គណបក្សប្រជាធិបតេយ្យមូលដ្ឋាន ទាមទារឱ្យរដ្ឋាភិបាលបង្ហាញវិធានការជាក់លាក់ក្នុងការរំដោះទឹកជំនន់ពីស្ទឹងព្រែកត្នោត ដើម្បីទប់ស្កាត់កុំឱ្យបញ្ហានេះបង្កផលប៉ះពាល់ដល់ជីវភាពរស់នៅរបស់ប្រជាពលរដ្ឋនៅរាជធានីភ្នំពេញ និងផ្នែកខ្លះនៅខេត្តកណ្ដាលជាថ្មីទៀត។
គណបក្សនេះបានលើកឡើងនៅក្នុងសេចក្ដីថ្លែងការណ៍ចុះថ្ងៃទី២៨ ខែតុលា ឆ្នាំ២០២១នេះថា កាលពីឆ្នាំ២០២០ ស្ទឹងព្រែកត្នោត បានបង្កឱ្យមានទឹកជន់លិចមួយផ្នែកនៃរាជធានីភ្នំពេញ និងខេត្តកណ្ដាល ដែលថា ការនេះប៉ះពាល់ធ្ងន់ធ្ងរដល់ជីវភាពនិងសេដ្ឋកិច្ចរបស់ប្រជាពលរដ្ឋ។
គណបក្សនេះកត់សម្គាល់ទៀតថា នៅឆ្នាំ២០២១នេះ ទឹកជំនន់ស្ទឹងព្រែកត្នោតក៏បន្តកើតមានឡើងជាថ្មីទៀត បង្កឱ្យមានការព្រួយបារម្ភកាន់តែខ្លាំងចំពោះបញ្ហាដដែលៗនេះថាអាចនឹងកើតមានឡើងបន្តទៀតនៅឆ្នាំខាងមុខ។
បញ្ហានេះ គណបក្សប្រជាធិបតេយ្យមូលដ្ឋាន បានចោទសួរទៅរដ្ឋាភិបាលថា តើរដ្ឋាភិបាលបានរៀនសូត្រអ្វីខ្លះពីបទពិសោធន៍ទឹកជំនន់នៅឆ្នាំ២០២០ និង២០២១? ហើយមានគម្រោងអ្វីជាក់លាក់ ដើម្បីការពារទឹកជំនន់ស្ទឹងព្រែកត្នោតឬទេ? បើទឹកជំនន់បន្តមានសភាពធ្ងន់ធ្ងរទៀតនៅឆ្នាំ២០២២ តើស្ថាប័នណាជាអ្នកទទួលខុសត្រូវចំពោះប្រជាពលរដ្ឋដែលរងគ្រោះ។
បន្ថែមលើសេចក្ដីថ្លែងការណ៍នេះ អគ្គលេខាធិការគណបក្សប្រជាធិបតេយ្យមូលដ្ឋាន លោកបណ្ឌិត សាម អ៊ីន បានថ្លែងថា ការដែលគណបក្សសម្រេចចេញលិខិតចំហបែបនេះ គឺចង់ឱ្យរដ្ឋាភិបាល ទទួលខុសត្រូវចំពោះមុខប្រជាពលរដ្ឋ។
លោកថា៖ «រាជរដ្ឋាភិបាលហ្នឹងគឺមានកាតព្វកិច្ចទទួលខុសត្រូវក្នុងការឆ្លើយបញ្ជាក់ជូនប្រជាពលរដ្ឋថាហេតុអ្វីបានខ្លួនធ្វើរឿងហ្នឹងមិនបាន ហើយត្រូវមានផែនការច្បាស់លាស់ដើម្បីដោះស្រាយរឿងហ្នឹងកុំឱ្យរាល់ឆ្នាំរឿងហ្នឹងវាកើតឡើងដដែលៗ ហើយយកអំណោយតិចតួចយកទៅចែកប្រជាពលរដ្ឋ។ យើងគិតថា ជាការដឹកនាំមួយដែលមិនទទួលខុសត្រូវខ្ពស់ចំពោះប្រជាពលរដ្ឋទេ»។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា រដ្ឋាភិបាលកំពុងដោះស្រាយបញ្ហានេះតាមរយៈស្ដារប្រឡាយទឹកឱ្យជ្រៅ និងបង្កើតទំបន់ថ្មីៗសម្រាប់បង្ហូរទឹកចូលទន្លេ។ ប៉ុន្តែលោកថា បញ្ហាមិនអាចដោះស្រាយបានក្នុងរយៈពេលខ្លីដូចការចង់បាននោះទេ។
មួយវិញទៀត លោកថា បញ្ហាទឹកជំនន់នាប៉ុន្មានថ្ងៃមកនេះ ដោយសារតែកម្ពុជារងឥទ្ធិពលព្យុះដែល ប្រទេសណាក៏មិនអាចទប់ទល់នឹងឥទ្ធិពលព្យុះនេះបានដែរ។ តែលោកថា ស្ថានភាពនេះ រដ្ឋាភិបាលអាចគ្រប់គ្រងបាន។
លោកបន្ថែមថា៖ «ដូច្នេះ យើងខ្វាយខ្វល់ណាស់នៅក្នុងសាច់រឿងហ្នឹង [ទឹកជំនន់] យើងឃើញហើយ ឯកឧត្ដមអភិបាលក្រុងលោកចុះទៅមើល។ ហើយយើងមិនមែនទុករឿងហ្នឹងសម្រាប់សន្សំយកប្រជាប្រិយភាពពីការពិបាកក្នុងការចុះជួយប្រជាពលរដ្ឋទេ»។
ប្រជាពលរដ្ឋរស់នៅជិតស្ទឹងព្រែកត្នោត ក្នុងភូមិសំបួរ សង្កាត់សាក់សំពៅ ខណ្ឌដង្កោ រាជធានីភ្នំពេញ លោក ចន ជឿន កត់សម្គាល់ថា ទឹកស្ទឹងព្រែកត្នោត បានជន់លិចខ្លាំងរយៈពេល៣ទៅ៤ឆ្នាំជាប់គ្នាមកនេះ ហើយពេលជន់លិចម្តងៗគឺមានរយៈពេល២សប្ដាហ៍ឬលើសពីនេះ។
បុរសវ័យ៤២ឆ្នាំរូបនេះបារម្ភថា បើបញ្ហានេះវានឹងកើតឡើងនៅឆ្នាំបន្តបន្ទាប់ទៀត ពលរដ្ឋដែលងាយរងគ្រោះនឹងប្រឈមបញ្ហាជីវភាពធ្ងន់ធ្ងរ ដោយសារមិនមានប្រាក់សម្រាប់ត្រៀមបម្រុងដើម្បីដោះស្រាយជីវភាពក្នុងគ្រាមានអាសន្ន។
លោកថា៖ «បងឯងមើលតាមថ្នល់ គ្នានៅវេទនាណាស់ មួយតូបៗហ្នឹង ហ្នឹងអត់ភ្លៀង! បើភ្លៀង មិនដឹងយ៉ាងណា! គោ ពពែ នៅលើថ្នល់ អត់មានក្រោលអត់មានអីផង អត់មានអីប្រក់ទេ គោនោះ។ បើមនុស្សមានតង់មួយ គ្រែមួយ មនុស្សមួយហ្វូង ដេកម៉េចទៅ? បងឯងទៅមើលខាងកើតសាលាសង្កាត់សាក់សំពៅ ពិសេសតូប មានតែ៤០ទៅ៥០គ្រួសារ បងឯងទៅមើលណែនចែស ប្រក់តង់ វេទនាចង់ងាប់»។
ក្រុមអង្គការសិទ្ធិមនុស្សនិងសិទ្ធិដីធ្លី ចំនួន៤ រួមមាន អង្គការលីកាដូ បណ្ដាញយុវជនកម្ពុជា អង្គការសមធម៌កម្ពុជា និងអង្គការសមាគមធាងត្នោត អំឡុងខែកក្កដា ឆ្នាំ២០២០ បានចេញរបាយការណ៍រួមមួយដោយបង្ហាញថា ជាង៩០ភាគរយនៃបឹងក្នុងខណ្ឌមានជ័យ រាជធានីភ្នំពេញ នឹងត្រូវបានលុបបើសិនជាការអភិវឌ្ឍនៅតែបន្តកើតមានឡើង។ របាយការណ៍ដដែលបន្តថា គុណភាពជីវិតរបស់ពលរដ្ឋប្រមាណពី១លានទៅ២លាននាក់ដែលរស់នៅក្នុងរាជធានីភ្នំពេញ ក្រុងតាខ្មៅ ខេត្តកណ្ដាល និងតាមបណ្ដោយច្រាំងទន្លេមេគង្គ និងទន្លេបាសាក់ អាចនឹងមានផលប៉ះពាល់ធ្ងន់ធ្ងរពីការលុបបឹងទាំងនេះ។
តាមប្រភពដដែលឱ្យដឹងទៀតថា ពលរដ្ឋទាំងនោះអាចនឹងរងគ្រោះដោយទឹកជំនន់ ការបំពុលទឹក ការបំផ្លាញជម្រកសត្វ និងការបាត់បង់ជីវភាពរស់នៅរបស់ពួកគាត់។
តែយ៉ាងណា គណបក្សប្រជាធិបតេយ្យមូលដ្ឋាន បានលើកឡើងក្នុងសេចក្ដីថ្លែងការណ៍ថា ដើម្បីដោះស្រាយបញ្ហាទឹកជំនន់នៅស្ទឹងព្រែកត្នោតបាន រដ្ឋាភិបាលចាំបាច់ត្រូវធ្វើទំនប់ ប្រឡាយរំដោះទឹក និងអាងស្តុកទឹកផ្នែកខាងលើ ត្រូវធ្វើផ្លូវរំដោះទឹកនៅផ្នែកខាងក្រោម ជាពិសេសនៅខណ្ឌដង្កោ និងស្រុកកណ្ដាលស្ទឹង ខេត្តកណ្ដាល រួមទាំងផ្អាកលុបបឹង ជាពិសេសនៅក្នុងខណ្ឌដង្កោជាដើម ដើម្បីអាចមានសមត្ថភាពក្នុងការទប់ទឹកជំនន់ក្នុងរដូវវស្សា៕