក្រោមជាតិ និងមានជំនឿទុកចិត្តពីសាធារណជន លុះត្រាតែស្ថាប័នអនុម័តច្បាប់ និងអ្នកអនុវត្ត ត្រូវធ្វើឱ្យមានតម្លាភាព ទើបទទួលបានផលវិជ្ជមានខ្ពស់។
លោកថ្លែងថា៖ «នៅពេលដែលនីតិប្រតិបត្តិយកច្បាប់ទៅអនុវត្ត អត់មានការដាក់បញ្ចូលនូវក្នុងដំណាក់កាលហ្នឹង ពេលហ្នឹងរដ្ឋាភិបាលថា រដ្ឋសភាអនុម័តច្បាប់មកអត់បាននិយាយពីចំណុចហ្នឹង អ៊ីចឹងបានខ្ញុំថា ការចូលរួមរបស់ប្រជាពលរដ្ឋជាគំនិតមួយរួមនៅក្នុងអង្គទាំង៣ នីតិបញ្ញត្តិ ប្រតិបត្តិ និងតុលាការ។ ខ្ញុំគិតថា បង្កបរិយាកាសឱ្យមានការចូលរួមយ៉ាងទូលំទូលាយ ហើយក្រៅពីហ្នឹងមានច្បាប់ដទៃទៀតដែលពាក់ព័ន្ធការប្រើប្រាស់ថវិកា ជំរុញឱ្យមានគណេយ្យភាពថវិកា»។
វីអូឌី មិនអាចទាក់ទងអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានទេ នៅថ្ងៃទី២៨ ខែតុលានេះ។
យោងតាមលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភា កាលពីថ្ងៃទី២៧ ខែតុលា បានអនុម័តទទួលយកសេចក្ដីព្រាងច្បាប់ចំនួន៣ដែលស្នើឡើងដោយរាជរដ្ឋាភិបាល ដោយក្នុងនោះក៏មានសេចក្ដីព្រាងច្បាប់ស្ដីពីការគ្រប់គ្រងហិរញ្ញវត្ថុសម្រាប់ឆ្នាំ២០២២ និងសេចក្ដីព្រាងច្បាប់ស្ដីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២០ផងដែរ។
បើតាមសេចក្ដីព្រាងច្បាប់ស្ដីពីការគ្រប់គ្រងហិរញ្ញវត្ថុសម្រាប់ឆ្នាំ២០២២ រដ្ឋាភិបាលគ្រោងចំណាយថវិកាជាង៨ ៥០០លានដុល្លារ កើនឡើងជាង៨ភាគរយ (៨,៤%) បើធៀបនឹងថវិកាចំណាយឆ្នាំ២០២១។ នៅក្នុងគម្រោងថវិកាជាតិឆ្នាំ២០២២នេះ កម្ពុជាក៏គ្រោងខ្ចីពីបរទេសនិងដៃគូអភិវឌ្ឍន៍ជាង២ ០០០លានដុល្លារថែមទៀតផង៕